Daha ağır addım atılmamalıdır – Davutoğludan İmamoğlunun həbsinə etiraz

“İBB Bələdiyyə sədri Əkrəm İmamoğlunun həbsi hüquqi prosesin deyil, siyasi mühəndisliyin nəticəsidir”.

Yeniavaz.com xəbər verir ki, bunu sosial şəbəkə hesabında Türkiyənin Gələcək Partiyasının sədri Əhməd Davutoğlu yazıb.
Ölkənin sabiq baş naziri bildirib ki, öz nazirləri, bürokratları, siyasətçiləri və bələdiyyə sədrləri barədə son dərəcə açıq-aşkar korrupsiya iddiaları ilə bağlı barmağını belə tərpətməyən avtoritar hakimiyyət təkcə seçilmiş bələdiyyə sədrini deyil, onu seçən milyonlarla seçicini də cəzalandırır:
“28 Fevral post-modern çevrilişində, 17-25 dekabr və 15 iyul tarixlərindəki 367 elektron memorandumda hamımızın yüksək səslə müdafiə etdiyimiz və platformalara adını verdiyimiz “milli iradə” anlayışının bu şəkildə zədələnməsi hakimiyyətin korrupsionerləşməsinin ən parlaq təzahürlərindən biridir. Biz o qara günlərdə seçicilərin milli iradəsini qətiyyətlə müdafiə etdiyimiz kimi, bu gün də milli iradəyə məhəl qoymayan istənilən praktikaya eyni prinsipial qətiyyətlə qarşıyıq.
Öz quruculuq prinsiplərini pozan iqtidardakıların Türkiyənin beynəlxalq nüfuzuna xələl gətirən bu anti-demokratik əməllərə əl atmalarının, TCMB-nin ehtiyatlarını tükəndirməyə qədər getmələrinin və bunun bədəlini millətin yoxsullaşması ilə ödəyən iqtisadi itkilərin səbəbi korrupsiya sistemini itirmək qorxusundan başqa bir şey deyil.
Bu qeyri-qanuni qərardan sonra İstanbul Böyükşəhər Bələdiyyəsinə müvəkkil təyin edilməsi kimi daha ağır bir addım atılmamalıdır. Siyasi rəqabət öz təbii demokratik zəminində davam etməli və siyasi mühəndislik səylərinə son qoyulmalıdır.
Biz avtoritar rejim strukturlarına qarşı hakimiyyət bölgüsü prinsipini qətiyyətlə müdafiə etməyə, siyasi korrupsiyaya və çirklənməyə qarşı siyasi mənəvi mübarizəmizi güzəştə getmədən davam etdirəcəyik”.
Xatırladaq ki, daha öncə İstanbul Böyükşəhər Bələdiyyəsinin sədri Əkrəm İmamoğlu maliyyə cinayətlərinə görə həbs edilib. İmamoğlunun aparıldığı məhkəmə binasının qarşısına gecədən xeyli vətəndaş toplaşıb.