Minillik tarixə malik Bakı bu gün estetik baxımdan deqradasiyaya uğrayır. - Tanınmış memar

“Bu bina indi eybəcər görünürsə, 30-50 ildən sonra...”

Paytaxtın mərkəzində tikilən yeni binalarla bağlı tənqidlər səngimək bilmir. Bu dəfə sərt və emosional münasibət tanınmış memardan gəlib. O, xüsusilə “Nəriman Nərimanov” metrosu ətrafında inşa olunan yeni tikili haqda ciddi narazılığını ifadə edib.

Məşhur memar Elçin Əliyevin sözlərinə görə, “Montin” adlanan ərazinin mərkəzində ucaldılan bu bina artıq bir neçə ildən sonra estetik baxımdan uğursuz görünür:

“Fasadlarda üslub xaosu hökm sürür, rəng seçimi zövqsüzdür, primitiv günbəz elementləri isə ətrafdakı klassik ‘stalinka’ memarlığı ilə tam ziddiyyət təşkil edir. Bu bina artıq bu gün eybəcər görünürsə, 30-50 ildən sonra hansı vəziyyətdə olacaq?” O, sual edir ki, bu cür layihələr necə olur ki, dövlət səviyyəsində təsdiq alır: “Necə olur ki, heç bir memarlıq kriteriyasına cavab verməyən layihələr Dövlət Şəhərsalma və Arxitektura Komitəsi tərəfindən təsdiqlənir? Doğrudanmı bu gün Bakının memarlıq siyasətini müəyyən edən şəxslər belə tikililəri müasir və gözəl hesab edir?”

Memar açıqlamasında şəhərin taleyindən narahatlığını gizlətməyib:

“Minillik tarixə malik Bakı bu gün estetik baxımdan deqradasiyaya uğrayır. Bu, sadəcə bir bina problemi deyil – bu, ümumi memarlıq zövqünün iflasıdır...”

Qeyd edək ki, son illər paytaxtda tikilən bəzi yeni binalar ictimaiyyət və mütəxəssislər arasında ciddi müzakirələrə səbəb olur. Tarixi memarlıq mühitinin qorunması, yeni layihələrin şəhərin ümumi siluetinə uyğunlaşdırılması məsələləri yenidən gündəmə gəlib. Musavat.com