Abşeron təhsili- zorlama,döyülmə, rüşvət faktları və cəzasızlıq

Sovet dövründə tərbiyə ilə bağlı ayrı-ayrı aspektlər üzrə müəllimlər qarşısında vəzifə qoyulurdu: vətənpərvərlik tərbiyəsi, əmək tərbiyəsi, mənəvi tərbiyə, estetik tərbiyə və sair. Hazırda da kurikulum adlanan təhsil proqramında məsələ qoyulur ki, məktəbin vəzifəsi şəxsiyyətyönümlü vətəndaş hazırlamalıdır. Amma çox təəssüf ki, şəxsiyyətyönümlü vətəndaş necə olmalıdır, necə hazırlanmalıdır bunun kriteriyaları işlənməyib. 
Bu mənada Abşeron rayonu xüsusi fərqlənir.Elə bir həftə yoxdur ki, mətbuat səhifələrində məktəblərdə bıçaqlanma, müəllimin şagirdi döyməsi hadisəsinə rast gəlinməsin. Amma bu məsələlər aşkar olunsa da, sosial şəbəkələrdə yayılsa da bununla bağlı məsuliyyətsizlik mövcuddur. Hələ eşitməmişik ki, baş verən belə bir faktla bağlı məktəb direktoru və ya müəllim işdən çıxarılsın, məsuliyyətə cəlb olunsun. Fakt öncə ört-basdır edilir, ona başqa don geyindirilir. Bir müddət sonra da məktəb direktoru, yaxud müəllim öz ərizəsi ilə işdən azad olunur. Yəni cəmiyyət nə hadisənin səbəbini bilir, nə günahkarı görür, nə də cəza tətbiqini”. 
Reportyor.org son illərdə Abşeron təhsilində baş verən ən qalmaqallı hadisələin xronologiyasını təqdim edir.

2 saylı məktəb-zorlama faktı

2014-cü ilin mart ayının 15-i tarixində məktəbin 11-ci sinfində oxuyan 3 oğlan uşağı (onların kimlikləri məlumdur, sadəcə olaraq qeyri-etik hadisə olduğundan adlarını çəkmirik -red.) 9-cu sinifdə oxuan 15 yaşlı qızı zorlayıblar.
Məlumatda deyilir ki, həmin hadisə bu gün ört-basdır edilir. Halbuki hadisəni törədən şəxslər Bakının Nəsimi rayonu ərazisində həbs olunublar və 19-cu polis bölməsinə gətiriliblər. Lakin sonradan 2 saylı məktəbin direktoru Ədalət Camalovanın müdaxiləsi ilə hər üç şagird sərbəst buraxılıb.
Məlumatı verən şəxs dia.az-a açıqlamasında iddia edirb ki, Ədalət xanımın bu hadisəyə müdaxilə etməsi bu iyrənc hərəkətin onun məktəbinin adına ləkə gətirməsi ilə əlaqədar deyil: «Sadəcə olaraq, həbs olunan, zorlamada ittiham olunan məktəblilərdən biri Ədalət xanımın yaxın qohumudur».
Mənbə iddia edir ki, bu işdə Abşeron rayon təhsil idarəsinin müdirəsi İradə xanım da maraqlı tərəf kimi çıxış edib, cinayət əməli törədən şagirdlərin buraxılmasında rol oynayıb: «Amma maraqlı burasıdır ki, hadisə barədə Abşeron rayon icra hakimiyyətinin başçısının məlumat almasının qarşısı müxtəlif üsullarla önlənilməkdədir. Yəni əgər RİH rəhbəri Zakir Fərəcov bundan xəbər tutarsa, dərhal cinayət işi açıla bilər. Halbuki məhz yerli təhsil şöbəsinin müdirəsinin və həmçinin məktəb direktorunun müdaxiləsi səbəbindən 19 saylı Polis Bölməsində iş qaldırılmayıb».
Sonradan Sumqayıt Apellyasiya Məhkəməsində Abşeron rayonunda 9-cu sinif şagirdi olan qıza qarşı seksual xarakterli hərəkətlər etmiş şəxslər barəsində olan cinayət işinə baxılıb. Hakim İlham Həsənovun sədrliyi ilə keçirilən prosesdə qəbul edilən qərara əsasən Elməddin Qədirli, Nicat Ağayev, Elşən Novruzov və Maqsud Şamiyev barəsində bəraət hökmü çıxarılıb. Onlar məhkəmə zalından azadlığa buraxılıblar.
Xatırladaq ki, Bakı Ağır Cinayətlər Məhkəməsində hakim Azad Məcidovun sədrliyi ilə keçirilən prosesdə Abşeron rayonu ərazisində orta məktəbin 9-cu sinif şagirdini zorlayıb, əməllərini videokamera ilə lentə alaraq, qızı bu vasitələrlə şantaj edən şəxslərin hər biri 5 il 6 ay müddətinə azadlıqdan məhrumetmə cəzasına məhkum edilmişdi. Təqsirləndirilən şəxslərin barəsində başqa yerə getməmək haqda verilən qətiimkan tədbiri ləğv edilib və onlar məhkəmə zalındaca həbs ediliblər.


Döyülmə


Bu il yanvar ayının əvvəlinə Azərbaycanda müəllim zorakılığını əks etdirən daha bir video yayıldı. Döyülmə faktı Abşeron rayonu, Xırdalan şəhəri 9 nömrəli məktəbdə qeydə alınmışdı. 
Məktəbdə ibtidai sinif müəllimi dərs başa saldığı qız şagirdin başına zərbə endirir. Daha sonra onu təhqir edərək yerinə oturmasını deyir. Müəllimə heç bir cavab verməyən balaca qız sakitcə parta arxasına keçir. Həmin hadisəni kənardan şagirdlərdən biri videoya çəkmişdi. 
Hadisə böyük qalmaqala səbəb oldu. "İctimai Problemlərin Tədqiqi” Sosial Fondunun rəhbəri Məhərrəm Zülfüqarlı isə deyib ki, inkişaf etmiş ölkələrin qanunvericiliyinə əsasən, insan haqlarını, o cümlədən uşaq hüquqlarını pozan şəxslər cinayət məsuliyyətinə cəlb olunur. Hətta bəzi ölkələrdə nəinki müəllim, hətta valideynlər belə öz uşaqlarına cəza verə bilməz. Bu baxımdan, əgər uşaq şikayət edərsə, valideyn məhkəməyə cəlb oluna bilər. Azərbaycanda isə bu məsələ ilə bağlı müəyyən problemlər var. Baş verən son hadisə bir daha bu faktı sübuta yetirib.
Qeyd edək ki, hadisə ilə bağlı sosial şəbəkələrdə yayılan videogörüntü Təhsil Nazirliyinin Daxili nəzarət şöbəsində məktəbin direktoru Həcər İbrahimova və ibtidai sinif müəllimi Sevda Rüstəmovanın iştirakı ilə araşdırıldı.
Baş vermiş hadisənin məktəbin əsas qərarverici orqanı olan Pedaqoji Şurada müzakirə edilməsi və müvafiq qərarın şura üzvləri tərəfindən verilməsi tövsiyə olundu. Sonucda isə müəlliməyə sadəcə töhmət verildi. 


Məktəb, yoxsa bazar..? 


Sonuncu qalmaqallı hadisə isə lap bu yaxınlarda baş verib ki, həmən hadisə də həm sosial şəbəkələrdə,həm mətbuatda geniş müzakirə edildi. Söhbət 10 saylı məktəbdə bayramla bağlı uşaqlardan pul yığılması ilə bağlı idi. İlqar Qulusoy adlı valideynin sosial şəbəkədə yazdığı status geniş əks-sədaya səbəb oldu :
“8 martla əlaqədar şagirdlərdən 20 manat pul yığıb 8 mart şənliyi keçirdiblər. Bunun təhsilə nə əlaqəsi var? Azyaşlı uşaqlara 8 mart şənliyinin keçirilməsi nə verir?
Zatən valideynlər azı 30 man müəllimlərə şirinlik veriblər. Əlavə olaraq 20 man pul verib tədbir keçirmək....
Novruz bayramı ərəsəində 30 manat novruz şənliyi üçün pul yığılır. Başa düşə bilmirəm kosa keçəl hollivuddan gəlir?
Uşağın nəyinə lazımdır bu tədbir? Bəyəm yuxarı sinif uşaqlarını cəlb edərək kosa keçəl edib onların aktyorluq qabiliyyətlərini artırmaq olmazmı?
Əlavə olaraq hər bir uşaq üçün 5 manat pul tələb olunur. Novruz xonçası üçün. Uşaq müəllimə deyir ki mamam xonça bəzəyib gətirəcək. sinif rəhbəri deyir lazım deyil 5 manat gətirin özümüz alacağıq..... 2 ci sinif uşağı ilə müəllimə arasında dialoqa baxın...
Test pulu , lövhədə yazmaq üçün marker alınması...
Bununla hansı təhsildən danışmaq olar?
Abşeron gənclər şəhərciyində yerləşən bu məktəb ödənişli mədəniyyət evinə çevrilib. Valideynlər var hələ evinə 100 qram qoz ala bilməyib amma borc tapıb uşağına verir ki sinifdə seçilməsin. adamlar tanıyıram ışıqları kəsilib borca görə qaranlıqda otururlar. Amma dilənib məktəbə pul verirlər.
Bu ölkədə qayda qanunlar yoxdurmu?
Hara baxır təhsil nazirliyi
Hara baxır Abşeron icra hakimiyyəti?”  
Ardı var..  reportyor.org

   NUH.az