Seçkiqabağı təbliğat kampaniyası başlayır - reklam şərtləri, qiymətlər

Bu media qurumlarında ödənişli əsaslarla təşviqat həyata keçirilə bilər 

Azərbaycanda sentyabrın 1-də keçiriləcək növbədənkənar parlament seçkilərinin əsas mərhələlərindən biri - deputatlığa namizədliyin irəli sürülməsi başa çatıb. Artıq avqustun 2-dən sonra Milli Məclisə seçkilərdə namizədliyin qeydə alınması üçün müvafiq sənədlərin dairə seçki komissiyalarına təqdim olunması dayandırılıb. 

Növbəti mərhələdə - 2-9 avqust tarixlərində qanunvericiliklə müəyyən olunmuş vaxtda və qaydada təqdim olunan sənədlərə baxılacaq və namizədliyin qeydə alınması ilə bağlı yekun qərarlar veriləcək. 

Ardınca 23 gün davam edəcək seçkiqabağı təşviqat kampaniyası avqustun 9-da start götürəcək və 31-də bitəcək (31 avqust sükut günüdür). 

Qanunla dövlət tərəfindən bu dəfə də namizədə pulsuz efir vaxtı ayrılacaqmı? Hansı telekanallarda? Bəs “Yeni Müsavat” Media Qrupu (qəzet, TV) namizədlərin təbliği üçün hansı qiymətlər təklif edir?

Mərkəzi Seçki Komissiyasının mətbuat xidmətindən “Yeni Müsavat”a bildirilib ki, seçki qanunvericiliyinin tələblərinə uyğun olaraq, Milli Məclisə seçkilərdə seçkiqabağı təşviqat aparmaq məqsədilə ölkə üzrə birmandatlı seçki dairələrinin 60-dan çoxunda namizədləri qeydə alınmış siyasi partiyalara, siyasi partiyaların bloklarına İctimai Televiziya və Radio Yayımları Şirkətində ödənişsiz efir vaxtı, “Azərbaycan” qəzeti, “Xalq qəzeti”, “Respublika” qəzeti və “Bakinski raboçi” qəzetlərində isə ödənişsiz dərc üçün yer ayrılacaq. Bununla yanaşı, ödənişli seçkiqabağı təşviqata qoşulmaqla bağlı 58 media qurumundan təqdim olunan məlumat da MSK-nın rəsmi internet səhifəsində yerləşdirilməklə ictimailəşdirilib. Bu media qurumlarında bütün təşviqat subyektləri üçün bərabərlik prinsipi gözlənilməklə, ödənişli əsaslarla seçkiqabağı təşviqat həyata keçirilə bilər. 

 “Yeni Müsavat” Media Qrupunun baş direktoru Ələsgər Süleymanov da sualımızı cavablandırarkən  deyib ki, hər seçkilərdə olduğu kimi, bu il sentyabrın 1-nə təyin olunmuş növbədənkənar parlament seçkilərində də “Yeni Müsavat” Media Qrupu öz resurslarında bütün namizədlərə bərabər şərtlərlə təbliğat-təşviqat işlərini aparmaq imkanı yaradıb: “Bununla bağlı Mərkəzi Seçki Komissiyasına rəsmi müraciət olunub və bu məlumatlar MSK-nın saytında artıq yerləşdirilib. "Yeni Müsavat" Media Qrupuna aid olan resurslarda təbliğat qiymətləri aşağıdakı kimidir:

1/2 səhifə - 500 (beş yüz) AZN;

1/4 səhifə - 250 (iki yüz əlli) AZN"

“Musavat.com” saytında 10 min işarəyədək, 2 foto ilə - 500 (beş yüz) AZN;

“Minval.az” saytında 10 min işarəyədək, 2 foto - 300 (üç yüz) AZN;

“TV Müsavat” internet televiziyası, tam veriliş - 1000 (bir min) AZN;

“TV Müsavat” internet televiziyası, 1 (bir) saniyəsi- 10(on) AZN.

Bütün qeydiyyata alınmış namizədləri media qrupumuzun resurslarından yararlanmağa dəvət edirik".

Bu arada, Mərkəzi Seçki Komissiyası (MSK) Milli Məclisə seçkilərlə əlaqədar aşağı seçki komissiyaları üçün treninqlərə başlayıb. MSK-dan verilən məlumata görə, 2024-cü il sentyabrın 1-nə təyin edilmiş Milli Məclisə növbədənkənar seçkilərlə əlaqədar Mərkəzi Seçki Komissiyasının (MSK) fərqli statuslu seçki iştirakçıları üçün müxtəlif istiqamətlər üzrə maarifləndirmə layihələri intensiv şəkildə davam edir. Komissiyanın maarifləndirmə proqramı çərçivəsində ümumrespublika miqyaslı növbəti layihəyə - aşağı seçki komissiyalarının üzvləri üçün treninqlərə başlanılıb. Öncə onu qeyd etmək lazımdır ki, MSK-nın nüfuzlu beynəlxalq təşkilatlarla sıx əməkdaşlığı şəraitində 22 il bundan əvvəl - 2002-ci ildə əsası qoyulan treninq layihəsi ilbəil təkmilləşdirilib, xüsusilə 2008-ci ildən sonra yeni forma və məzmun əlavə olunmaqla daha da genişləndirilib. MSK-nın mühüm əhəmiyyət verdiyi və daim məxsusi diqqət yetirdiyi treninqlər, bir qayda olaraq, ölkəmizdə keçirilən bütün seçkilərdə təşkil edilməklə, dairə və məntəqə seçki komissiyaları üzvlərinin məlumatlılığının, bilik və bacarıqlarının, o cümlədən işgüzar və peşəkar vərdişlərinin yüksəldilməsində müstəsna rol oynayır.

Qarşıdan gələn Milli Məclisə seçkilərlə əlaqədar treninqlər MSK-nın maarifləndirmə proqramına əsasən iki mərhələli formatda keçiriləcək. Layihənin “Trenerlər üçün treninq” adlı birinci mərhələsinə avqustun 5-dən start verilib və müxtəlif əyani, metodiki, habelə yardımçı vəsaitlərdən istifadə olunmaqla, tam praktiki məşğələlər şəklində təşkil edilib. Beş gün fasiləsiz keçiriləcək bu treninqlərə ölkə üzrə 125 seçki dairəsi dairə seçki komissiyasının hər birindən iki təmsilçi olmaqla, ümumilikdə 250 yerli trener cəlb olunur. Treninqlər zamanı iştirakçılara seçki günü məntəqə seçki komissiyası üzvlərinin rol və vəzifələri, seçki məntəqələrinin səsverməyə hazırlanması, səsvermə prosesi, seçki günü müstəsna hallar, səslərin sayılması və səsvermənin nəticələri müəyyənləşdirilərək rəsmi protokolların doldurulması da daxil olmaqla, bütün prosedurlar barədə aydın və əhatəli məlumat verilir.

Seçki günü prosedurları, səsvermə hərəkətləri və qarşıya çıxa biləcək müstəsna hallar izah edilərkən praktiki məşğələlərə geniş yer verilir, müxtəlif məqamlar əyani şəkildə səhnələşdirilərək təqdim olunur və yaranan suallar yerindəcə cavablandırılır.

Treninq layihəsinin avqustun 12-dən başlanacaq ikinci mərhələsi məntəqə seçki komissiyalarının bütün üzvlərini əhatə etməklə, seçki dairələri üzrə məntəqə seçki komissiyalarının sayına uyğun olaraq, 3-10 gün davam edəcək. Bu mərhələnin də maksimum effektiv, praktiki və informativ olması üçün treninqlərin MSK-nın Treninq qrupu tərəfindən hazırlanan cədvəl əsasında kiçik qruplarla - təqribən 40 nəfərədək aşağı seçki komissiyası üzvünün iştirakı ilə keçirilməsi nəzərdə tutulur.

Həm təlimlərdə istifadə etmələri, həm də seçki günü prosedurları ilə yaxından tanış olmaları məqsədilə treninqlərə cəlb edilən bütün iştirakçılar MSK-nın hazırladığı “Seçki günü üçün yaddaş” kitabçası, səsvermənin nəticələrinə dair protokol nümunəsi, habelə digər əyani və metodiki vəsaitlərlə təmin olunacaqlar. Treninq layihəsi ümumilikdə 40 minə yaxın aşağı seçki komissiyası üzvünü əhatə edir.