“Bina qəsdən yandırılıb” - Sakinlər prezidentə müraciət etdi

Ötən il mayın 19-da Binəqədidə yanğın baş verən binanın sakinləri prezident İlham Əliyevə müraciət ediblər.

“Qafqazinfo” müraciətin mətnini təqdim edir:

Möhtərəm  Prezidentimiz !

2015-ci ilin may ayının 19-da Bakı şəhəri, Azadlıq prospekti 200/36 ünvanda 16 mərtəbəli yaşayış binasında baş vermiş yanğın hadisəsi nəticəsində həm mənəvi, həm də maddi ziyana məruz qalmış sakinlər olaraq sizə müraciət edirik.

Hadisədən bir il yarım müddət keçib. Sağ olsun Dövlətimiz və Prezidentimiz, hadisə nəticəsində bizə dəyən maddi ziyan müəyyən qədər ödənildi. Lakin mənəvi təskinlik və rahatlıq hələ də tapa bilmirik. Çünki bu yanğın hadisəsini törədənlər və bizə bu faciəni yaşadanlar müəyyən olunmadı və məsuliyyətə cəlb edilmədi. İndi bu faktla bağlı məhkəmə araşdırması gedir. Müttəhimlər kürsüsündə mənzil istismar sahəsinin müdiri, binanı üzləyən şirkətlə bağlılığı olan şəxslər, hətta Binəqədi rayon İcra Hakimiyyəti Başçısının müavini oturub. Biz məhkəmə iclaslarında oluruq. İnanmaq istəyirik ki, həqiqətən də hadisədə günahkar şəxslər bunlardır. Lakin sağlam məntiq və düşüncə bu inamı qırır. Bina 3-5 dəqiqə ərzində alışıb yandı. Bizi inandırmaq istəyirlər ki, guya, hansısa müəyyən olunmayan bədnamın bilməyərəkdən atdığı siqaret kötüyü bu binanı alışdırdı. Biz bu fərziyyəyə necə inanaq? Məgər təsadüfən atılan bir siqaret bu binanı o sürətlə, bomba partlayışına oxşar şəkildə alışdıra bilərdi? Biz yanğın mütəxəssisləri deyilik, lakin kifayət qədər savadımız, ağlımız, həyat təcrübəmiz var. Yanğın da görmüşük, tonqal da alışdırmışıq, samovar da qalamışıq. Lakin hər hansı yandırıcı mayenin, benzinin, neftin köməyi olmadan nəyinsə, hətta bayramlarda yandırmaq üçün hazırladığımız tonqalın belə bu cür sürətlə alışdığını görməmişik. Qaldı ki,16 mərtəbəli bina ola…

Möhtərəm Prezidentimiz! Bu bina öz-özünə yanmadı, onu yandırdılar. Ağlımızın və məntiqimizin qəbul etdiyi budur. Kim yandırdı, niyə yandırdı biz bunu bilmirik. Məhkəmədə bununla bağlı müəyyən fərziyyələr söylənilir. Bəziləri inandırıcıdır. Görünür ki, bu faktla bağlı obyektiv, hərtərəfli araşdırma aparılmayıb. Hadisənin ilk günündən yaşadığımız sarsıntı bizə hadisələri düzgün təhlil etməyə mane oldu. Bizə yanğının səbəbi barədə əsassız fikirləri qəbul etdirməyə çalışdılar. Guya, bütün günahlar üzlük materialda imiş. Lakin araşdırdıq ki, bu material bütün dünyada tətbiq olunur, həm də öz-özünə alışıb yana bilməz. Bütün tikinti materialları yanandır, amma yandırmasan yanmaz. Biz binanı yandıranın müəyyən olunmasını istəyirik. Yəqin bilirik ki, bu bina qəsdən yandırılıb. Əks halda bir siqaret kötüyü bu dəhşətli yanğını törədə bilməz. Buna inanmırıq və inanmayacağıq.

Möhtərəm Prezidentimiz! Siz bizim ümid yerimiz, ədalət məbədimizsiniz. Yaşadığımız faciənin səbəbkarının tapılmasını xahiş edirik. Lakin bu gün məhkəmə qarşısına çıxarılanlar bu hadisənin təqsirkarları deyil. Biz bu istintaq oyununa son qoyulmasını və binanı qəsdən yandıranların aşkar edilib məhkəmə qarşısına çıxarılmasını sizdən xahiş edirik. Və eləcə də biz sakinlərə dəymiş maddi və mənəvi zərərin, istintaqın gedişatı zamanı bizə verilmiş vədlərin yerinə yetirilməsini bir daha sizdən xahiş edirik”.

Qeyd edək ki, sözügedən yanğın nəticəsində 15 nəfər ölüb, 50 nəfər xəsarət alıb.

Hadisə ilə əlaqədar “QlobalStone” MMC-nin baş direktoru Bəşirov Uğur Firuz oğlu, “Global Construction” MMC-nin təsisçisi və idarə heyətinin sədri Mahmudov Miryusif Mircəfər oğlu, həmin cəmiyyətin İdarə Heyətinin sədr müavini Əsgərov Ələkpər İldırım oğlu, Binəqədi rayon İcra Hakimiyyəti başçısının sabiq birinci müavini Novruzov Qəzənfər Məhərrəm oğlu, 2012-2013-cü illərdə Binəqədi rayon Mənzil Kommunal Təsərrüfat Birliyinin rəisi işləmiş rayon İcra HakimiyyətininTəsərrüfat şöbəsinin müdiri Rəcəbov Ədalət Şəmsəddin oğlu, Binəqədi rayonu, 72 saylı Mənzil Kommunal İstismar Sahəsinin rəisi Orucov Nizami Qara oğlu Cinayət Məcəlləsinin 225.2 (yanğın təhlükəsizliyi qaydalarını pozma ehtiyatsızlıqdan zərərçəkmiş şəxsin ölümünə və digər ağır nəticələrə səbəb olduqda) və 308.2-ci (vəzifə səlahiyyətlərindən sui-istifadə ağır nəticələrə səbəb olduqda) maddələri ilə, “poliuretan” məmulatlarının sınaq yoxlamalarını keçirən “Dərnəgül Boru Zavodu” Qapalı Səhmdar Cəmiyyətinin sınaq laboratoriyasının müdiri Məmmədov Ağacavad Hacı oğlu Cinayət Məcəlləsinin 308.2 və 313-cü (vəzifə saxtakarlığı) maddələri ilə, “poliuretan” məmulatlarına dair texniki şərtləri razılaşdırmış Səhiyyə Nazirliyinin Gigiyena və Epidemiologiya Mərkəzinin baş direktoru Əlibəyov Akif Muradəli oğlu Cinayət Məcəlləsinin 308.2-ci maddəsi ilə təqsirləndirilən şəxs qismində cəlb olunaraq onlara həmin maddələrdə nəzərdə tutulan ittihamlar elan edilib.

A.Əlibəyov və A.Məmmədov barəsində isə həbs qətimkan tədbiri seçilməyib.

  NUH.az