Sabiq səfir ELMİRA Axundova ilə şıdırğı gedən dələduzun ölkədən çıxışına -STOP- qoyuldu - VİDEO

Sabiq səfir Elmira Axundovanın yaxın çevrəsindən olan, dələduzluğa görə 9 il müddətinə azadlıqdan məhrum edilən Elnur İbrahimovun ölkədən çıxışına “STOP” qoyulub.

Musavat.com xəbər verir ki, qərar Nəsimi rayon İcra Şöbəsinin icra məmuru Ramin Quliyevin təqdimatı əsasında, Nəsimi Rayon Məhkəməsinin hakimi Həbibə Miriyeva tərəfindən verilib. Elnur İbrahimov 2013-cü ildə Elmira Axundovanın evində başlayan dələduzluq sxeminin “vinti” olub. O vaxt sabiq deputat tanışlarına deyib ki, oğlu Həbib Axundov biznes qurur, pullarını yatırmaqla böyük qazanc əldə edəcəklər. İnsanlar deputata inanaraq milyonlarla manatlarını veriblər. Faktiki isə biznes kağız üzərində qurulmuş saxtakarlıqdan başqa bir şey deyilmiş. Həmin dövrdə Elnur İbrahimov Axundovaların evində daimi “sakin” idi. Axundovların toy, ad günü və təmtaraqlı məclislərində yuxarı başa keçirilirmiş. Pul yığımı iflasa uğrayanda, Elmira Axundova “biznes dağıldı” deyib və Elnur İbrahimovu qabağa veriblər. Ardınca isə o, Qəbələdə Elmira Axundova ilə görüşdükdən sonra Gürcüstana, oradan Moskvaya qaçırılıb. Yalnız illər sonra ekstradisiya edilərək Azərbaycanda mühakimə olunub və 9 il cəza alıb. Bakı Ağır Cinayətlər Məhkəməsi həmçinin Fərman Məmmədovun 350 min manatlıq mülki iddiasını təmin etmişdi. İndi isə həmin hökm, həmin mülki iddia sanki kağız parçasına çevrilib. 2024-cü ildə isə Nizami Rayon Məhkəməsinin hakimi Nigar Qədirli Elnur İbrahimovu vaxtından əvvəl cəza çəkməkdən azad olunması haqda qərar verib. Hakim Elnur İbrahimovun zərərçəkmiş Fərman Məmmədova vurduğu ziyanı ödəməkdən yayınmasını görməzdən gəlib. Ən əsası isə verdiyi qərarı zərərçəkəndən gizlədib! Fərman Məmmədov Elnur İbrahimov barəsində çıxarılmış həmin qərardan 2025-ci ilin sentyabrında xəbər tutub və apellyasiya şikayəti verib. 

Söhbət Nizami Rayon Məhkəməsinin hakimi Nigar Aftandil qızı Qədirlinin məhkəmə adına rüsvayçılıq gətirən qərarından gedir. Nigar Qədirlinin 06.06.2024-cü il tarixində imzaladığı qərarla Elnur İbrahimov cəzasının bir hissəsini çəkməkdən azad edilib. Elnur İbrahimov Bakı Ağır Cinayətlər Məhkəməsinin hökmü ilə külli miqdarda dələduzluqda təqsirli bilinməklə 9 il müddətinə azadlıqdan məhrum edilib. Eyni zamanda ondan dələduzluqla ələ keçirdiyi 350 min manatın alınaraq Fərman Məmmədova ödənməsi barədə mülki iddia da təmin olunub. Mülki iddia 6 saylı cəzaçəkmə müəssisəsinin rəisinə də göndərilib. Elnur İbrahimovun dələduzluq dosyesi rəis Fariz Əliyevin əlinin altında ola-ola, o, məhkumun vurduğu ziyanı ödəməsi üçün heç bir addım atmayıb. Bunun əvəzində Elnur İbrahimovun əfv üçün müraciətlərini vaxtı-vaxtında komissiyaya göndərib, İbrahimovun əfv müraciətləri də hər dəfə rədd olunub. Bundan sonra Elnur İbrahimov vaxtından əvvəl azad edilməsi üçün Nizami Məhkəməsinə ərizə yazıb. Bu zaman rəis Fariz Əliyev məhkəməyə “bəy tərifi” misalı mülahizəsini yazıb, göndərib.

Ötən yazıdan sitat: 

“Həmin mülahizəsində rəis Fariz Əliyev yazır: “Məhkum Elnur İbrahimov yatağını səliqəli saxlayır (nə gözəl), şəxsi gigiyena qaydalarına riayət edir (əla!), ailəsi ilə uzunmüddətli görüşlərə gedir (bəh-bəh), telefonla da danışır (gurultulu alqışlar). Hakim Nigar Qədirli türmə rəisinin mülahizəsini əlində bayraq edib, Elnur İbrahimovu, 1 qəpik zərər ödəməyən dələduzu cəzadan azad edilməsinə yol açan qərar verib! Hakim qərarı verərkən dələduz Elnur İbrahimovun boynunda olan mülki iddia üzrə 350 min manat zərəri gözardı edib. Üstəlik, hakim Azərbaycan məhkəmələrinə yad bir addım da atıb - prokurorun əsaslı etirazını da saya salmayıb. Bundan başqa, Nigar Qədirli məhkəməni “örtülü bazar”a çevirib, dələduz Elnur İbrahimovun vaxtından əvvəl azadlığa çıxması haqda ərizəsinə baxarkən zərərçəkmiş şəxsləri məhkəməyə çağırmayıb. Ümumiyyətlə, qərarda qanun adına bir əsaslandırma yoxdur, heç bir sorğu-sual aparılmayıb. Yazır ki, guya Elnur İbrahimovun məhkəməyə videokonfrans vasitəsilə qoşulub və qərar verilib. Ən maraqlısı isə odur ki, azad edilmə qərarı düz Elnur İbrahimovun doğum gününə “hədiyyə” kimi verilib. Başqa sözlə, hakim Nigar Qədirli sanki dələduza ad günü sürprizi bəxş edib!”

Zərərçəkmiş Fərman Məmmədov Nizami Rayon Məhkəməsinin hakimi Nigar Qədirli tərəfindən törədilən cinayətə bərabər qanunsuzluğun araşdırılmasını tələb edir.

E.MƏMMƏDƏLİYEV,
Musavat.com