Elçin Şıxlı: Vaxtilə SPUTNİK-i bizim boynumuzda Əli Həsənov otuzdurmuşdu

"Sputnik" İnformasiya Agentliyinin başında Marqarita Simonyan dayanır. O, bir erməni kimi hər zaman Azərbaycanın əleyhinə çıxışlar edib. Bir çox verilişlərdə, özünün şəxsi çıxışlarında hər zaman anti-Azərbaycan mövqe sərgiləyib, bizi aşağılayıb. Vaxtilə "Sputnik"i bizim boynumuzda Əli Həsənov otuzdurmuşdu. Əli Həsənov ailəsinə məxsus binada "Sputnik"ə ofis vermişdi, yüksək şərait yaratmışdı. Nəticədə agentlik istədiyini edirdi".

Bu sözləri Demokrat.az-a açıqlamasında Azərbaycan Jurnalistlər Birliyinin sədri  Elçin Şıxlı deyib:

Elçin Şıxlı açıqlamasında bildirib ki, təəssüf ki, 10 ildən sonra biz indi ayılmışıq:

"Onlar əvvəldən Azərbaycan əleyhinə olan mövqedə dayanıblar. Ayrı-ayrı azərbaycanlı jurnalistlər onların siyasətinin qarşısını öz gücləri hesabına almağa çalışırdılar. Həmin jurnalistlər agentlikdən uzaqlaşdıqdan sonra, agentlik ağzına gələni yazır. Çünki Moskvadan Azərbaycanın münasibətini heç zaman işıqlandırmağa imkan verilməyib. AZAL-ın təyyarəsinin vurulmasını da qətiyyətlə "quş sürüsü ilə toqquşma" kimi təqdim edilib. Yəqin ki, elə həmin quş sürüsünün başında Marqarita Simonyan uçurmuş, dəyib təyyarəyə qəza edib. Ona görə də əminliklə təyyarənin quş sürüsü ilə toqquşduğunu deyirlər".

O bildirib ki, Rusiyanın Azərbaycandakı bu kimi casus şəbəkəsi mütləq bağlanmalıdır:

"2009-cu ildə güc strukturları tərəfindən əməliyyat keçirildi. Əməliyyat "Meşə qardaşları" adlı şəbəkəyə qarşı idi. Azərbaycan Respublikasının Prezidenti təyyarə qəzası ilə bağlı Rusiyadan ədalətli mövqe tələb edən kimi "Meşə qardaşları" da ortaya çıxdı. Bütün bunlar Rusiyanın Azərbaycanda yatmış şəbəkələridir. 

Mediada isə "Sputnik" agentliyi yatan həmin şəbəkələrdən biridir. Lazım olan məqamda bizim əleyhimizə ictimai rəyə təsir göstərməyə çalışırlar. Bu agentliyi təcili ləğv etmək lazımdır ki, gedib başqa yerdə təbliğat aparsınlar.

"Sputnik"də çalışan jurnalistlərimiz var. Agentlik bağlanan zaman onlar da mütləq işlə təmin olunmalıdırlar. Onlar agentlikdə olmasa, bəlkə də bundan da betər şeylər olar".