NUH.az-ın baş redaktoru Kamran Məhərrəmli

 

 

“MTN generalları”nı göz bəbəyi kimi  "qorumalıyıq"

 

Nə qədər ağır olsa da etiraf etməliyik ki, şərti olaraq “MTN işi” adlandırılan məsələ Azərbaycan dövləti və cəmiyyəti üçün ən azı rüsvayçılıqdır. Bunun başqa bir adı yoxdur. 
Millətin və dövlətin təhlükəsizliyinə məsul olan dövlət qurumu illər uzunu öz rəhbəri Eldar Mahmudovun başçılığı altında dövlət səviyyəsində reketçiliklə, iş adamlarına işgəncə verməklə, quldurluqla və s. məşğul olub.
Bütün bunlardan dövləti idarə edən şəxslərin, hüquq mühafizə orqanlarının xəbəri olub-olmayıb sualını hələlik bir kənara qoyaq. 
Nə qədər rüsvayçılıq olsa da “MTN işi” artıq baş verib və bunu bütün ölkə bilir. Sadəcə, bundan düzgün nəticə çıxartmaqdan söhbət gedə bilər.
“MTN işi” ilə bağlı xeyli sayda dövlət məmurları, generallar, nazir müavinləri həbs olunub.
Mətbuatda gedən rəsmi xəbərlərdən bəlli olur ki, hazırda istintaq prosesi gedir və növbəti ildə həbslər davam edəcək.
Ancaq “MTN işi”ndə əsas fiqurlardan biri MTN-nin Antiterror Mərkəzinin rəis müavini, polkovnik İlqar Əliyev təcridxanada intihar edib və digərlərinin də intihar etməyəcəyinə heç kim zəmanət verə bilməz. Daha doğrusu, həmin şəxslər intihardan sığortalanmayıb.

 

Hiss olunan odur ki, istintaqın obyektiv və sonadək aparılmasında çoxları maraqlı deyil.

 

Hətta vəziyyət o dərəcədə biabırçıdır ki, tanınmış media kapitanı hörmətli Eynulla Fətullayev “MTN işi”nin başçısı sabiq nazir Eldar Mahmudovu intihara çağırır:
“ Eldar Mahmudov, sən də özünə bir güllə çax, qurtul bu rüsvayçılıqdan!!! Adam kişi olar!!!”. 
Axı, Eynulla Fətullayev sıradan biri deyil ki, hirslənib, özündən çıxıb emosional tərzdə belə status yaza. Deməli, ortada sifariş, yaxud nəsə var...
Mən hətta hörmətli Fətullayevin sifarişlə yazmasının da əleyhinə deyiləm. Amma sifarişi də belə primitiv tərzdə yerinə yetirmək olmaz axı...
Və ən əsası normal cəmiyyətdə kimisə intihara səsləmək, adamı sui-qəsdə təhrik etmək ciddi əks səda doğura bilərdi. Təəssüf ki, bizdə belə olmadı.

 

Deməli, “MTN işi” yenidən təkrar oluna bilər və belə olan halda biz bir dövlət və cəmiyyət olaraq bu lənətlənmiş dairədən çıxa bilməyəcəyik.

 

Nə qədər gec deyil, biz “MTN işi”nin obyektiv aparılması üçün çalışmalıyıq. Qoy hər kəs öz günahına və əməlinə görə cavab versin. Və son 10-15 ildə qaranlıq qalan məsələlər açılsın.
...Yeri gəlmişkən, mən bu günlərdə 30 aprel 2009-cu ildə baş vermiş Neft Akademiyası terroru ilə bağlı mətbuatda gedən yazılara nəzər saldım.
Məlumdur ki, həmin terror hadisəsində 13 nəfər vətəndaşımız həlak oldu və 13 nəfər yaralandı. Bu boyda terroru dövlət rəsmlərinin dili ilə mətbuatımız “qanlı hadisə...faciə...təsadüf..” adlandırdı. Hətta məhkəmə materaillarında terrorçu Fərda Qədirovun guya “ sevdiyi qızla evlənməsinə valideynlərinin icazə verməməsi səbəbindən aqressiv olduğu” və cinayət törətdiyi də qeyd olunur.
Bax Azərbaycanın hüquq mühafizə orqanları bu gündədir.
Mən yoğurub-yapıb hər şeyi MTN-in və onun generallarının üzərinə yıxmağı da düzgün hesab etmirəm.
Ancaq vaxtilə Baş prokurorluğun və Ali Məhkəmənin qorxub-çəkindiyi MTN artıq ləğv olunub.
Deməli, ortada həqiqi siyasi iradə və sağlam niyyət olsa istintaqı obyektiv aparmaq mümkündür.
Məncə, Fərda Qədirovla, ümumiyətlə, Neft Akademiyasında baş verən terrorla bağlı Akif Çovdarov çox şey deyə bilər...
Elə bilirəm Akif Çovdarovu, digər MTN generallarını və Eldar Mahmudovu göz bəbəyi kimi qorumalıyıq.
Bu bizim dövlətimizin gələcəyi üçün çox vacibdir.

 

  28 DEKABR 2015-Cİ İL