Son xəbərlər:

Qarabağ veteranı icra başçısından şikayətçidir - Rəsmi açıqlama

Dünya2 oktyabr 2025 17:54

44 günlük Qarabağ savaşının iştirakçısı Kamil Əzizov Sumqayıt Şəhər İcra Hakimiyyətinin başçısı Zakir Fərəcovdan şikayətçidir.

Müharibə veteranı Qaynarinfo-ya bildirib ki, müharibədən qayıtdıqdan sonra iş tapa bilmir.

Ali təhsilli və peşəkar idmançı olan Kamil Əzizovun sözlərinə görə, dəfələrlə iş üçün Sumqayıt Şəhər İcra Hakimiyyətinə müraciət edib. Lakin nəticəsi yoxdur:

"Əlbəttə deyilə bilər ki, niyə məhz Sumqayıt Şəhər İcra Hakimiyyəti? Yaxud elə başa düşülə bilər ki, mən icra başçısı Zakir Fərəcovdan vəzifə istəyirəm. Xeyr. Sadəcə şəhərin rəhbəri kimi iş üçün ona müraciət etmişəm. Bu məsələdə yardım göstərməsinin xahiş etmişəm. Mənə dövlət qulluğu imtahanından keçməyi tövsiyə ediblər. Əziyyət çəkib, hazırlaşıb imtahanı vermişəm. Amma indi məlum olur ki, bu sadəcə bəhanə, vaxt udmaq imiş".

Kamil Əzizovun sözlərinə görə, işsiz qaldığı üçün maddi sıxıntılar yaşayır. İmkansızlıqdan ailə də qura bilmir:

"Yalnız "veteran pulu" ilə dolanmaq olmur axı. Mən ev, maşın istəmirəm. Sadəcə işləmək istəyirəm. Azərbaycan Texniki Universitetinin Cihazqayırma fakültəsini bitirmişəm. Bir neçə dildə sərbəst danışıram. Peşəkar idmançıyam. Amma mən iş tapa bilmirəm. Sanki kimlərsə məqsədli şəkildə bütün qapıları üzümə bağlayıb. Təsəvvür edin, dövlət qurumlarına 150-dən çox müraciət ünvanlamışam. Amma nəticəsi yoxdur".

Sumqayıt Şəhər İcra Hakimiyyətindən isə Qaynarinfo-ya göndərilən açıqlamada Kamil Əzizovun dəfələrlə icra başçısı Zakir Fərəcov tərəfindən qəbul olunduğu bildirilib:

"Kamil Əzizova şəhər İcra Hakimiyyəti tərəfindən maddi yardım olunub, Mənzil Kommunal Təsərrüfatı İstehsalat Birliyinin tabeliyində olan Küçə İşıqları İdarəsində mühəndis vəzifəsinə təyin olunub. Lakin sonradan öz istəyi ilə işdən çıxıb".

Kamil Əzizov isə qurumun açıqlamasının həqiqəti əks etdirdiyini bildirib:

"Doğrudan da mənə iş veriblər. 650 manat maaş olub. Lakin bank maaşımın 50 faizini tutduğundan ərizə yazıb əmək haqqının artırılmasını, yaxud başqa işə keçirilməyimi istəmişəm. "Gözlə, gözlə" deyib yubatdılar. Mən də məcbur qalıb ərizə yazıb çıxdım. Bundan sonra da "gözlə" dedilər. Elə bu yaxınlarda da işlə bağlı şəxsən Zakir Fərəcovun özündən maraqlanmışam. "Gözlə" deyirlər. Əvvəlki işimə də bərpa etmirlər".

Kamil Əzizov 2020-ci ilin sentyabr ayının 27-də torpaqlarımızın isğaldan azad olunmasi ugrunda gedən döyüslərə könüllü qoşulub. Döyüşlərdə göstərdiyi şücaətlərə görə "Vətən müharibəsi iştirakçısı”, ”Cəbrayılın azad olunmasına görə”, "Zəngilanın azad olunmasına görə” medalları və digər mükafatlarla təltif olunub.