Qarabağ qazisinin qızı Mehriban Əliyevadan kömək istəyir
Bakı şəhəri, Yasamal rayon sakini Novruzova Şamayı Vəlyəddin qızı Birinci Vitse - Prezident xanım Mehriban Əliyevaya müraciət edib.
Hörmətli Mehriban xanım !
Bütün Azərbaycan cəmiyyəti Sizi nəcib, qayğıkeş, insanların kədərinə şərik olan bir şəxsiyyət kimi tanıyır və sevir.
Sizi əbəs yerə “Qəlbimizin birinci xanımı” adlandırmırlar.
Əziz Mehriban xanım !
Mənim atam, 05.08.1956-cı il təvəllüdlü Novruzov Vəlyəddin Nurəddin oğlu COVİD-19 əleyhinə dövlətimizin tətbiq etdiyi vaksin səbəbindən onkoloji xəstəliyə düçar olmuşdur. Onun vəziyyəti hal-hazırda ağırdır. Türkiyədən aldığımız analizlərin nəticələri sübut etmişdir ki, bu xəstəliyin yaranmasına səbəb məhz vaksin olmuşdur. Atam hal-hazırda 4-cü dərəcə ağciyər xərçəngidir. 100 %-lik I qrup əlildir. 3 ildir ki, dövlətimiz bizə heç bir kömək göstərməyib.
Onu da bildirim ki, atam I Qarabağ müharibəsi dövründə tankçı olub. Xocalıda bir neçə əsirlərimizin qaytarılmasında iştirak edib, əyninə ruslara məxsus döyüş paltarı geyinərək və rus dilində səlis danışaraq əsirlərimizin həyatını xilas etmişdir.
Anam da xəstədir. II qrup əlildir. Mən özüm ali təhsilli olsam da, heç bir yerdə iş tapıb işləyə bilmirəm. Ailə vəziyyətimiz çox çətindir, atamın müalicələrini apara bilmirik.
Sizdən xahiş edirəm ki, dövlətin vurduğu vaksin səbəbindən atamın bu xəstəliyə düçar olduğunu və dövlətimiz qarşısında xidmətlərini nəzərə alıb, onun müalicəsinin təcili İsraildı və ya Türkiyədə aparılmasına köməklik göstərəsiniz. Çünki onun müalicəsi artıq Azərbaycanda mümkün deyil.
Bütün sübutları, Türkiyədən aldığımız analizlərin nəticəsini təqdim etməyim üçün xahiş edirəm məni qəbul edəsiniz.
Dərin hörmətlə, Novruzova Şamayı Vəlyəddin qızı.