Fətullayev, qələminə hörmət qoy…
Baş redaktor niyə tələsir..?
Ləğv olunmuş Milli Təhlükəsizlik Nazirliyinin (MTN) Energetika və Nəqliyyat Sahələrində təhlükəsizlik Baş İdarəsinin sabiq rəisi, general-mayor Akif Çovdarov 15 noyabr 2015- ci ildə həbs olunan gündən başlayaraq haqqin.az saytının rəhbəri Eynulla Fətullayev onun barəsində heç bir ölçüyə sığmayan fikirlər paylaşır.
Öncə onu qeyd edək ki, bizim kiməsə vəkillik etmək fikrimiz yoxdur və hər kəs törətdiyi cinayətə görə cəzasını almalıdır. Eyni zamanda nə Eynulla Fətullayevin, nə də Akif Çovdarovun personası ilə şəxsi problemimiz yoxdur.
Ancaq hələ barəsində məhkəmə qərarı olmayan şəxs haqqında cinayətkar demək, onu ölümə çağırmaq heç bir məntiqə və insanlığa sığan məsələ deyil.
Eynulla Fətullayev həbsxanada olan Akif Çovdarova çağırış edərək deyir: “ Kişi ol…başına bir güllə vur..özünü öldür…canın qurtarsın”.
Axı, Eynulla Fətullayev sıradan biri deyil ki, ağzından çıxanın mənasını bilməsin.
O, kifayət qədər tanınmış şəxsdir, bir neçə media qurumunun rəhbəridir və ən əsası hüquq anlayışından az-çox xəbəri var.
Axı, başqasını ölümə, intihara, sui-qəsdə səsləmək, özü də təkidli şəkildə özünə qəsdə çağırmaq cinayət sayıla bilər.
Amma ən əsası hələ bu şəxsin barəsində məhkəmə qərarı yoxdursa, onu necə cinayətkar elan etmək olar. Axı, bunları cənab Fətullayev bilməmiş deyil.
Əlbəttə kim cinayət törədibsə, titullarından, rütbəsindən asılı olmayaraq qanun qarşısında cavab verməlidir. Amma bunu Fətullayevin elan etməsi mətbuatda çap etdirməsi, sosial şəbəkədə dönə-dönə paylaşması yol verilməzdir.
Digər tərəfədən kimisə, hətta cinayətkar olsa belə, ölümə təhrik etmək ən azı insanlıqdan uzaq haldır.
Fətulalyev gözəl bilir ki, sivil dünya ölüm hökmünü çoxdan ləğv edib.
Amma maraqlıdır ki, Eynulla Fətullayev görəsən Akif Çovdarovun ölümündə niyə bu qədər maraqlıdır..? Məqsəd nədir..? Bəlkə bizim bilmədiyimiz hallar var..?
Bu qısasçılıqdırmı, yoxsa başqa məsələ..?
Bizcə, Eynulla Fətullayev Çovdarovun ölümü ilə böyük bir səhifənin tələm-tələsik qapadılmasında maraqlıdır.
Stalin həmişə deyirmiş ki: “Ölüm – bütün problemlərin həllidir, insan yoxdursa, problem də yoxdur”
Hiss olunur ki, Eynulla Fətullayev keçmiş MTN genaralının sağ qalmasından çox təlaş keçirir.
Fətullayevin Çovdarovun oğluna müraciətlə dedikləri isə, ümumiyyətlə, ürəkbulandırıcıdır.
Cənab baş redaktor sonuncu müsahibəsində Çovdarova məsləhət bilir ki, mundirinə hörmət qoysun.
Eyni məntiqlə Fətullayevə də məsləhət görmək olar ki, sən də öz qələminə hörmət qoy.
NUH.az