Keçmiş müdafiə naziri məxfi sənədləri açıqladığına görə həbs oluna bilər

Polşanın keçmiş müdafiə naziri Mariuş Blaşçakı gizli müdafiə planını açıqladığı üçün 1 ildən 10 ilədək həbs cəzası gözləyir.
Yeniavaz.com Polşanın PAP xəbər agentliyinə istinadən bildirir ki, bu barədə prokuror Marçin Maksian məlumat verib.
Blaşçak cümə günü prokurorluğu tərk etdikdən sonra jurnalistlərə açıqlamasında ittihamların əsassız olduğunu vurğulayıb: "İttiham aktları açıqlanıb və mənim fikrimcə, bu ittihamlar əsassızdır. Arxiv sənədlərini ictimaiyyətə açıqlamağa həm haqqım, həm də borcum var idi."
Qeyd edək ki, keçmiş nazirə qarşı ittihamların irəli sürülməsinə imkan verən qərar martın 6-da onun deputat toxunulmazlığının ləğvindən sonra qəbul edilib. O, 2023-cü ildə WARTA-00101 adlı müdafiə planının bəzi məxfi hissələrini ictimaiyyətə açıqlamaqda ittiham olunur.
Sözügedən sənəd potensial Rusiya hücumu zamanı Polşanın müdafiə strategiyasını müəyyən edirdi və işğal halında Polşa qüvvələrinin ölkənin ən uzun çayı olan Vistula boyunca geri çəkilməsini nəzərdə tuturdu.
Blaşçak müdafiə naziri olduğu dövrdə sənədlərin məxfiliyini ləğv edib və bu məlumatları 2023-cü il seçki kampaniyasında istifadə edib. O, həmin dövrdə müxalifətdə olan Vətəndaş Platforması partiyasını Polşanın müdafiə planını düzgün tərtib etməməkdə və ölkənin yarısını təslim etmək strategiyası qurmaqda ittiham edirdi.
Prokurorluğun məlumatına görə, Blaşçakın bu məxfi müdafiə planını açıqlaması Polşa qanunvericiliyinin pozulması hesab olunur. Sənədlər Hərb Tarixi Bürosunda saxlanılsa da, onlar yenə də məxfi məlumatların mühafizəsi haqqında qanuna tabe idi.