Azərbaycan diaspora rəhbəri deputatlığa gedir – Rusiyada görünməmiş hadisə

İllərdir Rusiya ərazisində Azərbaycan diaspor təşkilatlarının rəhbərləri müxtəlif təzyiqlərə, həbs və deportasiyalara məruz qalırdı.

Musavat.com xəbər verir ki, ancaq ilk dəfə olaraq tam əksinə bir fakt qeydə alınıb: İvanovo vilayəti Azərbaycan diasporunun rəhbəri, Asif Abilfət oğlu Məmmədov “Yedinaya Rossiya” partiyasının siyahısı ilə deputatlığa namizəd göstərilib.

Məlumata görə, 14 sentyabr 2025-ci ildə İvanovo vilayətində bələdiyyə seçkiləri keçiriləcək. Artıq may ayında “Yedinaya Rossiya” öz praýmeriz seçkilərini keçirərək siyahıları təsdiqləyib. Həmin siyahıda Asif Məmmədovun adı rəsmi olaraq yerləşdirilib və bu, demək olar ki, mandatın təmin olunması anlamına gəlir.

Namizəd kartında Məmmədovun iş yeri ASC “Revis” göstərilib. Şirkətin fəaliyyəti faktiki olaraq dayanmış görünsə də, Məmmədov həm “Vendor” MMC, həm də “Titul-M” MMC şirkətlərinin direktoru kimi qeyd olunur. Bundan əlavə, o, İvanovo vilayəti Azərbaycanlılarının Milli-Mədəni Muxtariyyəti RQƏ və İvanovo şəhəri Azərbaycanlılarının Milli-Mədəni Muxtariyyəti İctimai Təşkilatına rəhbərlik edir.

Beləliklə, yalnız bir həftə sonra İvanovo vilayətində Azərbaycan diasporunun rəhbəri deputat mandatı qazanacaq. Bu fakt rəsmi Bakı ilə Moskva arasında münasibətlərin gərgin fonunda – Azərbaycanın anti-Rusiya mövqeyi, Ukraynaya dəstək ritorikası və hətta Rusiyada jurnalistlərimizin təqib edildiyi bir vaxtda baş verir.

İlk dəfədir ki, Azərbaycan diasporunun rəhbəri Rusiyada partiya siyahısı ilə deputat kürsüsünə irəliləyir. Bu hadisə həm Rusiya-Azərbaycan münasibətlərinin, həm də diasporun statusunun gələcək gedişatında mühüm dönüş kimi dəyərləndirilir.