Günahsız yerə 47 il həbsdə qaldı: 1,4 milyon dollar təzminat ALACAQ

Yaponiyada məhkəmə 1966-cı ildə bir qətldə günahlandırılaraq 47 il həbsdə qaldıqdan sonra günahsız olduğu müəyyən edilən Hakamata İvaoya 1,4 milyon dollar təzminat ödənilməsinə qərar verib.

Musavat.com xəbər verir ki, bu barədə "Kyodo News" məlumat yayıb.

Məlumatda bildirilir ki, 1966-cı ildə eyni ailədən dörd nəfəri qətlə yetirmək ittihamı ilə həbs edilən və 1968-ci ilin sentyabrında edama məhkum olunan boksçu Hakamata illər sonra açdığı təzminat iddiasını udub.

2014-cü ildə işin yenidən açılmasına qərar verilənə qədər 47 il ərzində edam edilmə qorxusu altında həbsdə saxlanılan Hakamata, hər gün üçün 84 dollar təzminat tələb edib.

2024-cü ilin sentyabrında, 89 yaşında olarkən qətl ittihamından bəraət qazanan Hakamatanın vəkilləri onun 47 illik haqsız məhkumluğunun psixoloji və fiziki fəsadlarının ölçüyəgəlməz olduğunu bildiriblər.

Vəkillər Hakamatanın uzun illər edam cəzası qorxusu ilə yaşadığını əsas gətirərək ona maksimum həcmdə təzminat ödənilməsini tələb ediblər.

Məhkəmə həbsdə olduğu müddətdə yaşadığı "psixoloji və fiziki əziyyətlərə" görə Hakamata İvaoya 1,4 milyon dollar təzminat ödənilməsinə qərar verib.

Hadisə və Hüquqi Proses

Ginnesin Rekordlar Kitabı tərəfindən "dünyanın ən uzun müddət həbsdə qalan edam məhbusu" adlandırılan Hakamata 1966-cı ildə Tokio şəhərinin cənub-şərqində yerləşən Şizuoka bölgəsində, soya məhsulları istehsal edən bir fabrikdə işləyərkən eyni ailədən dörd nəfəri bıçaqla qətlə yetirmək ittihamı ilə həbs olunub.

1968-ci ilin sentyabrında edam cəzasına məhkum edilən Hakamatanın hökmü 1980-ci ilin dekabrında qüvvəyə minib. 1981-ci ilin aprelində o, yenidən məhkəmə qarşısına çıxmaq üçün apellyasiya şikayəti versə də, Şizuoka Bölgə Məhkəməsi 1994-cü ilin avqustunda bu tələbi rədd edib.

2014-cü ilin martında Şizuoka Bölgə Məhkəməsi yeni sübutların ortaya çıxması ilə işin yenidən araşdırılmasına qərar verərək Hakamatanın sərbəst buraxılmasına hökm edib.

Nəhayət, Şizuoka Bölgə Məhkəməsi 2024-cü ilin sentyabrında qətl hadisəsinə dair sübut kimi təqdim edilən geyimlərin etibarlı hesab edilməyəcəyini bildirərək Hakamatanın bəraətinə qərar verib.