İndi Rusiya ilə bağlı bitərəf qalmaq, bişərəf qalmaqdır - GÜNDƏM SÖHBƏTİ

Azərbaycanın mülki təyyarəsinin Qroznı səmasında vurulmasından sonra Rusiya-Azərbaycan münasibətlərində yaranmış soyuqluq davam edir. Kremlin müəmmalı sükutunun ardınca Rusiyadan Azərbaycanın beynəlxalq hüquqa istinad etdiyi tələblərinə qarşı müxtəlif səviyyələrdə təhdidlər edilir. Ekspertlərin sözlərinə görə, Rusiya Azərbaycandan təyyarə məsələsində hansısa güzəşt etməsini istəyir və təzyiq-təhdidlə Bakını razı salmaq xəttini izləyir. Kremlin “körpüləri yandırmaq” siyasəti qarşıdurma motivinin görünəndən daha dərin olduğu, təkcə təyyarənin vurulması ilə yekunlaşmadığı versiyasını ön plana çıxarır. Rusiyanın miqrant kartını işə salması da pərdəarxasında başqa nüansların olduğu ehtimalını gücləndirir.

 Rusiyanın postsovet məkanına nəzarəti gücləndirmək istəyi də burada önəmli rol oynayır. Gərginləşən Rusiya-Azərbaycan münasibətləri ilə bağlı "Sherg.az"ın suallarını cavablandıran millət vəkili, Böyük Azərbaycan Partiyasının sədri Elşad Musayev deyib ki, Moskvanın niyyəti ortadadır və məqsədi bəllidir. Deputat vurğulayıb ki, Rusiya tarix boyu olduğu kimi yenə imperiya ambisiyalarından çıxış etməkdədir... 

- Rusiya Azərbaycanı öz təsir dairəsində görmək istəyir. Moskva istəyir ki, sovet dönəmində olduğu kimi indi də Azərbaycan hakimiyyəti ancaq onun dedikləri ilə oturub-dursun. Kremlin bu yanaşması, sadəcə, Azərbaycanla bağlı deyil, bütün postsovet ölkələrinə, MDB dövlətlərinə baxış eynidir. Əsas məsələ budur. Rusiya ilə Azərbaycan arasında imzalanmış strateji müttəfiqlik sənədi də zərurətdən doğan bir addımdır. Rusiya heç vaxt Azərbaycanın strateji müttəfiqi ola bilməz. Çünki Rusiyanın dövlətçilik fəlsəfəsi, işğalçılıq və imperiya ambisiyaları Azərbaycanla strateji müttəfiqliyi qəbul etmir. Rusiya öz siyasətini ərazilərinin, təsir dairəsinin genişləndirilməsi üzərində qurur. Moskva Cənubi Qafqaz bölgəsini də öz təsir dairəsində görür. Eyni zamanda hazırda sanksiyalar altında olan Rusiya öz qazını, enerji resurslarını Azərbaycan əliylə satmaq istəyir. Həmçinin, məhz bizim vasitəmizlə Ermənistanda hakimiyyət dəyişikliyi etmək, Paşinyanı devirmək niyyəti güdür. Təbii ki, müstəqil siyasət yeridilən Azərbaycan Rusiyanın diktəsinə boyun əymir və əyməyəcək. 

 - Azərbaycandakı bütün rus məktəbləri bağlanmalıdır. Niyə başqa dövlətin dilində Azərbaycanda xüsusi məktəblər açılmalıdır? Rusiya üçün ayrıca nəsil, agentura şəbəkəsi, rus qafalı insanlar yetişdiririk? Başa düşmürəm, hansı səbəbdən Rusiyaya kadr yetişdirməliyik? 320 rus məktəbi niyə olmalıdır? Yığışdırmalıyıq bunu. Məmurlar, siyasətçilər, partiya sədrləri, dövlət orqanlarında çalışanlar arasında rus dilində danışanlar var. Kiçiklik, natamamlıq kompleksindən xilas olmalıyıq. Kim uşağının rus dilində təhsil almasını istəyirsə, pullu özəl məktəblərdə oxutsun. Bu məsələdə açıq mövqeyimizi ortaya qoymalıyıq. Rusiyanın Azərbaycanda, Orta Asiyada agentura şəbəkəsi var. Yeri gələndə həmin agentura şəbəkəsi vasitəsilə vəziyyəti öz xeyrinə dəyişməyə cəhd edir. Bunlara qarşı da tədbirlər görməliyik. 

- Azərbaycanın gələcəyi də, strateji müttəfiqi də Türkiyə və Türk dünyasıdır. Əsas istiqamətimiz bu olmalıdır. Fikir verirsizsə, zaman-zaman qardaş ölkə ilə aramızda soyuqluq, qarşıdurma yaratmağa cəhd edənlər olur. Rusiyanın Azərbaycandakı agentura şəbəkəsi sosial şəbəkələrdə, bəzi saytlarda buna nail olmaq üçün ciddi iş aparırlar. İndiki halda Azərbaycana qarşı açıq təhdid var. Təyyarəmizi də qəsdən vurublar. Faktlar da bunu təsdiqləyir. Rusiyaya qarşı aydın mövqeyimizi ortaya qoymalıyıq. Amma bu, söyüş və təhqirlə olmamalıdır. Ömür boyu ruslara yaltaqlananlar indi Rusiya əleyhinə yekə-yekə danışırlar, söyüş söyürlər. Belə olmur axı. Rusiya qaba, kobud, işğalçı dövlət olsa da, qonşuluğumuzda yerləşir. Hər zaman çalışmışıq ki, münasibət normal məcraya yönəlsin. Ancaq indiki halda dövlətçiliyimiz bizdən tələb edir ki, hamı vahid mövqedə olsun. Azərbaycan siyasətində olan adamlar iqtidarlı-müxalifətli Rusiyanın təzyiq və təhdidinə qarşı durmalıdır. Bu məsələdə fürsətçilik eləmək olmaz. Bir məqamı qeyd edim. Növbədənkənar seçkilər keçiriləndə bunun önləyici tədbir olduğunu söylədim. Əgər növbədənkənar prezident seçkisi keçirməsəydik, Ukrayna cəbhəsində vəziyyəti yüngülləşən Rusiya görün, indi hansı hoqqalardan çıxırdı? Ukrayna ilə müharibə Moskvanın başını qatır. Rusiya perspektivdə çalışacaq ki, Qazaxıstan, Özbəkistan və Gürcüstanda da aranı qarışdırsın. Yeni dünya düzəni qurulur və beynəlxalq hüquq işləmir. Ona görə də hamı daxildə sabitliyin qorunmasına çalışmalıdır. 

- Azərbaycanlılar da daxil olmaqla Rusiyadakı miqrantların çoxu rus vətəndaşıdır. Müxtəlif sahələrdə çalışan miqrantlarımız, o cümlədən xeyli sayda tanınmış iş adamlarımız Rusiya iqtisadiyyatına böyük töhfə verirlər. Ancaq bəlli deyil ki, onların böyük hissəsi hazırda hansı mövqedədir. Ona görə miqrant məsələsi ilə bizi qorxutmaq olmaz. Müəyyən qisim soydaşımız öz ölkəsinə geri dönəcəksə, onların iş problemini həll etmək lazımdır. Şükür ki, iqtisadiyyatımız çoxşaxəlidir. Rusiyadan iqtisadi asılılığı mümkün qədər azaltmalıyıq. Çünki Rusiya etibarsız qonşudur. 

- Hamı bilir ki, Rusiyanın agentura şəbəkəsi var. İllərdir Rusiyadan ötrü özlərini öldürürlər, təəssübkeşlik edirlər. Siz mətbuatsınız, ifşa edin onları. Niyə mediamız həmin şəxslərə tribuna verir? Sadəcə Rusiyanın deyil, Qərbin də, İranın da agenturası var. KİV-lərdə at oynadırlar. Bizim üçün fərqi yoxdur, hansı ölkənin agenti olursa-olsun, hamısı təhlükəlidir. 

- Onlar saxta millətçi, türkçüdür. Əsl millətçi bizik. Azərbaycanın milli mənafeyinə illərdir xidmət edirik. Heç nədən çəkinmirik, haqq bildiyimizi deyirik. Bir daha deyirəm, heç kəslə şəxsi düşmənçiliyimiz yoxdur. Lakin indiki dönəmdə açıq-aşkar Rusiya lehinə danışmaq nə deməkdir? Millətə meydan oxumaqdır. Belə halda susmaq olmaz. İndi bitərəf qalmaq, bişərəf qalmaqdır. Qürurumuzu, sifətimizi, mövqeyimizi qoruyub saxlamalıyıq. 

- Millət vəkili və partiya sədri olaraq özümə cavabdehəm. Bəziləri "günah keçisi" kimi Parlamenti görürlər, hücum etmək üçün bəhanə axtarırlar. Mən Parlament adından danışa bilmərəm. Əgər məsələ Milli Məclisdə müzakirəyə çıxarılarsa, sözümü deyəcəm. Onsuz da müstəqil şəkildə fikirlərimi açıq söyləyirəm, mövqeyimi ortaya qoyuram. Hər sahədə rusmeyilli adamlar var. Kim ortaya açıq mövqe qoymursa, cəmiyyət özü ona qiymət verməlidir. Qısası, Rusiya Azərbaycanın güclənməsini istəmir. Ona görə də Azərbaycanın gələcəyini Türkiyə ilə daha sıx əməkdaşlıqda görürük.