Putin naharda səni yeyər, dostun olan o diktator… – Harrislə Tramp arasındakı debatın MƏTNİ

ABŞ prezidentliyinə namizədlər Kamala Harris (demokrat) və Donald Tramp (respublikaçı) ilk televiziya debatı keçiriblər.

SAVASH.MEDİA xarici KİV-ə istinadən xəbər verir ki, teledebat Pensilvaniya ştatının Filadelfiya şəhərində baş tutub. “ABC” telekanalının aparıcılarının suallarını cavablandıran siyasətçilər bir-birini tənqid edib, yalan danışmaqda ittiham ediblər.

Debatın əvvəlində Harris bildirib ki, tamaşaçılar Trampdan “çoxlu yalan və şikayətlər” eşidəcəklər. Tramp isə xanım rəqibini “marksist” adlandırıb və onun fəaliyyətini Stenford Universitetinin keçmiş iqtisadçısı olmuş atasının işi ilə əlaqələndirməyə cəhd edib.

İqtisadiyyat mövzusunda sualları cavablandırarkən Harris özünü perspektivli namizəd kimi təqdim edib və deyib ki, onun “imkanlar iqtisadiyyatı” yaratmaq üzrə planı var. O, kiçik biznesə, gənc ailələrə kömək edəcəyinə və mənzil qiyməti problemi ilə məşğul olacağına söz verib.

“Donald Tramp bizi ən ağır işsizliklə üz-üzə qoydu. Bizim (demokratların) etdiyimiz tək şey – Donald Trampın yaratdığı qarışıqlığı aradan qaldırmaq oldu”, – deyə Harris iddia edib.

Tramp deyib ki, ABŞ-də ölkəni məhv edən inflyasiya səbəbindən “dəhşətli iqtisadiyyat” var. O, bildirib ki, dörd il ərzində demokratlar iqtisadiyyatı məhv etdilər.

Harris isə Trampın xarici malların idxalına rüsumları artırmaq niyyətini tənqid edib. Tramp buna cavab olaraq bildirib ki, bu, qiymət artımına gətirib çıxarmayacaq.

Aparıcının 2023-cü il oktyabrın 7-də HƏMAS-ın İsrailə hücumu ilə bağlı sualını cavablandıran Tramp bir daha təkrar edib ki, o, ABŞ prezidenti olsaydı, hücum baş verməzdi.

“Əgər o (Harris) prezident olarsa, hesab edirəm ki, iki ildən sonra İsrail mövcud olmayacaq”, – deyə Tramp iddia edib.

Harris, öz növbəsində, İsrailin özünümüdafiə hüququna malik olduğu fikrini təkrarlayıb, lakin bunu onun necə etməsinin vacib olduğuna diqqəti cəlb edib: “Bu müharibə bitməlidir. O dərhal bitməlidir”.

Ukraynadakı müharibədən bəhs edərkən Tramp da bildirib ki, müharibə dayandırılmalıdır. Onun sözlərinə görə, o, prezident olsaydı, Rusiya heç vaxt Ukraynaya təcavüz etməzdi.

O, nəzərə çatdırıb ki, Rusiya prezidenti Vladimir Putini və Ukrayna prezidenti Vladimir Zelenskini yaxşı tanıyır: “Mən bunu tez həll edərdim. Əgər prezident seçilsəm, Ukrayna ilə Rusiya arasında müharibə bitəcək”.

Harris rəqibinə müraciət edərək deyib: “Siz artıq prezident olmadığınız üçün NATO üzrə müttəfiqlərimiz çox minnətdardırlar”.

Harrisin fikrincə, Tramp prezident olsaydı, Putin hazırda Kiyevdə oturub, Polşadan başlayaraq Avropanın qalan hissəsinə baxardı”: “Siz bir diktatorla dost olduğunuzu düşünürsünüz, amma o, sizi naharda yeyərdi”.

O, həmçinin Trampı Şimali Koreya lideri Kim Çen Inla xoş münasibətdə olmaqda ittiham edib.

Son illərdə ABŞ üçün mühüm problemə çevrilmiş abort məsələsinə gəlincə, Tramp 2022-ci ildə abort hüquqlarının konstitusiya müdafiəsini ləğv edən və məsələni ayrı-ayrı ştatların ixtiyarına buraxan ABŞ Ali Məhkəməsinin qərarını dəstəkləyib.

Harris isə abort üçün konstitusiya hüququnun bərpasını müdafiə edib. O, dövlətlərin abortla bağlı öz məhdudiyyətlərini tətbiq etməyə başladıqdan sonra qadınların üzləşdiyi çətinliklərdən danışıb. Demokratların namizədi rəqibinin bu məsələ ilə bağlı siyasətinin amerikalı qadınları incitdiyini deyib.

Miqrasiya mövzusunda sualları cavablayarkən Tramp bildirib ki, ABŞ-də təhlükəsizlik vəziyyəti qeyri-qanuni miqrantlar səbəbindən pisləşib. Onun sözlərinə görə, Bayden-Harris administrasiyası “milyonlarla miqrant və cinayətkarı” ölkəyə buraxıb.

Tramp ABŞ-nin “güclü sərhədə və möhkəm divarlara” ehtiyacı olduğunu vurğulayıb.

Harris isə Trampı silah, narkotik və insan alveri ilə məşğul olan transmilli cinayətkar təşkilatları izləmək üçün sərhəd xidmətinə əlavə personal verəcək qanun layihəsinin qəbuluna mane olduğuna görə qınayıb.

Qeyd edək ki, ABŞ-dəki milli sorğular namizədlər arasında fərqin əvvəlki tək çox böyük olmadığını göstərir.

Xatırladaq ki. ABŞ-də prezident seçkiləri noyabrda keçiriləcək.