Babam Kazım ağa Məşədi Həsən oğlu 1870-ci ildə Azərbaycanın qədim diyarlarından biri olan, Xəzər dənizinin qərb sahilində Lənkəran çayının dənizə qovuşduğu yerdə yerləşən Lənkəran şəhərində anadan olmuşdur.

Görkəmli dövlət xadimi Şah İsmayıl Xətai Səfəvi dövlətini yaradarkən Lənkəran da bu dövlətin ərazisinə daxil idi. Səfəvilərlə Lənkərana daxil olan ordunun bir qismi burada yerləşdirilmiş və sonradan Lənkəranda məskunlaşmışdı.

Artıq XIX əsrin sonlarında Lənkəran inkişaf edərək sənətkarlar şəhərinə çevrilmişdi. 01 yanvar 1885-ci il tarixdə Lənkəran şəhərinin əhalisi 5600 nəfərə çatırdı. İnkişafı nəzərə alaraq şəhərin bələdiyyə idarəsi (Duması) yaradılır. Şəhər dörd hissədən ibarət idi.

Babamın ailəsi XIX əsrin ortalarında Ərdəbildən köç edərək dəniz sahili boyu yerləşən kiçik bazarda məskunlaşmışdı.

1906-cı ildə burada kiçik bazar məscidi inşa olunur.

Kazım ağa öz ailəsi ilə məscidin yaxınlığında, sovetlər dövründə Əli Bayramovun adı ilə adlandırılan küçədəki 55 saylı ünvanda yaşamışdır.

XX əsrin əvvəllərində Lənkəran sənətkarlıq şəhərinə çevrilir, burada ticarət, sənaye və nəqliyyat sahələri inkişaf edir.İpəkçilik, xalçaçılıq, dulusçuluq, balıqçılıq, dəmirçilik və s. sahələri əhatə edən kiçik müəssisələr yaradılır.

Kazım ağa Məşədi Həsən oğlu əvvəllər xalça-palaz ticarəti ilə məşğul olur, tez-tez İrana mal aparıb satdırır, sonradan daşınma sahəsində fəaliyyətini davam etdirir. Əvvəllər at, araba, sonradan gəmi ilə sərnişin və yükdaşıma işi ilə məşğul olmuşdur.

Babam ailə qurur. Onun həyat yoldaşı Qurbanova Cavahir Qurbanəli qızı 1881-ci ildə Lənkəran şəhərində anadan olmuşdur. Onların 1915-ci ildə Mədinə adlı qızı, 1917-ci ildə Rəcəb, 1923-cü ildə İbrahim, 1930-cu ildə Qulu adlı oğulları dünyaya gəlir.

1920-ci ildə Sovet hakimiyyəti qurulduqdan sonra babamın iş fəaliyyəti çətinləşir, hakimiyyətin tələblərinə uyğun fəaliyyətlə məşğul ola bilmir.

İnqilabdan sonra babam Kazım ağa 1920-ci ildə Bakıya köçür və Azneft İstehsalat Birliyində işləyir.

Babam Kazım ağa 1931-ci ildə vəfat etmişdir.

Atam Kazımov Rəcəb Kazım oğlu öz soyadını atası Kazım ağanın adından götürmüşdür.

Kazım ağa və Cavahir xanım ona hicri qəməri təqvimi ilə 7-ci müqəddəs hesab olunan ayın şərəfinə Rəcəb adı vermişlər.

O, 27 iyun 1917-ci ildə Lənkəran şəhərində anadan olmuş, 1920-ci ildə ailəsi ilə birgə Bakı şəhərinə köçmüşdür. Kiçik Rəcəb 1930-cu ildə 27 saylı komsomol məktəbini bitirərək, 13 yaşında «Qırmızı Oktyabr» adlı mebel fabrikində əmək fəaliyyətinə başlayır. O, 8 il əmək fəaliyyəti nəticəsində mebel ustası kimi formalaşır, sex rəisi vəzifəsinə təyin olunur.

R.Kazımov 1938-ci ildə hərbi xidmətə çağrılır, SSRİ-nin şimal bölgəsində 123-cü aviasiya bazasında hərbi xidmətdə olmuşdur. Sonradan Leninqrad Hərbi dairəsinə göndərilmişdir.

1941-ci ildə II Dünya müharibəsinin başlanması ilə hərbi xidmətini davam etdirir və müharibədə aktiv iştirak edir, Leninqradda blokada şəraitində şəhəri alman faşistlərindən müdafiəsində qəhrəmancasına iştirak edib. O, 14 avqust 1943-cü ildə Leninqradın müdafiəsində göstərdiyi qəhrəmanlığa görə ordenlə təltif olunmuşdur. Müharibə illərində kommunist partiyasına qəbul olunur. R.Kazımov Varşava və Berlin şəhərlərinin azad olunmasında göstərdiyi şücaətə görə bir çox medallarla təltif olunur. 1945-ci ildə Berlinin alınması medalı ilə təltif olunmuş və G.Jukovun şəxsi minnətdarlıq məktubunu almışdır.

Atam müharibədən sonra 1946-c ildən Metaltəmir sənaye artelində əmək fəaliyyətini davam etdirir. Sonralar «Metalkombinat» zavodunun filialına rəis təyin olunur, təşkilatın qabaqcıl əmək qəhrəmanına çevrilir və müəssisənin partiya təşkilatına sədr müavini seçilir.

Atam Rəcəb Kazımov bir neçə dəfə Bakı Sovetinin deputatı seçilmişdir.

Rəhbərlik etdiyi filialın rəisi kimi «Metalkultbıt» kombinatının dəfələrlə keçici Qırmızı Bayraqla təltif olunmasında böyük rolu olmuşdur.

Əmək qabaqcılı və əmək qəhrəmanı kimi 1974-cü ildə SSRİ Ali Sovetinin qərarı ilə «Qırmızı əmək bayrağı» ordeni ilə təltif olunmuşdur.

Rəcəb Kazımov 1946-cı ildə Fatimə xanımla ailə qurur.

Anam – Şabanova Fatimə Zərbəli qızı 1924-cü ildə Bakı şəhərində anadan olmuşdur. Onu da müqəddəs şəxsin şərəfinə Fatimə adlandırmışdılar, lakin o tez-tez xəstələndiyi üçün valideylərinə məsləhət olunur ki, onu Bibiheybət məscidində dəfn olunan müqəddəs şəxsin digər adı olan Hökümə xanımın adı ilə çağırsınlar.

Məlumat üçün bildirirəm ki, İmam Əli və Fatimənin nəslindən olan xanımı Bibiheybət adlandırırdılar, onun əsl adı Fatimə, digər adı isə Hökümə xanım olmuşdur. Ailəmizdə 1953-cü ildə Sevil, 1954-cü ildə Aydın, 1956-cı ildə Azad və 1958-ci ildə Cəvahir adlı uşaqlar dünyaya gəlmişdir.

Onların övladlarının hamısı ali təhsilli mütəxəssis kimi müxtəlif dövlət təşkilatlarında çalışırlar.

Anam Fatimə xanım (Hökümə) 2002-ci ildə, atam Rəcəb bəy isə 2004-cü ildə vəfat etmişdir. Anamın vəsiyyətinə görə valideynlərim Buzovnada dəfn olunmuşlar.

Aydın Kazımov

Qafqazxeber.az