Son xəbərlər:

Putin-Zelenski görüşünə hazırlıq başladı: Harda olacaq və tələblər nədir?

Bu gün, 09:41

ABŞ Administrasiyasının rəhbəri Donald Tramp Rusiya Prezidenti Vladimir Putin və Ukrayna lideri Volodimir Zelenski arasında üçtərəfli danışıqların keçiriləcəyi gözlənilən görüşünə hazırlıqlara başladığını bildirib.

Qaynarinfo xəbər verir ki, bu barədə Tramp bu barədə "Truth Sosial”dakı hesabında yazıb.

"Mən prezident Putinə zəng vurdum və prezident Putinlə Zelenski arasında keçiriləcək görüş üçün hazırlıqlara başladım, görüşün yeri müəyyənləşdiriləcək. Həmin görüş baş tutandan sonra üçtərəfli danışıqlarımız olacaq", deyə Tramp sosial şəbəkə hesabında yazıb.

Putin Trampa Ukrayna Prezidenti ilə görüşə hazır olduğunu bildirib. Bu barədə "Agence France-Presse” (AFP) məlumat yayıb.

Daha əvvəl Rusiya Prezidentinin köməkçisi Yuri Uşakov qeyd edib ki, Putin və Tramp danışıqlarda iştirak edən "Ukrayna və Rusiya tərəflərinin nümayəndələrinin səviyyəsinin yüksəldilməsi imkanlarını” müzakirə ediblər.

Zelenski Ağ Evdə müzakirələrdən sonra jurnalistlərin suallarını cavablandırarkən bildirib ki, Rusiya ABŞ Prezidenti Donald Tramp vasitəsilə Ukrayna ilə ikitərəfli, sonra isə ABŞ ilə üçtərəfli görüş istəyib. Onun sözlərinə görə, Kiyev növbəti danışıqlar üçün şərt kimi atəşkəsdə israr etməyəcək:

"ABŞ Rusiya tərəfi ilə əlaqə saxladı və onlar hansı diplomatik addımların atıla biləcəyini müzakirə etdilər. Rusiya isə əvvəlcə Ukrayna ilə Rusiya arasında ikitərəfli, sonra üçtərəfli görüş təklif etdi. Bəli, dediyim kimi, biz liderlər səviyyəsində istənilən formata hazırıq. Ona görə də təsdiqlədim və bütün Avropa liderləri məni dəstəklədilər ki, biz ikitərəfli görüşə hazırıq".

O vurğulayıb ki, Ukrayna üçün təhlükəsizlik təminatının təfərrüatları 10 gün ərzində işlənib hazırlanacaq, ərazilər məsələsi yalnız Putinlə müzakirə olunacaq.

"Financial Times"ın məlumatına görə isə Ukrayna Rusiyaya ərazi güzəştlərini ehtiva edən heç bir sövdələşməni qəbul etməyəcək və tam sülh sazişi üçün ilk addım kimi atəşkəsdə israrlıdır. Bu barədə Kiyevin Ağ Evdə keçirilən görüşdə ABŞ Prezidentinə təkliflərinin yer aldığı sənəddə deyilir.

Qeyd olunur ki, Ukrayna Rusiya ilə sülh razılaşmasından sonra ABŞ-nin təhlükəsizlik zəmanətini əldə etmək cəhdi ilə Avropa tərəfindən maliyyələşdirilən 100 milyard dollar dəyərində Amerika silahlarını almağa sadiqdir.

Sənəddə Ukraynanın sövdələşmənin bir hissəsi olaraq hansı silahları tələb etdiyi açıqlanmır, lakin Kiyev şəhərlərini və mühüm infrastrukturunu qorumaq üçün Amerikanın azı 10 "Patriot” hava hücumundan müdafiə raket sistemini, eləcə də digər raket və avadanlıqları almaq istəyini açıq şəkildə bəyan edib.

Təkliflərə əsasən, Kiyev və Vaşinqton həmçinin Ukrayna şirkətləri ilə pilotsuz təyyarələrin istehsalı üçün 50 milyard dollarlıq müqavilə bağlayacaq. Ancaq dron müqaviləsinin hansı hissəsinin satınalma və hansı hissəsinin investisiya olacağı açıqlanmır.

Həmçinin rəsmi Kiyev müharibə zamanı dəymiş ziyana görə Moskvadan tam təzminat tələb etməkdə israrlıdır. Məlumata görə, kompensasiya 300 milyard dollar həcmində Rusiyanın Qərb ölkələrində dondurulmuş suveren aktivləri hesabına ödənilə bilər.

"Sanksiyaların istənilən yumşaldılması yalnız Rusiya gələcək sülh sazişinə əməl edəcəyi və ədalətli oynadığı halda təmin edilməlidir", deyə sənəddə bildirilir.

Ukrayna həmçinin hesab edir ki, Rusiyanın uzunmüddətli sülh sazişi üzrə növbəti danışıqlardan əvvəl ərazi məsələlərini həll etmək cəhdi yerində bitmiş nəticə yaradacaq və Kiyevin gələcək təhlükəsizliyini təminatı üçün heç nə etməyəcək.