Bu ölkələr mənə zəng edir, АRXАMI öpür, razılaşma üçün yalvarırlar

ABŞ Prezident Donald Tramp onunla ticarət danışıqları aparmağa və idxal tariflərini azaltmağa çalışan ölkələri ələ salıb.
Yeniavaz.com CNBC telekanalına istinadla xəbər verir ki, bu barədə ABŞ Prezidenti Donald Tramp Konqresin Milli Respublikaçılar Komitəsinin xeyriyyə tədbirindəki çıxışında deyib.
Tramp hətta bəzi ölkələrin ona razılaşma üçün “yalvardıqlarını” bildirib.
“Bu ölkələr mənə zəng edir, arxamı öpürlər. Razılaşma üçün yalvarırlar: “Zəhmət olmasa, cənab, müqavilə bağlayın. Biz hər şeyi etməyə hazırıq” deyirlər”, - deyə ABŞ Prezidenti qeyd edib.
Onun bu sözləri tədbirdə iştirak edənlər arasında gülüşlə qarşılanıb.
ABŞ prezidenti respublikaçı həmkarlarını əmin edib ki, digər ölkələrə tariflərin artırılması 2026-cı il aralıq seçkilərində onlara kömək edəcək.
Tramp həmçinin hazırda tariflə bağlı vəziyyətin “yaxşı” və “möhtəşəm” olduğunu əlavə edib.
O bildirib ki, 70-dən çox ölkə ABŞ ilə tətbiq edilən tariflər məsələsində danışıqlara hazır olduğunu bildirib.
Qeyd edək ki, aprelin 2-də Amerika lideri 185 ölkə və ərazidən gələn məhsullara gömrük rüsumunun tətbiq ediləcəyini bəyan edib. 10%-lik universal tariflər aprelin 5-dən qüvvəyə minib, fərdi tariflər isə aprelin 9-da qüvvəyə minəcək.
Xatırladaq ki, ABŞ prezidenti Donald Tramp tətbiq etdiyi yeni tariflərə görə 500 milyon dollar itirib. Cəmi bir həftə ərzində Amerika liderinin kapitalı 4,7 milyard dollardan 4,2 milyard dollara düşüb.