Uşaqlıqda piylənmə AXOX-un daha sürətli inkişafına şərait yaradır

Yeni tədqiqatlar göstərir ki, uşaqlıqda artıq çəki və ya piylənmə yetkinlik dövründə ağciyərlərin xroniki obstruktiv xəstəliyinin (AXOX) inkişaf riski ilə əlaqələlidir.
Yeniavaz.com xəbər verir ki, tədqiqatı aparan mütəxəssislər Kopenhagen Məktəbinin Sağlamlıq Kartı Reyestrindən 1930-1982-ci illər arasında doğulmuş 276 min 747 danimarkalı uşağn səhiyyə məlumatlarını araşdırıblar.
Tədqiqatın məqsədi uşaqlıq dövründə bədən kütləsi indeksində baş verən dəyişikliklərin sonrakı dövrlərdə yaratdığı nəticələri öyrənmək olub.
Statistik modelləşdirmədən istifadə edilərək, uşaqların bədən kütləsi indeksinin (BKİ) beş fərqli traektoriyası müəyyən edilib: orta səviyyədən aşağı, orta, orta səviyyədən yuxarı, artıq çəki və piylənmə.
Müəlliflər daha sonra 1977-ci ildən 2022-ci ilə qədər reyestrdə qeydiyyatdan keçənlərin məlumatlarının araşdırıb 40 və daha yuxarı yaşda AXOX diaqnozu qoyulanları müəyyən ediblər.
Tədqiqat müəllifləri tədqiqat dövründə 18 min 227 qadın və 15 min 789 kişiyə AXOX diaqnozu qoyulduğunu aşkar ediblər. Uşaqlıq dövründə orta BKİ olan qadınlarla müqayisədə, AXOX inkişaf riski orta BKİ-dən yuxarı olan qadınlarda 10 faiz, artıq çəkili qadınlarda 26 faiz və piylənmə olan qadınlarda 65 faiz daha yüksək olub. Uşaqlıqda orta BKİ olan kişilərlə müqayisədə, AXOX inkişaf riski orta BKİ-dən yuxarı olan kişilərdə 7 faiz, artıq çəkili kişilərdə 16 faiz və piylənmə olan kişilərdə 40 faiz yüksək olub.