Qurban Allaha yaxınlaşmaqdır…

“Qurban” sözünün lüğəti mənası “yaxınlaşmaq” deməkdir. 
Qurban - bəndənin Allaha hər şeyi ilə, ağlı ilə, düşüncəsi ilə, niyyəti ilə, əməli ilə, ruhu ilə, varlığı ilə yaxınlaşmasıdır. Və ən əsası həmişə qurban düşüncəsi içində qalmasıdır.
Müsəlman bir heyvanı qurban kəsməklə əslində özü qurban olur. Heyvan vasitədir, qurban olan, yəni Allaha yaxınlaşan qurban kəsənin özüdür.
Qurban, yəni qulun Allaha yaxınlaşması qul üçün mənəvi yüksəliş yoludur. Qurban vermək hissi insanlığın fitrətində var. Demək olar ki, bütün dinlərdə Allah üçün qurban vermək anlayışı var. Ən gözəl və ən xeyirli qurban anlayışı isə İslamın əmr etdiyi qurbandır.
Qurban - insanı dünyanın cazibəsindən, dünyəviləşməkdən qurtaran ibadətdir. Qurban şüuru - malın, mülkün, hər şeyin Allaha məxsus olduğunu öz ruhunda təsdiq etmək və Allahın verdiyindən Allahın rizasına, yəni sevgisinə, rəğbətinə nail olmaq üçün Onun ehtiyac sahibi olan bəndələrinə verməkdir.
İslam terminoloğiyasında “müqərrəb” adlanan bir söz var. Bu söz müəyyən mənəvi dərəcəyə yüksəlmiş, Allaha yaxınlaşmış möminlər haqqında deyilir.
Allaha yaxınlaşmaq, əlini, ayağını, dilini, gözünü, qulağını, ağlını, iradəsini, istəyini, hisslərini özününkü deyil, Allahın əmanəti kimi görməkdir. Bu şüurla yaşamaq Allaha təslimiyyətin ən gözəl nümunəsidir, hər cür günahdan qurtulmağın ən etibarlı rəhnidir və nəhayət, öz istəklərini deyil, Allahın istəklərini öz həyatında rəhbər tutmaqdır.
Qurban - təkcə heyvan kəsmək deyil, bəndənin Allaha yaxınlaşmaq niyyəti ilə işlədiyi hər bir əməl qurbandır.
Qurban Bayramı atmosferindəyik. Qurbanlar kəsiləcək, evlərdən evlərə paylar gedəcək. İnsanlar bir-birilərinə dəyər verəcəklər: verən alana, alan verənə dəyər verəcək…
Kəsilən heyvan onda qurban vasitəsi, qurban yolu olur ki, onu kəsənin niyyəti Allaha yaxınlaşmaq olur.
Allah bizə qurban şüuru nəsib etsin. Qurban zövqünü yaşayanlar qurban şüuru içində olanlardır…

Murad Məmmədov