Uşaqlar niyə ağlayırlar?

Bəlkə də sizə qəribə gələcək ancaq ağlamağın da öz dili var. Çünki uşaqlar öz istəklərini ağlamaqla bildirirlər.
Bundan başqa, ağlamaq uşağın ağ ciyərlərinin inkişafında da mühüm rol oynayır. Ancaq həddindən artıq ağlamaq uşağın qan təzyiqinin artmasına və ürək döyüntülərinin sürətlənməsinə gətirib çıxarır. Nəticədə, uşağın qanındakı oksigen azalır. 
Ümumiyyətlə isə uşaqlar gündə orta hesabla 1-4 saat ağlayırlar. Bu rəqəm anadangəlmə xəstəliyi olan uşaqlarda daha çoxdur. Digər tərəfdən, əgər uşaq həddindən artıq sakitdirsə, bu da onda hər hansı bir xəstəlikdən xəbər verir. 
Başqa vacib bir məsələ budur ki, uşaqlar həmişə eyni cür ağlamırlar. Buna görə də, mütəxəssislər onları müəyyən qruplara ayırırlar. Mütəxəssislərə görə, uşaqlar acdıqda başqa cür, yorulduqda başqa cür, xəstələndikdə isə tamam başqa cür ağlayırlar. Bu mənada uşaqların “dilini bilmək” anaların işini də asanlaşdırır. 
Mütəxəssislər uşaqların ağlamaq formalarını aşağıdakı kimi qruplaşdırırlar: 
1. Ağrıları olduqda: Uşaqların ağrıları olduqda bir qayda olaraq, yüksək səslə və içlərini çəkərək ağlayırlar. Bu məsələdə başqa bir əlamət isə onların nəfəs almadan qışqırmalarıdır. 
2. Acdıqda: Uşaqlar acdıqda düşən və qalxan səs tonu ilə ağlayırlar. Bəzən barmaqlarını əmir, yanaqlarına vurur, anaları onları qucağına götürənə qədər ağlamaqlarını kəsmirlər. 
3. Narahat olduqda: Bu vaxt uşaqlar əks-səda verən bir səs tonu ilə ağlayırlar. Belə olduqda da uşaqlar anaları onları qucağına götürənə qədər ağlamaqlarını kəsmirlər. 
4. Yorulduqda: Uşaqların yorulması bir qayda olaraq, onların yuxularının gəlməsi ilə müşayiət olunur. Yuxusu gələn uşaqlar isə adətən aşağı tonda və ritmik bir ahənglə ağlayırlar. 
5. Xəstələndikdə: Əsəsən, inadkar səs tonu ilə ağlayırlar. Digər tərəfdən, uşaqlar təkcə xəstələndikdə yox, altlarını islatdıqda, üşüdükdə və tərlədikdə də bu cür ağlayırlar...