Ukrayna məxfi arxivləri AÇDI - Çernobılla bağlı sirlər ÜZƏ ÇIXDI

Çernobıl AES-də baş vermiş qəzanın 40-cı ildönümü ərəfəsində Ukraynada onilliklər ərzində "məxfi" qrifli altında saxlanılan arxiv materialları təqdim olunub.

Musavat.com Ukrayna mediasına istinadən xəbər verir ki, bu sənədlər artıq həm tədqiqatçılar, həm də geniş ictimaiyyət üçün əlçatandır.

Ukrayna Ədliyyə Nazirliyinin məlumatına görə, materiallar Kiyev Vilayət Dövlət Arxivinin direktoru Sofya Kameneva tərəfindən təqdim edilib.

Sənədlərin bir hissəsi UNESCO-nun "Dünyanın yaddaşı" proqramının Beynəlxalq Reyestrinə daxil edilib ki, bu da onlara qlobal tarixi irs statusu qazandırır.

Arxiv fondlarında hökumət qərarları, hesabatlar, təxliyə materialları, radiasiya məruz qalmasının təsirləri ilə bağlı tibbi hesabatlar, çirklənmə xəritələri, vətəndaşların məktubları, fotoşəkillər və video materiallar var.

Nazirlikdən bildirilib ki, bu sənədlər 26 aprel 1986-cı il qəzasından sonrakı hadisələri, həmçinin faciənin əhaliyə və ərazilərə təsirini tam dolğunluğu ilə bərpa etməyə imkan verir. Qurumun vurğuladığına görə, faciə şahidlərinin sayı azaldıqca, faktları və fəlakətin nəticələrini özündə yaşadan arxiv irsinin əhəmiyyəti daha da artır.

"Çernobıl AES-dəki qəza ilə bağlı sənədli irs bəşəriyyətin qlobal yaddaşının bir hissəsidir", - deyə rəsmi məlumatda qeyd olunur.