Bu gün Azərbaycan Respublikasının Prezidenti İlham Əliyevin sədrliyi ilə keçirilmiş Təhlükəsizlik Şurasının iclasında ölkə başçısı Naxçıvan Muxtar Respublikasının ərazisini İran dövlətinə məxsus pilotsuz uçuş aparatları ilə atəş altına salınmasını Azərbaycan dövlətinə qarşı terror aktı kimi dəyərləndirib.

Deputat Əli Məsimli bu barədə Musavat.com-a bildirib ki, Prezident bugünkü terror hücumunun İran dövlətinin Azərbaycana və azərbaycanlılara qarşı həyata keçirdiyi terror aktlarının ilk dəfə olmadığını vurğuladı: “Bütün dünyada getdikcə gərginləşən geosiyasi proseslər kontekstində Azərbaycan Respublikası hərbi-siyasi gərginliyin yumşaldılması və aradan qaldırılması istiqamətində daim ardıcıl siyasət yürüdərək, bir çox ölkələr arasında münasibətlərin normallaşmasına töhfə verməklə, uğurlu vasitəçi dövlət statusunu qazanıb. Ölkəmizin xarici siyasətində əsas prioritet istiqamət qonşularla sülh şəraitində yanaşı yaşamaq, bir çox iqtisadi problemlərin aradan qaldırılmasına dəstək verməkdir ki, bu istiqamətdə də böyük nailiyyətlər əldə edilib. Ölkəmiz daim qonşuluq prinsipinə sadiq qalıb, Azərbaycan ərazisindən İran və ümumiyyətlə, heç bir ölkə üçün heç vaxt təhlükə olmayıb və yoxdur. Ölkə başçısı bugünkü çıxışında bu məqamların dəfələrlə İranın siyasi rəhbərliyinə çatdırıldığını bildirib”.

Ə.Məsimli xüsusilə vurğulayıb ki, istər 2025-ci ilin yayında, istərsə də yaşadığımız bu günlərdə İran İslam Respublikası ətrafında cərəyan edən hərbi-siyasi gərginlik və müharibə şəraitində ölkəmiz gərginliyin yumşaldılması istiqamətində ciddi səylər göstərir: “Bu kontekstdə İran ərazisində olan əcnəbi vətəndaşların öz ölkələrinə qayıtmaları üçün hər cür şərait yaradılıb və bu, humanitar missiya böyük həssaslıqla davam etdirilir. Etibarlı qonşuluq siyasətinə uyğun olaraq, bu hümanitar missiya İran dronlarının ölkəmizə hücumundan bir neçə saat öncə də davam etdirilib, Prezidentin özü birbaşa olaraq İran tərəfinin xahişinə əsasən, İran səfirliyinin Livanda qalmış əməkdaşlarının təxliyəsinə kömək etmək göstərişi verib, təyyarə göndərilib. Yardım xahişinə ölkə başçısının “indi dar gündə biz kömək göstərməsək, bəs nə vaxt kömək göstərməliyik?” kimi alicənab münasibətinə onların cavabı Prezidentin qeyd etdiyi kimi “çirkincə, namərdcə, nakişi kimi Naxçıvana zərbə endirmək?!” oldu”. Milli Məclisin üzvü qeyd edib ki, ötən gün ölkə başçısı İlham Əliyevin İranın Bakıdakı səfirliyini ziyarət etməsi və İranın Ali Liderinin ölümü ilə bağlı başsağlığı verməsi dövlətimizin və onun rəhbərinin İran ətrafında cərəyan edən proseslərə münasibətdə insansevərliyə dayanan həssaslıqla yanaşmasının nümunəsidir: “Bu günə kimi Azərbaycanın Respublikasının Prezidentindən başqa, heç bir dövlət başçısı İranın heç bir səfirliyinə getməyib.

Bütün bunlara rəğmən, bu gün İran dövlətinə aid olan PUA-lar vasitəsilə Naxçıvan Muxtar Respublikasının ərazisinə edilmiş hücum başadüşülən deyil, qəbuledilməzdir, beynəlxalq hüquqa, xüsusən də, qonşuluq prinsiplərinə ziddir. Hücuma məruz qalmış hədəflərin mülki obyektlər olması, xəsarət almış insanların mülki şəxslər olması bu aktın qeyri-insani və qonşuluğa sığmayan hərəkət olmasının bariz təzahürüdür və qətiyyətlə pislənilməlidir! İranın Naxçıvan ərazisində mülki obyekti, mülki vətəndaşların istifadə etdiyi hava limanını hədəf götürməsi dinc sakinlərə və mülki infrastruktura qarşı terror aktı kimi qiymətləndirilməlidir.

Ümid edirik ki, qarşıdakı saatlar ərzində İran rəsmiləri bu hücuma və onun başvermə səbəblərinə dair düzgün, aydın şəkildə ifadə edilmiş cavab verəcəklər və bir də belə hadisə təkrarlanmayacaq”. Deputat həmçinin əlavə edib ki, İranın hərbi-siyasi rəhbərliyi nəhayət, bu hücumun qarşıdakı dövr ərzində bölgədə baş verəcək hadisələrə təsirlərini anlayacaq qədər düşüncəli davranış numayiş etdirəcəklər: “Ölkəmiz müvafiq cavab tədbirləri görmək hüququnu özündə saxlayır və bu hücum aktları cavabsız qalmayacaq, dövlətimiz bu kimi halların qarşısını almaq üçün müdafiə xarakterli perventiv addımlar atacaq”.

Deputat vurğulayıb ki, bu gün Azərbaycan Respublikasının Prezidenti İlham Əliyevin sədrliyi ilə keçirilmiş Təhlükəsizlik Şurasının iclasında ölkə başçısının qeyd etdiyi kimi bu məsələ ilə bağlı tədbirlər planı hazırlanılmasına başlanılıb, bütün göstərişlər verilib: “İranın Azərbaycandakı səfiri Xarici İşlər Nazirliyinə çağırılıb, etiraz notası verilib. Həmçinin, digər diplomatik addımlar atılır, hərbi baxımdan önləyici təbirlər görülür. Ölkəmizə qarşı hər hansı təcavüz aktına yol verilməsi dövlət müstəqilliyimizin və suverenliyimizə ciddi təhdiddir. Bu təhdidləri önləmək və aradan qaldırmağa yetərli qədər hərbi, siyasi, iqtisadi gücümüz, möhkəm və sarsılmaz iradəmiz, xalq-dövlət həmrəyliyimiz var”.

E.Paşasoy,