Ad günün mübarək, gözəl insan !
Şəbəndəyev Qəzənfər Zeynalabdin oğlu 20 noyabr 1959-cu ildə Əqrəb bürcü altında doğulub. Bu bürcdə doğulanlar yumşaq, həlim, ipək xasiyyətdə və əliaçıq-səxavətli olurlar.
İxtisasca baytar həkim olan Qəzənfər həqiqətən də nəcib və xeyirxah insan, gözəl dostdur. Söz düşəndə zarafatla deyir ki, həkimlər insanların sağlamlığı keşiyində durur, biz baytar həkimlər isə bəşəriyyətin sağlamlığını qoruyuruq.
Qəzənfər həkim həm də qayğıkeş və mehriban ailə başçısıdır. O, üç oğluna yüksək təhsil və ən əsası nümunəvi tərbiyə verib.
Müdrikliyin astanasında olan həkim dostumuz həm də babadır. Dəcəl, şıltaq Nəzrin adlı nəvəsi var.
Ad günü münasibətilə Qəzənfər həkimi təbrik edir, ona cansağlığı, mənalı ömür, bol ruzi arzulayıram. Və həkim dostuma ithaf etdiyim şeiri ad günü münasibəti ilə ona ərməğan edirəm.
Ürək dostu...
Bizə babalardan qalıbdı miras,
Ömrün bəzəyidir inam, etibar.
Çağlayan ümiddir, arxadır həm dost,
Bəhrəli ağacadır, bar gətirər, bar.
Qardaş da dost olsa yaxşıdır əlbətt,
Dost dostun sirrini verməz qardaşa.
Hər daşdan yaranmaz gövhər də əsla,
Gövhər də deməzlər hər yetən daşa.
Taleyin çox olur qəsdi-qərəzi,
Dostluq ürəkdənsə yozula bilməz.
Pozular bəlkə də mizan-tərəzi,
Mərdlərin dostluğu pozula bilməz.
Dar gündə sınanan əsl dostluğun
Silinməz naxışı, silinməz izi.
Dünyada əvəzi varsa hər şeyin
Ürək dosluğunun yoxdur əvəzi.
Həsən Orucoğlu
Şair-publisist, Qarabağ müharibəsi veteranı