Cahangir Əsgərovun həyat yoldaşı Zərifə Həmzəyevanın bаnkındа nə bаş verir ?

Müştərilər tərəfindən “Premium Bank” ASC-yə yerləşdirilən depozitlərin həcmi azalıb.
Yeniavaz.com xəbər verir ki, 2023-cü illə müqayisədə 2024-cü ildə fiziki şəxslərin “Premium Bank”dakı depozitləri 11,7% və ya 38,8 milyon manat, hüquqi şəxslərin bankdakı depozitləri isə 10,6% və ya 10,2 milyon manat azalıb.
Bu ilin əvvəlinə olan məlumata görə, fiziki şəxslərin “Premium Bank”da 292 milyon, hüquqi şəxslərin isə 85,7 milyon manat depoziti olub.
Qeyd edək ki, son 3 ildir hüquqi şəxslərin “Premium Bank”da yerləşdirdikləri depozitlər davamlı olaraq azalır. Belə ki, hüquqi şəxslərin “Premium Bank”dakı depozitləri 2021-ci ildə 191 milyon, 2022-ci ildə 125,8 milyon, 2023-cü ildə isə 95,9 milyon, 2024-cü ildə isə 85,7 milyon manat olub.
Məlumat üçün bildirək ki, “Premium Bank”ın əsas səhmdarı AZAL-ın sabiq prezidenti Cahangir Əsgərovun həyat yoldaşı Zərifə Həmzəyevadır. 1994-cü ildə “AZAL Səhmdar Kommersiya Bankı” kimi fəaliyyətə başlayan, daha sonra adını 2 dəfə dəyişərək, əvvəlcə “Bank Silk Way” ASC, hazırda isə “Premium Bank” ASC adlanan bankın səhmlərinin 84,5%-i Zərifə Həmzəyevaya məxsusdur.
Onu da bildirək ki, son illər Azərbaycanda bağlanan bankların sayı artıb. Belə ki, təkcə son 2 ildə 3 bankın lisenziyası ləğv olunub. 2023-cü ildə Mərkəzi Bank tərəfindən 2 bank – “Günay Bank” ASC və “Muğanbank” ASC, 2024-cü ildə isə “Naxçıvanbank” ASC bağlanıb.