İşə düzəlmək üçün 170 min verən şəxs Hicran Hüseynova ilə üzləşmək istəyir - PREZİDENTƏ MÜRACİƏT

Bakı şəhər sakini Eynur Kərimovun 170 min dollarının Ailə, Qadın və Uşaq Probemləri üzrə Dövlət Komitəsinin rəsmiləri tərəfindən mənimsənilməsi ilə bağlı qalmaqal daha da böyüyür. Bir müddət əvvəl Ailə, Qadın və Uşaq Problemləri üzrə Dövlət Komitəsinin sədri Hicran Hüseynova ilə üzləşməsini tələb edən Eynur Kərimov bu dəfə ölkə başçısına yazılı müraciət edib.

Cebhe.info xəbər verir ki, Eynur Kərimov prezidentə ünvanladığı məktubda prezidentin istintaqın düzgün aparılması və bu gün onu görmədiyini, tanımadığını iddia edən komitə sədri Hicran Hüseynova ilə üzləşməsini təmin etmələri üçün hüquq-mühafizə xidməti orqanlarına göstəriş verməsini istəyib:

“Hörmətli president, mən Qubadlı rayonundan məcburi köçkünəm. Ziyalı ailəsində doğulmuşam. Ailədə 7 uşağıq və hər birimiz ali təhsilliyik. Bu günədək ailə üzvlərimdən heç kim cinayət məsuliyyətinə cəlb olunmayıb. Hər zaman dövlətimizə və dövlətçiliyimizə sadiq olmuşuq. 1990-1993-cü illərdə doğma torpaqlarımızın müdafiəsinə qalxan könüllülərdənəm. Mənim iki ali təhsilim var. APU-nu Riyaziyyat və DİA-nın Rəhbər kadrların ixtisasının artırılması fakultələrini bitirmişəm. 1993-cü ildən dövlət tərəfindən məcburi köçkünlər üçün nəzərdə tutulan orta aylıq əməkhaqqı alıram. 2012-ci ilin yaz aylarında Ailə, Qadın və Uşaq Problemləri üzrə Dövlət Komitəsində Aparat rəhbəri işləyən Səfər İmanovla tanış oldum. O, çalışdığı komitənin sədri Hicran Hüseynovanın yaxın qohumu olduğunu və onun vasitəsi ilə işə adam düzəltmək iqtidarında olduqlarını bildirdi.

İki təhsilim olduğunu və işləmədiymi bildikdə mənə də köməklik edə biləcəklərini söylədi. Uzun illərdir işləmədiyim üçün məndə də işə düzələ biləcəyimə dair bir ümid yarandı. Mən Bakı şəhəri üzrə və Bakı şəhəri ətrafında müvəqqəti məskunlaşan rayonlardan birinin icra hakimiyyətlərində kiçik bir işdə işləmək arzusunda olduğumu söylədim. Səfər İmanov mənimlə bağlı Hicran Hüseynova ilə danışacağını bildirdi. Mən CV-mi Səfər İmanova verdim. Bir müddət sonra Səfər İmanov mənimlə əlaqə saxlayaraq H.Hüseynova ilə danışdığını, istəyimi ona bildirdiyini söylədi. Qeyd etdi ki, H.Hüseynova mənim şəxsi işimlə tanış olub və məni arzusunda olduğum işə deyil, Bakı şəhəri üzrə rayonlardan birinə icra başçısının müavini vəzifəsinə təyin etdirə biləcəyini söyləyib. Bunun qarşılığında isə məndən 170 min ABŞ dolları istəyib”.

Şikayətçi məktubunda bildirir ki, ilk öncə o Səfər o ona gələn iş təklifindən tərəddüd edib. Qeyd olunan işdə işləmək üçün təcrübəsi olmadığını bildirib:

“Səfər İmanov işləyəcəyim dövrdə heç bir çətinliyim olmayacağını, Hicran Hüseynovanın mənə dəstək olacağını bildirdi. Bu danışıqdan sonra məndə əminlik yarandı və deyilən pulu topladım. 2012-ci ilin iyun ayında 170 min ABŞ dollarını götürüb AQUPDK-ya getdim. Komitə sədri Hicran Hüseynova Aparat rəhbəri Səfər İmanovla birlikdə məni qəbul etdi və məndə özü tərəfindən təklif olunan işə düzəldə biləcəyinə, gələcək fəaliyyətimdə heç bir çətinlik çəkməyəcəyimə, hər zaman mənə dəstək olacağına dair əminlik yaratdı. Apardığım pulu Səfər İmanova verdim. O da pulu mənim gözlərim qarşısında Hicran Hüseynovaya verdi. İki il “bu gün, sabah” deyə-deyə məni aldatdılar. İki ildən sonra verdiyim pulu geri istədim. Onda da “bu gün, sabah” təkrarlandı. Dörd ildir ki, verdiyim pulu geri ala bilmirəm.

Məsələ ilə bağlı bu ilin fevral ayında hüquq-mühafizə xidməti orqanlarına müraciət etmişəm. Hicran Hüseynova ümumiyyətlə məni görmədiyini, tanımadığını deyir. Ancaq mənim 170 min ABŞ dollarını Səfər İmanov vasitəsi ilə Hicran Hüseynovaya verdiyimi və dəfələrlə onun qəbulunda olduğumu təsdiqləyən sübutlarım var. Səfər İmanov özü də bunu təsdiqləyir. (Səfər İmanov komitə sədrinin hədə-qorxularına görə 4 azyaşlı uşağı və həyat yoldaşı ilə birgə bu ilin yanvar ayında ölkəni tərk edib. Səfər İmanova göstərilən təyziq və təsirin hansı həddə olduğunu, oğlunun başına Hicran Hüseynova tərəfindən gətirilən oyunlardan dolayı komaya düşərək dünyasını dəyişən atası Bəbir İmanovun dəfnində belə iştirak edə bilməməsi açıq-aydın göstərir. Səfər İmanov ölkəni tərk etdiyi zaman atası Bəbir İmanov komada olub. O, fevralın əvvəlində dünyasını dəyişib)”.

Eynur Kərimov müraciətində onu da bildirir ki, bu gün Hicran Hüseynova hansı yolla olursa-olsun bu məsələni bütövlükdə sabiq Aparat rəhbəri və yaxın qohumu olan Səfər İmanovun üstünə atmağa, özünün bu məsələdə cavabdeh olmadığını göstərməyə çalışır:

“Xahiş edirəm istintaqın düzgün aparılması və bu gün məni görmədiyini, tanımadığını iddia edən komitə sədri Hicran Hüseynova ilə üzləşməmi təmin etmələri üçün hüquq-mühafizə xidməti orqanlarına göstəriş verəsiniz”. Qeyd edək ki, vətəndaş Eynur Kərimov 170 min ABŞ dollar məbləğində vəsaiti Ailə, Qadın və Uşaq Problemləri üzrə Dövlət Komitəsinin (AQUPDK) sabiq Aparat rəhbəri Səfər İmanova rayon icra hakimiyyəti başçısının müavini vəzifəsinə təyin olunması üçün verdiyini bildirib. Səfər İmanov 1 noyabr 2015-ci ildə AQUPDK-nin Aparat rəhbəri vəzifəsindən azad edilib.  Alçina

  NUH.az