Cüdoçu-alim-pedoqoq-icra başçısı Asif Əsgərov

 İcra başçılarının bir çoxunun tərcümeyi-halı maraqlı araşdırma mövzusudur. Bu məsələdə  Nəsimi Rayon İcra Hakimiyyətinin  başçısı cənab Asif  Əsgərov da istisna deyil.

İxtisasca  idmançı-cüdoçu olan  Asif  Əsgərov  müəyyən vaxtdan sonra  ölkə  paytaxtı  Bakının strateji rayonu Səbailə başçı təyin olunub. Sözün düzü, icra başçının təyinatı ölkə başçısının müstəsna səlahiyyətində olduğu üçün müzakirə açmaq fikrində deyilik. Ancaq istənilən sferada olduğu kimi icra başçısı  təyinatında da müəyyən meyarlar, qaydalar  olmalıdır. Eyni məntiqlə sabah  hansısa  ştanqisti də icra başçısı təyin etmək olar. Həqiqətən də, bu gün xeyli sayda  keçmiş kafe müdiri, daş karxanasının, çınqıl  sexinin rəisi, “kooptorq” müdiri  icra başçısı vəzifəsində çalışır.

Mən hələ istefaya göndərilmiş polis rəsilərinin bir anda hansısa rayonun “Qaz idarəsi”nə, yaxud “İşıq idarəsi”nə rəsi təyin olunmaqlarını demirəm. Bir soruşan yoxdur ki, keçmiş polis rəisi hara, qaz, işıq, su idarəsi hara..?

Ümumiyyətlə, polis işçilərini  məişət sferalarına təyin edəndə o öz peşəsinə uyğun olaraq hamıya potensial cinayətkar kimi baxır... Məşhur alim Lütfizadə demişkən, əlində çəkic varsa, hər şey sənə mismar kimi görünəcək...

Sözün qısası, kadr məsələsi hər bir ölkə üçün həssas məsələdir. Mən başa düşürəm ki, gənc dövlətik, oturuşmuş kadr korpusumuz  hələ yoxdur və s. Amma ...

Digər  vacib məqamlardan biri də odur ki, bizim bir çox  məmurlar  elmi-pedoqoji fəaliyyətlə məşğul olur, elmi əsərlər, məqalələr yazır, müdafiə edirlər.

Asif  Əsgərovun tərcümeyi-halında da qeyd olunub ki:” Elmi-pedaqoji fəaliyyətini davam etdirir. Elmlər namizədi, idman ustasıdır. Azərbaycan Cüdo Federasiyasının I vitse-prezidentidir”.  

Vaxtilə  Heydər Əliyev cənabları  yalançı məmur-alimlik məsələsinə son qoumuşdu. Əlbəttə kiməsə elmi-pedoqoji fəaliyyətlə məşğul olmağı qadağan etmək olmaz. Ancaq görəsən icra başçısı o boyda məsuliyyətli  işdən necə vaxt tapıb  elmi əsər yazır, kitab çap etdirir?

Deməli, belə məmurlar hər sahədə yarımçıqdırlar, yəni nə məmur  işinə, nə də elmi fəaliyyətə məsuliyyətlə yanaşırlar.

NUH.az-ın baş redaktoru  Kamran Məhərrəmli