Ermənistan və Pakistan diplomatik münasibətlər qurdu

Ermənistan və Pakistan arasında diplomatik münasibətlərin yaradılması barədə birgə kommunike imzalanıb.

Musavat.com xəbər verir ki, sənədi Ermənistanın xarici işlər naziri Ararat Mirzoyan və Pakistanın baş nazirin müavini, xarici işlər naziri Məhəmməd İshaq Dər imzalayıb. Mərasim Çin Xalq Respublikasının Tianjin şəhərində keçirilən Şanxay Əməkdaşlıq Təşkilatının sammiti çərçivəsində baş tutub.

Kommunikenin imzalanması ilə iki ölkə diplomatik əlaqələrin qurulduğunu rəsmən elan edib. Tərəflər BMT Nizamnaməsinə uyğun olaraq qarşılıqlı hörmət, ərazi bütövlüyü, daxili işlərə qarışmamaq və sülh şəraitində əməkdaşlıq prinsiplərinə sadiq qalacaqlarını bildiriblər.

Hökumətlər həmçinin diplomatların mübadiləsi və qarşılıqlı əsasda bütün lazımi yardımın göstərilməsi barədə razılığa gəliblər.

Ermənistan XİN-in məlumatına görə, imzalama mərasimi öncəsi iki nazir ikitərəfli əməkdaşlığın perspektivlərini müzakirə ediblər. Mirzoyan Cənubi Qafqazda sülh prosesinə dair Ermənistanın atdığı addımları diqqətə çatdıraraq Bakı ilə sülhün əldə olunduğunu vurğulayıb. Pakistan XİN rəhbəri isə Ermənistanı bu münasibətlə təbrik edib.