YAP yenə qabaqladı - 8071 NƏFƏR üçün seçki

İndiyədək təxminən 10 siyasi partiya, o cümlədən Müsavat və REAL bələdiyyə seçkilərində iştirak edəcəyini bildirib

Prezident İlham Əliyev “Bələdiyyələrin statusu haqqında” və “Bələdiyyələrin fəaliyyətinə inzibati nəzarət haqqında” Azərbaycan Respublikasının qanunlarında dəyişiklik edilməsi barədə"  fərman imzalayıb.

Bu fərmana əsasən, yeni seçilən bələdiyyənin ilk iclası Mərkəzi Seçki Komissiyası tərəfindən bələdiyyə seçkilərinin yekunları elan edildikdən sonra beş iş günü müddətində keçiriləcək.

Bələdiyyənin ilk iclasında bələdiyyənin sədri seçilənədək yaşı daha çox olan üzv iclasa sədrlik edəcək. İclasa sədrlik edən bələdiyyəyə üzv seçilmiş şəxslərin siyahısını elan edəcək, ilk iclası bələdiyyə sədri və iclas katibi seçilənədək aparacaq.

Bələdiyyənin sədri açıq və ya gizli səsvermə yolu ilə seçiləcək. Bələdiyyənin sədri bələdiyyə üzvlərinin yarısından çoxunun səsini topladıqda seçilmiş hesab olunacaq. Bələdiyyənin ilk iclasında bələdiyyə sədri və iclas katibi seçildikdən sonra iclasın gündəliyi təsdiq ediləcək.

Gələn il yanvarın 29-da keçiriləcək bələdiyyə seçkilərində seçiləcək bələdiyyə üzvlərinin sayı açıqlanıb.

Mərkəzi Seçki Komissiyasının (MSK) sədri Məzahir Pənahov  deyib ki, 685 bələdiyyə üzrə 8071 bələdiyyə üzvü seçiləcək.

Yeni Azərbaycan Partiyası bələdiyyə seçkiləri ilə bağlı 19 nəfərdən ibarət Mərkəzi Seçki Qərargahı yaradıb. YAP Sədrinin müavini - Mərkəzi Aparatın rəhbəri Tahir Budaqov bələdiyyə seçkilərinin keçiriləcəyi 118 seçki dairəsinin hər biri üzrə YAP-ın öz namizədlərini irəli sürəcəyini deyib.  Başqa partiyalar seçki barədə nə düşünür? Seçkidə hansı şəkildə iştirak edirlər? 

Müsavat Partiyası yanvarın 29-na təyin edilmiş bələdiyyə seçkilərində iştirak edəcəyini bildirib.

Müsavat Partiyasının məlumatında deyilir ki, yanvarın 25-də partiyanın Divanı (İdarə Heyəti) seçkilərdə öz namizədləri ilə iştirak etmək, namizədlərin irəli sürülməsi səlahiyyətlərini partiyanın rayon təşkilatlarına həvalə etmək haqqında qərar qəbul edib.

İndiyədək təxminən 10 siyasi partiya, o cümlədən REAL Partiyası bələdiyyə seçkilərində iştirak edəcəyini bildirib.

AMİP də bələdiyyə seçkilərində iştirak edəcək. Partiyanın sədri, deputat Arzuxan Əlizadə bu barədə bildirdi ki, mümkün qədər çox sayda bələdiyyələrdən namizədlər irəli sürmək fikrindədirlər. 

Akif Nağı 

Azad Vətən Partiyasının sədri Akif Nağı isə bildirdi ki, rəhbərlik etdiyi partiya bələdiyyə seçkilərində iştirak edəcək: “Seçki qərargahımız daimi fəaliyyət göstərən qərargahdır. Prezident seçkiləri zamanı seçki qərargahı yaratmışıq və daimi seçki qərargahı kimi fəaliyyət göstərir. Siyasi Şuranın sədri Novruz Novruzov seçki qərargahına rəhbərlik edir. Bələdiyyə üzvlüyünə namizədlərimizi müəyyənləşdiririk. Çalışırıq ki, imkan daxilində seçkidə geniş tərkibdə, çoxlu sayda namizədlərlə iştirak edək. Ən azından ən azı 30-35 rayonda namizədlərimizi verməyə çalışırıq. Tam şəkildə olmasa da seçki dairələrinin əksəriyyətini əhatə etməyi düşünürük. Təbiidir ki, YAP hakimiyyətdə olan partiya kimi bütün ölkə ərazisini əhatə edir, bütün rayonlar üzrə yerli şöbələri var və imkanları daha genişdir. Bu isə onlara seçki prosesində üstünlük gətirir. Bizim onlarla rəqabət aparmağımıza ehtiyac yoxdur. Biz yeni yaranmış bir partiya kimi hesab edirəm həm kəmiyyət baxımından, həm keyfiyyət baxımından çalışacağıq ki, bu seçkilər də partiyanın inkişafına növbəti bir mərhələ olsun. Əsas məsələ seçkidə iştirakdır. Çalışacağıq ki, namizədlərimiz seçilsin və bələdiyyə qurumlarında partiyamız təmsil olunsun. Əlbəttə ki, seçkidə partiya siyahısı ilə namizədlərimiz irəli sürüləcək”. 

 Tural Abbaslı 

AĞ Partiyanın sədri Tural Abbaslı isə bildirdi ki, rəhbərlik etdiyi partiya yanvarın 29-da keçiriləcək bələdiyyə seçkilərinə qatılacaq. Bu barədə dekabrın 3-də partiya rəsmi açıqlama da yayıb. Açıqlamada bildirilir ki, partiya üzvləri bələdiyyə seçkilərində iştirakın vacibliyini dəstəkləyir və hazırlıq işləri artıq başlayıb. Bununla bağlı yerli təşkilatlara müvafiq təlimatlar verilib. Yaxın günlərdə partiyanın bələdiyyə üzvlüyünə namizədləri müəyyənləşdiriləcək. Namizədlərin sənədləri hazırlandıqdan sonra müvafiq seçki dairələrinə təqdim olunacaq. Partiyanın daimi seçki qərargahı var və işlək vəziyyətdədir.

Azərbaycan Xalq Partiyası isə dekabrın 3-də 29 yanvar bələdiyyə seçkilərində iştirak haqqında bəyanat yayıb. Bəyanatda bildirilir ki, AXP üzvləri arasında 29 yanvar 2025-ci il tarixli bələdiyyə seçkilərində tam şəkildə iştiraka maraq göstərilməməsi müşahidə edilir. 

Bəyanatda sonra deyilir ki, AXP İdarə Heyəti seçkilərdən iştirakdan imtina haqqında siyasi qərarın verilməsini məqsədəuyğun hesab etmir və bu seçkilərdən partiyanın proqram məqsədlərinin xeyrinə siyasi təbliğatın aparılması, partiya üzvləri və yerli strukturların fəallaşması üçün istifadə edilməsini məqsədəuyğun sayır. Partiya bələdiyyə seçkilərində iştirakı üzvlərin öz mövqelərini sərbəst şəkildə müəyyənləşdirməsi şəklində həyata keçirmək qərarını verib. Yəni hər bir AXP üzvü bu seçkilərdə seçki məntəqələrinə getmək və ya getməmək, habelə seçkidə namizəd kimi iştirak barədə özü qərar qəbul edir. 

Etibar SEYİDAĞA,
“Yeni Müsavat”