Mehdiyevin ətrafından olan hər kəsin vəkili redaksiyamıza məktub yazdı - Şaiq bəyin =dolu portfeli=

Dövlətə xəyanət ittihamı ilə həbs olunan Ramiz Mehdiyevin yaxın çevrəsindən olan Adnan Əhmədzadənin vəkili Şaiq Mirzəyev mətbuatda müştəriləri barəsində yazılanlardan narazıdır. Həm də SOCAR-ın sabiq vitse-prezidenti Mikayıl İsmayılovun vəkili olan Şaiq Mirzəyev Musavat.com redaksiyasına məktubla müraciət edib.

Vəkil Mirzəyevin yazdıqlarından belə aydın olur ki, müştərisi Mikayıl İsmayılov barəsində yayılmış “Mikayıl İsmayılov və İslam Rzayevin gizli əlaqələri ifşa olunur - Mehdiyev klanının iç üzünü açan ŞOK FAKTLAR” və “Ramiz Mehdiyevin yaxın adamı Mikayıl İsmayılovun Almaniyada 36 mənzili üzə çıxdı – SEPARATÇI KÜRDLƏRLƏ ƏLAQƏ İDDİASI” sərlöhvəli yazılardan narahat olub.

Birinci yazıdan sitat:

“Araşdırmalar göstərir ki, Rzayevin 2011-ci ildə icra başçısı vəzifəsinə təyin olunmasının arxasında SOCAR-ın sabiq vitse-prezidenti, milyardlarla vəsaitə sahib oliqarx-məmur Mikayıl İsmayılov dayanıb.

Məlumata görə, Mikayıl İsmayılov İslam Rzayevin tələbə yoldaşı və eyni zamanda "qudası"dır. Məhz bu qohumluq və şəxsi əlaqə vasitəsilə Ramiz Mehdiyevlə birbaşa əlaqə qurulub və Rzayevin Balakənə icra başçısı kimi təqdimatı həyata keçirilib. Bu təyinat həmin dövrdə Mehdiyev klanının ölkə üzrə regional idarəçilik mexanizmlərində öz təsir dairəsini qorumaq üçün həyata keçirdiyi mühüm addımlardan biri sayılır...

Mənbələr bildirir ki, Mikayıl İsmayılov uzun illər Ramiz Mehdiyevin ən yaxın dairəsinə daxil olan məmurlardan biri olub. SOCAR-da və dövlət strukturunda topladığı nəhəng maliyyə imkanları vasitəsilə Mehdiyev klanına lojistik və maliyyə dəstək göstərib.

İslam Rzayevin Balakənə icra başçısı təyin olunması da məhz bu “klan təqdimatı” mexanizminin nəticəsi olub. Deyilənlərə görə, təyinatdan öncə Mikayıl İsmayılov Mehdiyevlə görüşərək Rzayevin etibarlı şəxs olduğunu, “həm idarəçi, həm də ailədən biri kimi” inam qazandığını bildirib. Bunun ardınca Mehdiyevin təqdimatı ilə Rzayev 2011-ci ilin mayında vəzifəyə təyin edilib.

İndi isə bu əlaqələr Mehdiyev şəbəkəsinin tam ifşasına gətirib çıxarıb.

Mənbələrə görə, İsmayılov təkcə Rzayevin deyil, Mehdiyev klanına mənsub digər məmurların da vəzifəyə gətirilməsində rol oynayıb. O, uzun illər ərzində SOCAR vasitəsilə əldə etdiyi nəhəng maliyyə resurslarını bu inzibati şəbəkənin qorunması üçün istifadə edib”.

Digər yazıda isə bildirir ki, 16 il ərzində SOCAR-da vitse-prezident vəzifəsində çalışan Mikayıl İsmayılov Ramiz Mehdiyevin birbaşa himayəsində olub və onun vasitəsilə dövlət neft şirkətinin iri layihələrindən əldə edilən vəsaitlərin böyük hissəsini Ramiz Mehdiyev klanına və öz şəxsi şəbəkəsinə yönləndirib.

Həmin yazıdan sitat:

“İsmayılovun fəaliyyəti dövründə milyardlarla manatın mənimsənildiyi, müxtəlif “şirkət-tender” sxemləri ilə bu pulların ölkədən çıxarıldığı qeyd olunur. Musavat.com-a daxil olan xüsusi mənbə məlumatına əsasən, Mikayıl İsmayılovun xaricdəki daşınmaz əmlak imperiyası da ifşa olunub. Mənbənin bildirdiyinə görə, onun təkcə Almaniyanın Düsseldorf şəhərində 28, Münxendə isə 8 mənzili var. Bu daşınmaz əmlakların bir qismi Almaniyada yaşayan, vaxtilə Türkiyəyə qarşı fəaliyyət göstərən separatçı kürd mənşəli bacanağı vasitəsilə alınmışdır. İddialara görə, həmin şəxs vasitəçi kimi çıxış edib və bu yolla Azərbaycandan çıxarılan vəsaitlərin ofşor hesanlara ötürülməsini təmin edib. Məlumata görə, İsmayılov bu əməliyyatlarda qaynı Rövşənin də köməyindən istifadə edib. Rövşən adlı şəxs vasitəsilə pulların bir hissəsi Gürcüstan və Kipr üzərindən Avropaya daşınıb”.

Vəkilin yazdıqlarından belə anlaşılır ki, Mikayıl İsmayılov yazılarda yer alan “Mehdiyev klanının maliyyə dayağı olub”, “Almaniyada 36 mənzili var, separatçı kürd mənşəli bacanağı vasitəsi ilə pul çıxarıb”və s məlumatlardan narahat olub. Hesab edir ki, yazılar jurnalist araşdırması deyil, məqsədli şəkildə Mikayıl İsmayılovun şəxsiyyətini nüfuzdan salmağa yönəlmiş saxta ittihamlar toplusudur. Mikayıl İsmayılov bu məlumatlarla bağlı məhkəməyə üz tutacağını da vurğulayır.
Mikayıl İsmayılovun vəkili Şaiq Mirzəyev, həm də ötən ay Dövlət Təhlükəsizliyi Xidmətinin keçirdiyi əməliyyat zamanı saxlanılan SOCAR-ın İnvestisiya departamentinin sabiq rəhbər müavini Adnan Əhmədzadənin vəkilidir. Adnan Əhmədzadə iqtisadi təhlükəsizliyə qarşı təxribat və xüsusilə külli miqdarda mənimsəmə əməllərində ittiham olunur.

Hazırda həbsdə olan iş adamı Adnan Əhmədzadənin qurumun sabiq vitse-prezidenti Mikayıl İsmayılovla çox yaxın əlaqələri haqda məlumatlar var. Məsələni maraqlı edən digər detal isə Şaiq Mirzəyev vaxtilə “Az-Qranata” MMC-nin baş direktoru olub. Həmin şirkətin də Mikayıl İsmayılova və ailəsinə məxsusluğu haqda mediada dəfələrlə məlumatlar yayımlanıb. Şaiq Mirzəyev Mikayıl İsmayılovla yanaşı onun oğlu Orxan İsmayılzadənin qalmaqallı atalıq işində də vəkilidir.

Xatırladaq ki, 2012-ci ilin may ayında Mikayıl İsmayılovun oğlu Orxan İsmayılzadə ilə Fidan Abbasovanın faktiki nikahı baş tutub. Faktiki nikahı rəsmi nikaha çevirənədək cavabdehlə birlikdə yaşayıb, faktiki ailə münasibətləri 3 sentyabr 2016-cı ilədək davam edib.

“Faktiki nikahımızdan 5 may 2015-ci il tarixdə Nil adlı övladımız anadan oldu, lakin Orxan uşağın atası olması ilə bağlı nə rəsmi nikaha düşdü, nə də atalığı qəbul etdi. Dedi, ailəsi buna razı deyil, o da ailəsinin sözünü yerə sala bilməyəcək. Orxanın atası Mikayıl İsmayılov həmin vaxt yüksək vəzifəli məmur idi və istədiyi kimi istədiyi şəxsə təzyiq etmək imkanında idi. O zaman Sabunçu Rayon Məhkəməsində iddia qaldıraraq övladımın atasının müəyyən edilməsini xahiş etdim. Məhkəmə prosesinin gedişatında Mikayıl İsmayılov şəxsən mənimlə görüşdü. Onların adının məhkəmələrdə hallandırılmamasını xahiş etdi. Dedi ki, əgər iddiamı geri çəksəm, Orxan məhkəmədən kənar şəkildə bütün məsələni həll edəcək və övladımızın atası olmasını etiraf edəcək”, - Fidan Abbasova bildirib.

Mikayıl İsmayılovun oğlu Orxan İsmayılzadə qızı Nil İsmayılzadənin saxlanılması üçün aliment ödəməkdən yayınır. Bu səbəbdən o, artıq ikinci dəfədir ki, axtarışa verilib.

Bu il Orxan İsmayılzadənin vəkili Şaiq Mirzəyev Fidan Abbasovaya barışıq sənədi təqdim edib, həmin sənəddə uşağının atasının Orxan İsmayılzadə olmasının üzərindən keçərsə, 65 min manat ödəyəcəyi qeyd olunub. Fidan Abbasova barışıq ərizəsini imzalamayıb, Orxan İsmayılzadədən aliment ödəməsini tələb edib. Hazırda xaricdə məskunlaşan Orxan İsmayılzadə aylardır ki, aliment ödəmir. Fidan Abbasova deyir ki, Şaiq Mirzəyev ona alimentin ödənməyəcəyini bildirib. Əslində Mikayıl İsmayılovun narahatlıq keçirməli olduğu mövzu elə bu olmalıdır. Adamın milyonları var, böyük varidatı haqda mətbuatda natamam siyahılar dolaşır, qız nəvəsinin saxlanmasına isə oğlu ayda 500 manat ödəməkdən yayınır.

Fidan Abbasova Şaiq Mirzəyevin Adnan Əhmədzadəyə vəkil tutulmasında keçmiş qayınatasının rolu və iştirakının ola biləcəyini ehtimal etdiyini də bildirmişdi.

Adnan Əhmədzadə sentyabrın 19-da Bakıda Dövlət Təhlükəsizliyi Xidməti əməkdaşları tərəfindən saxlanıb. Növbəti gün Səbail Rayon Məhkəməsi onun barəsində 4 aylıq həbs qətimkan qərarı verib. Onun barəsində Azərbaycanın iqtisadi təhlükəsizliyinə qarşı təxribat törətmək və külli miqdarda mənimsəmə ittihamları olduğu bildirilsə də, bu barədə hələ ki, rəsmi məlumat yoxdur.

E.MƏMMƏDƏLİYEV,
Musavat.com