Pulsuz qəbul etməyəcəm - Mingəçevirdə şoka düşən körpəyə qəddar münasibət FOTO

Almaniyadan Azərbaycana valideynlərini ziyarətə gələn Bənövşə Şirinova Mingəçevir Şəhər Mərkəzi Xəstəxanasının həkimindən şikayətçidir.

B.Şirinova bununla bağlı Musavat.com-un redaksiyasına müraciətində bildirib ki, xəstəxananın həkimi Məqbulə Xəlilova onun qəfil halı pisləşən 10 aylıq körpəsinə tibbi yardım göstərməyib:

"Almaniyadan Mingəçevirə ailəmi ziyarət etmək üçün gəlmişdik. Ziyarətdən 10 gün sonra, yəni 21 dekabrda 10 aylıq qızımın halı qəfil pisləşdi. Bədən temperaturu 34 dərəcəyə düşdü. Körpəm şok vəziyyətində idi. Tələsik halda Mingəçevir Şəhər Mərkəzi Xəstəxanasının Təcili şöbəsinə apardıq. Mən xəstəxananın qeydiyyat bölməsində öz şəxsiyyət vəsiqəmi təqdim etdim və bildirdim ki, xaricdən gəldiyimiz üçün körpənin şəxsiyyət vəsiqəsini hələ çatdırıb almamışıq, amma Azərbaycan vətəndaşıdır.

Bizi qarşılayan həkim Məqbulə Xəlilova uşağa yaxınlaşmadan, 4-5 metr uzaqdan dedi: "Hə, nə olub?" Bu zaman qeydiyyatda əyləşən xanım ona bildirdi ki, uşağın vəziyyəti pisdir, amma şəxsiyyət vəsiqəsi yoxdur. Məqbulə Xəlilova uşağı yoxlamadan dedi: "Övladınızın Azərbaycan şəxsiyyət vəsiqəsi yoxdur, onsuz da pulsuz qəbul etməyəcəm. Aparın özəl klinikaya".

Dedim, uşağım Azərbaycan vətəndaşıdır, onun xarici pasportuna baxsanız, görərsiniz. Bir dəqiqənin də öz hökmü var, kömək edin. Məqbulə Xəlilova körpəmə yaxın durmadı, dedi, uşağı sənədsiz özəl xəstəxanada qəbul edərlər, ora gedin.

Şok vəziyyətində olan 10 aylıq körpə xəstəxanadan geri çevrildi. Özəl klinikada ilkin yardım göstərildi. Dedilər, uşaq zəhərlənib. İrad bildirdilər ki, həkim uşağı bu halda geri çevirməməli idi. Evə qayıtdıq. Amma az sonra qızımın temperaturu 34-dən də aşağı düşməyə başladı, rəngi ağardı. Təcili tibbi yardım gəldi və tibb bacısı bizə dedi ki, uşaq xəstəxanaya aparılmalıdır. Mən həkimin körpəmi qəbul etmədiyini deyəndə bizə açıq şəkildə bildirildi ki, həkimin bu hərəkəti birbaşa cinayət məsuliyyəti daşıyır.

Təcili yardım maşınında uşağı yenidən Təcili şöbəyə apardıq. Orada həmin həkimlə üz-üzə gəldik. Mən ağlayaraq dedim ki, uşağımı əlləri ilə ölümə göndərib. Cavab olaraq o, tibb bacılarına dedi: "Bunu burdan rədd edin, pulunu alın, uşağı aparata soxun, əl çəksin".

Məni alçaltdı, insan yerinə qoymadı. Mən şokda idim. Uşağımın həyatla ölüm arasında olduğu an idi. Onun ağrısı ilə mən də qışqırdım, etiraz etdim, hətta onu cani adlandırdım. Çünki övladım qollarımda can verirdi, o isə sakitləşdirmək və uşağa yardım etmək əvəzinə məni daha da qızışdırırdı. Ona dedim ki, sizi lazımi orqanlara şikayət edəcəyəm. O isə hər kəsin içində qışqıraraq dedi: "Əgər məni işdən çıxartdıra bilməsən, kişi qızı deyilsən. Get görüm necə çıxartdırırsan!"

Mən 2-ci qrup Qarabağ əlilinin qızıyam.

Beləliklə, heç kim müdaxilə etmədi, ancaq bir həkim dedi ki, uşağı evə aparım, nə lazımdırsa edilib, evdə gözləyim. Dedim, uşağı evə aparım ölsün? Onların qəddar münasibəti məni şoka salmışdı. Beləliklə, uşağı evə apardıq və kənar bir həkimə zəng etdik. O dedi ki, uşağa təcili kofein iynəsi vurun və onu şokdan çıxarın. Biz körpəyə iynə vurduq və 2-3 saat sonra uşaq normallaşdı. Bu gün o həkim mənim balama bunu etdi. Sabah başqasının balasına da edə bilər. Anam qızıma kofein vuraraq həyata qaytardı. Bəs anam olmasaydı?!"

Mingəçevir Şəhər Mərkəzi Xəstəxanasından bildirilib ki, araşdırmanın nəticəsinə əsasən müəyyən edilib ki, Təcili tibbi yardım şöbəsinin həkimi Xəlilova Məqbulə Hilal qızı tərəfindən vətəndaşa ilkin mərhələdə düzgün yanaşma nümayiş etdirilməyib, həkim-pasiyent münasibətlərinə və etik davranış qaydalarına zidd hallara yol verilib.

"Bu səbəbdən Tibbi Şuranın qərarı ilə həkim Xəlilova Məqbulə Hilal qızına töhmət verilib.

Xəstəxana rəhbərliyi olaraq baş verən hadisə ilə bağlı vətəndaşın yaşadığı narahatlığı anlayır, gələcəkdə bu cür halların qarşısının alınması üçün nəzarət və daxili intizam mexanizmlərinin daha da gücləndiriləcəyini bildiririk", - məlumatda deyilir.