Ramiz Mehdiyev -Elmira Axundova tandeminin adı keçən 8 milyonluq qalmaqal

Ramiz Mehdiyevi özünə “ağsaqqal” bilən Elmira Axundovanın adı keçən 8 milyonluq dələduzluq işi yenidən gündəmə gəlib.

Musavat.com xəbər verir ki, Elmira Axundovanın yaxın adamı kimi tanınan Elnur İbrahimovun həyat yoldaşı - Xəzər Universitetində müəllim vəzifəsində çalışan Nərgiz Ramiz qızı İbrahimova Nəsimi Rayon Məhkəməsinə müraciət edərək Nəsimi Rayon İcra və Probasiya Şöbəsinin icra məmuru Ramin Quliyevin hərəkətlərinin qanunsuz hesab edilməsini xahiş edib. Şikayətçi icra məmuru tərəfindən onun həyat yoldaşı Elnur İbrahimovun xüsusilə külli miqdarda borcuna görə onun əməkhaqqından ayda 200 manat tutulmasına etiraz edib.

İş üzrə keçirilən məhkəmə prosesində mülki iddiaçı Fərman Məmmədov və digər zərərçəkmiş şəxslər də iştirak ediblər. Nərgiz İbrahimova şikayətini əsaslandırmağa çalışaraq bildirib ki, onun iki azyaşlı övladı var və həyat yoldaşı Elnur Rauf oğlu İbrahimovun mülki iddia üzrə borcunun onun əməkhaqqından tutulması yolverilməzdir.

Lakin mülki iddiaçı Fərman Məmmədov məhkəmənin diqqətinə çatdırıb ki, Elnur İbrahimov və onun arxasında dayanan şəxslər xüsusilə külli miqdarda -  513 min manat vəsaiti mənimsədikdən sonra Nərgiz İbrahimova ilə birlikdə Rusiyanın paytaxtı Moskvaya qaçıblar. Onlar təxminən üç il ərzində dələduzluq yolu ilə əldə edilmiş vəsait hesabına orada yaşayaraq gündəlik ərzaq, geyim və digər zəruri ehtiyaclarını təmin ediblər. 

Fərman Məmmədov bildirib ki, Nərgiz İbrahimovanın iki uşaq anası olması faktı bu işdə yumşaldıcı hal kimi təqdim edilə bilməz. Çünki iş üzrə zərərçəkənlərin hər birinin də 2-3 övladı var və onlar da ailə dolandırmaq məcburiyyətindədirlər.

Məhkəmədə səsləndirilən məlumata görə, Elnur İbrahimov S. Ağayevdən 115 min manat, Z. Vəliyevdən 145 min manat, E. Vəliyevdən 124 min manat, Ş. Məhərrəmovdan 52 min 500 manat, eləcə də digər şəxslərdən – ümumilikdə 7 nəfərdən 1 milyon 151 min 500 manat məbləğində vəsait alaraq dələduzluq edib.

İş materiallarında qeyd olunur ki, Nərgiz İbrahimova həyat yoldaşının dələduzluq yolu ilə əldə etdiyi pulların istifadəsində birbaşa iştirak edib. Elnur İbrahimov həmin vəsaitləri evində saxlayıb, “biznesdən divident” adı ilə vətəndaşlara verilən pulların bir hissəsi isə məhz Nərgiz İbrahimova vasitəsilə ötürülüb.

Mülki iddiaçı Fərman Məmmədov məhkəmədən xahiş edib ki, dələduzluq yolu ilə əldə edilmiş vəsaitlərdən faydalanmış, üç il ərzində həmin pullar hesabına Moskvada yaşamış Nərgiz İbrahimovanın şikayəti təmin edilməsin.

Bu qalmaqallı məsələnin kökü 2013-cü ilə gedib çıxır. Elmira Axundova deputat olduğu dövrdə oğlu Həbib Axundovu yaxın çevrəsində iş adamı kimi təqdim edib. Dubaydan gətiriləcək dəftərxana ləvazimatları ilə böyük gəlir vəd olunub, divident adı altında vəsaitlər toplanıb. Axundovanın ailə dostlarından ümumilikdə 8 milyon manat vəsait yığılıb. Amma realda bu “biznes” kağız üzərində qurulmuş sxemdən başqa bir şey olmayıb. Divident adı ilə geri qaytarılan pullar zərərçəkənlərin öz vəsaitlərinin cüzi hissəsini təşkil edib. Dələduzluq sxeminin üstü açıldıqdan sonra zərərçəkmişlər hüquq-mühafizə orqanlarına müraciət edərək deputatın oğlu Həbib Axundovun adını çəkiblər. Elmira Axundova isə prosesə müdaxilə edərək zərərçəkənləri sakitləşdirməyə çalışıb, “narahat olmayın, pullar qaytarılacaq” deməklə vəziyyəti manipulyasiya edib. Sonrakı mərhələdə “günah keçisi” kimi Elnur İbrahimov ön plana çıxarılıb və bütün pulların ona çatdığı görüntüsü yaradılıb. 2013-cü ilin avqustunda Həbib Axundov Elnur İbrahimovu Qəbələdə yerləşən “Qafqaz Resort” hotelində Elmira Axundova ilə görüşdürüb. Bir neçə gün sonra İbrahimov gizli şəkildə Gürcüstan sərhədini keçərək ölkəni tərk edib və Rusiyada ailəsi ilə birlikdə zərərçəkənlərin pulları hesabına kef çəkib. Azərbaycan hüquq-mühafizə orqanları onu təxminən üç il tapa bilməyib. 2016-cı ildə Elnur İbrahimov həbs edilib və Bakı Ağır Cinayətlər Məhkəməsində hakim qarşısına çıxarılıb. İş məhkəmədə baxılarkən Prezident Administrasiyasından hakim Rahib Salmanova Elmira Axundovanın Ramiz Mehdiyevə ünvanladığı, məhz bu dələduzluq işini əhatə edən, “hörmətli Ramiz müəllim, yalnız sizin oxumağınız üçündür” girişli, “siz mənim dostum və ağsaqqalımsınız” ifadələri ilə zəngin, hər sətri 1937-ci ilin donoslarını xatırladan məktubu göndərilib.

Məlum olub ki, Axundovanın donos-məktubu Prezident Administrasiyasında 15244 nömrə ilə qeydiyyatdan keçib və Ramiz Mehdiyevə təqdim olunub. Ramiz Mehdiyev isə məktubu hakim Rahib Salmanova göndərməklə faktiki olaraq məhkəməyə təzyiq göstərib. Həmin məktubu alan hakimin o dövrdə Administrasiya rəhbəri olan, onu özünə “ağsaqqal” hesab edən Elmira Axundova və onun oğluna qarşı hansı mövqe tuta bilərdisə, elə o mövqeyi də sərgiləyib.

Hakim Rahib Salmanov Mehdiyevdən gələn məktubu oxuduqdan sonra iş materiallarında olan Elmira Axundovanın səs yazılarına, oğlu Həbib Axundovun işdə tərəf olmasını təsdiqləyən sənəd-sübuta, dəlillərə hüquqi qiymət vermədən, onların üzərindən sükutla keçərək Elnur İbrahimovun külli miqdarda dələduzluq əməllərini təsdiqləyib. Hakim eyni zamanda zərərçəkənlərdən yalnız Fərman Məmmədovun mülki iddiasını təmin edib. Beləliklə, Elnur İbrahimovun üzərinə ümumilikdə 8 milyon manatlıq dələduzluqdan əldə olunan vəsaitlərin cüzi bir hissəsini ödəmək öhdəliyi qoyulub və o, 9 il müddətinə azadlıqdan məhrum edilib. Paradoks ondadır ki, Elnur İbrahimov həbsdə olduğu müddətdə mülki iddiaçı Fərman Məmmədova bir manat belə ödəməyib, mülki iddiaçı olmayan Elmira Axundovanın oğlu Həbib Axundova isə 55 min manat vəsait qaytarıb. Bu fakt açıq şəkildə göstərir ki, Elnur İbrahimov ödəmə qabiliyyətinə malik olub, lakin xüsusi məqsədlə boyun qaçırıb.

Onun əməlinin xüsusilə külli miqdarda dələduzluq kimi qiymətləndirilməsi zərərçəkmişlər və dövlət qarşısında məsuliyyətini labüd edir.

Xatırladaq ki, Elmira Axundova Ramiz Mehdiyev dövründə ona yazdığı donos məktubları, mədhiyyələri ilə tanınırdı. Bu işdə də onun adı mərkəzi fiqur olaraq qalır, Elnur İbrahimov isə onun qurduğu sxemlərin “günah keçisi” kimi önə verildiyi açıq görünür.

Mülki iddiaçı Fərman Məmmədov Elnur İbrahimovdan ona vurulmuş ziyanın ödənilməsini tələb edir və İbrahimovun ən müxtəlif yollarla məsuliyyətdən yayınması göz önündədir. Növbəti məhkəmə proseslərində Elnur İbrahimovun yenidən həbsi istisna edilmir.

E. MƏMMƏDƏLİYEV