Prezidentinin nümayəndələri - 10 NƏFƏR

Deputat: “Muxtar Babayevin bu təyinatı dövlətimizin qlobal iqlim məsələlərinə xüsusi diqqətinin ifadəsidir”

Muxtar  Babayevin Azərbaycan Respublikası Prezidentinin iqlim məsələləri üzrə nümayəndəsi təyin edilməsi ona beynəlxalq danışıqlarda və müxtəlif xüsusi missiyalarda iştirak etməyə imkan verəcək. Yeri gəlmişkən, M.Babayevin Prezidentin İqlim məsələləri üzrə nümayəndəsi təyin olunması ilə Azərbaycan Prezidentinin nümayəndələrinin sayı 10-a çatıb.

10 xüsusi nümayəndənin ikisi xüsusi tapşırıqlar üzrə nümayəndə statusu daşıyır: Elçin Əmirbəyov və Xələf Xələfov.

Fuad Nəcəfli Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəsi kimi fəaliyyət göstərir.

Prezidentin xüsusi nümayəndələri işğaldan azad edilmiş ərazilərdə də mövcuddur: Şuşa rayonunda Aydın Kərimov, Ağdam, Füzuli və Xocavənd rayonlarında Emin Hüseynov, Xankəndi şəhərində, Ağdərə və Xocalı rayonlarında Elçin Yusubov, Cəbrayıl, Qubadlı və Zəngilan rayonlarında Vahid Hacıyev, Laçın rayonunda Məsim Məmmədov, Kəlbəcər rayonunda Bəşir Hacıyev.

Yada salaq ki, beynəlxalq iqlim sazişi 2015-ci ildə Parisdə hazırlanıb və 200-ə yaxın ölkə tərəfindən ratifikasiya olunub. Bundan sonra BMT də daxil, bir sıra təşkilatlarda və dövlətlərdə belə bir post təsis edilib. 2024-cü il mayın 15-də Rusiya prezidenti Vladimir Putin öz köməkçisi Ruslan Edelgeriyevi iqlim məsələləri üzrə xüsusi nümayəndə təyin edib. ABŞ prezidentinin İqlim üzrə xüsusi elçisi  vəzifəsini 2021-ci ildən Con Kerri tutur. 2023-cü ildə ATƏT PA-nın sədri Pia Kauma (Finlandiya) Pere Xuan Ponsu (İspaniya) iqlim dəyişikliyi üzrə xüsusi nümayəndə təyin edib.

İqlim dəyişikliyi təhlükəsi qlobal siyasi və iqtisadi kontekstdən asılı olmayaraq aktual olaraq qalır və ötən il COP29-a ev sahibliyi etmiş Azərbaycan üçün iqlim gündəliyi ilə bağlı məsələlər onun beynəlxalq siyasətinin önündə durur. Ölkəmiz “yaşıl enerji”nin təşviqi istiqamətində  atdığı addımlarla yanaşı, iqlimin tənzimlənməsi sahəsində öz öhdəliklərini həmişə yerinə yetirib. Bu gün iqlim problemi beynəlxalq əməkdaşlığın azsaylı sahələrindən biridir. Azərbaycan hesab edir ki, problemin qlobal xarakterini nəzərə alaraq, iqlim dəyişikliyinə uyğunlaşma üzrə vahid siyasətin birgə müzakirəsi beynəlxalq əməkdaşlığın strateji əhəmiyyətli sahəsidir.

Qeyd etmək yerinə düşər ki, hazırda ətraf mühit problemləri və yaşıl transformasiya dünyanın əsas qlobal çağırışlarından biridir. İqlim dəyişikliyi, ekosistemlərin tənəzzülü, hava və suyun çirklənməsi, biomüxtəlifliyin azalması və dayanıqlı resurs istifadəsi kimi məsələlər ölkələrin iqtisadi və sosial siyasətinə ciddi təsir göstərir. Bunun fonunda, yaşıl transformasiya həm texnoloji, həm də iqtisadi baxımdan yeni imkanlar yaradır. Bir çox ölkələr bərpa olunan enerji mənbələrinə keçid, ekoloji standartların sərtləşdirilməsi və karbon neytrallığı hədəfləri ilə bağlı ciddi addımlar atırlar. Eyni zamanda “yaşıl maliyyə” və “dövri iqtisadiyyat” kimi anlayışlar daha çox ön plana çıxır. Digər tərəfdən, COP29-a ev sahibliyi etməsi ölkəmizi iqlim diplomatiyasında daha fəal oyunçuya çevirir və yaşıl transformasiya istiqamətində konkret addımların atılmasını zəruri edir.

Xüsusilə Qarabağ və Şərqi Zəngəzurda “yaşıl enerji zonası”nın yaradılması və külək-günəş enerjisinə investisiyaların artırılması Azərbaycanın 2050-ci ilə qədər karbon neytrallığı hədəflərinə çatmaq üçün əsas strategiyalarından biridir. COP29 çərçivəsində iqlim dəyişikliyinə qarşı mübarizə üçün maliyyə resurslarının səfərbər edilməsi, inkişaf etməkdə olan ölkələrin dəstəklənməsi və texnologiya transferinin sürətləndirilməsi əsas müzakirə mövzularındandır. Azərbaycan COP29 vasitəsilə iqlim məsələlərində qlobal dialoqun önündə olmaq və beynəlxalq əməkdaşlıq üçün platforma yaratmaq imkanına sahibdir. Bu, ölkəmizin iqtisadi-siyasi mövqelərinin güclənməsinə də təsir edəcək. Su ehtiyatlarının səmərəli idarə olunması, torpaqların deqradasiyasının qarşısının alınması və ekosistemlərin qorunması sahəsində daha fəal tədbirlər görülməsi vacibdir. Azərbaycanın bu məsələlərdə aktiv mövqedə olması ölkəmizin beynəlxalq nüfuzunu artırmaqla yanaşı, milli iqtisadiyyatın davamlı inkişafına da töhfə verəcək.

Fatma Yıldırım

Milli Məclisin Təbii ehtiyatlar, energetika və ekologiya komitəsinin sədr müavini Fatma Yıldırım mövzu ilə bağlı “Yeni Müsavat”a fikrini bildirib: “Hazırda dünyada əsas qlobal çağırışlardan biri ətraf mühit problemləri, yaşıl transformasiyalarla bağlıdır. İqlim dəyişikliyi təhlükəsi qlobal siyasi və iqtisadi kontekstdən asılı olmayaraq aktual olaraq qalır. Beynəlxalq iqlim sazişi 2015-ci ildə Parisdə hazırlanıb və 200-ə yaxın ölkə tərəfindən ratifikasiya olunub. Bu ölkələr qlobal iqlim dəyişikliyinin qarşısını almaq üçün tədbirlər görməyə razılaşıblar. Ölkəmiz də bu mühüm çağırışa son dərəcə həssaslıqla yanaşır və gördüyü tədbirlərlə qlobal həmrəyliyə dəstəyini verir. Ötən ilin noyabrında COP29-a ev sahibliyi etmiş Azərbaycan üçün iqlim gündəliyi ilə bağlı məsələlər onun beynəlxalq müstəvidə siyasətinin ön sıralarında dayanır.  Ölkəmiz  yaşıl enerjinin təşviqi istiqamətində  atdığı addımlarla yanaşı, iqlimin tənzimlənməsi sahəsində öz öhdəliklərini həmişə yerinə yetirib”.

Millət vəkilinin sözlərinə görə, problemin qlobal xarakterini nəzərə alaraq, iqlim dəyişikliyinə uyğunlaşma üzrə vahid siyasətin birgə müzakirəsi  beynəlxalq əməkdaşlığın strateji əhəmiyyətli sahəsidir: “Muxtar  Babayevin Azərbaycan Prezidentinin iqlim məsələləri üzrə nümayəndəsi təyin edilməsi də dövlətimizin qlobal iqlim məsələlərinə xüsusi diqqətinin ifadəsidir. Nəzərə alaq ki, belə bir təyinat digər dövlətlərin və beynəlxalq təşkilatların təcrübəsində mövcuddur. Digər tərəfdən, iqlim dəyişiklikləri ilə mübarizə beynəlxalq ictimaiyyət üçün aktual problem və çağırış olaraq qalır. Bu mənada, belə bir təyinat beynəlxalq tədbirlərdə və danışıqlarda ölkəmizin təmsilçiliyi üçün vacibdir”.