Ramiz Mehdiyevin -barmağı- ilə azadlıq: 8 milyonluq dələduzluq -qəhrəman-ı Elnur İbrahimov həbsdən necə qurtuldu

Külli miqdarda dələduzluqda təqsirli bilinmiş Elnur İbrahimovun vaxtından əvvəl cəzadan azad edilməsi və məntəqə tipli müəssisəyə yerləşdirilməsində birbaşa Ramiz Mehdiyevlə bağlı məqamlar var.

Məlum olur ki, Elnur İbrahimovun 9 illik cəzasının 1 il 2 ayını ona “bağışlayan” hakim Nigar Qədirli Ramiz Mehdiyevin xeyir-duası ilə Nizami Rayon Məhkəməsinə göndərilib. Cəmi üç illik fəaliyyəti dövründə Nigar Qədirli çoxsaylı qanunsuz qərarlara imza atıb. Nəticədə onu məhkəmə sistemindən uzaqlaşdırıblar. Nigar Qədirli vasitəsilə qanunsuz azad edilən Elnur İbrahimovun göndərildiyi 3 saylı Məntəqə Tipli Cəzaçəkmə Müəssisəsi də Ramiz Mehdiyevə yad deyil. Həmin dövrdə müəssisənin rəisi Toğrul Səmədov olub. Onun atası Saleh Səmədovun Ramiz Mehdiyevlə çox yaxın əlaqələri olduğu bildirilir. Bu əlaqələr vasitəsilə Saleh Səmədov geniş varidat toplayıb, övladlarını müxtəlif postlara yerləşdirə bilib.

Bu, həmin Saleh Səmədovdur ki, bu ilin mayında-Faşizm üzərində Qələbə Günü münasibətilə keçirilən tədbirdə SSRİ bayrağı altında, sinəsində rus imperiyasının rəmzi sayılan “Georgi lenti” ilə çıxış edib. İmişli Ağsaqqallar Şurasının sədri olan Səmədovun Ramiz Mehdiyevlə yaxın əlaqələri hamıya məlum idi. Məlumatlara görə, onun SSRİ bayrağı altında “Georgi lenti” ilə çıxışı da sonrakı- Mehdiyevin revanş planına hazırlıq çərçivəsində baş verib. Bir müddət sonra Saleh Səmədov Dövlət Təhlükəsizliyi Xidməti (DTX) tərəfindən mənimsəmə ittihamı ilə həbs edilib.

Ramiz Mehdiyev - Elnur İbrahimov əlaqəsi

Sual oluna bilər ki, Mehdiyevin külli miqdarda dələduzluqda ittiham olunan Elnur İbrahimova nə aidiyyatı var?

Məsələ ondadır ki, Elnur İbrahimov həbsinə qədər Ramiz Mehdiyevin yaxın çevrəsində olan, sabiq “qaçaq səfir” Elmira Axundovanın evinin daimi sakinlərindən biri olub.
 O, Axundovların ad və şad günlərində daim “yuxarı başa” keçirilib. Axundovanın Ramiz Mehdiyevlə münasibətləri və əlaqələri isə hər kəsə bəllidir. Elnur İbrahimovun qanunsuz azad edilməsi ilə bağlı hakim Nigar Qədirlinin qərarından zərərçəkənlər Bakı Apellyasiya Məhkəməsinə şikayət veriblər. İş üzrə hakim Zəfər Əhmədovun sədrliyi ilə hazırlıq iclası keçirilib.

Elnur İbrahimov 31 yanvar 2019-cu ildə Bakı Ağır Cinayətlər Məhkəməsinin hökmü ilə Cinayət Məcəlləsinin 178.3.2-ci (külli miqdarda ziyan vurmaqla dələduzluq) maddəsi ilə təqsirli bilinərək 9 il azadlıqdan məhrum edilib. Məhkəmədə zərərçəkmişlər bildiriblər ki, 8 milyon manat vəsait dələduzluq yolu ilə ələ keçirilib və pulları o zaman deputat olan Elmira Axundovanın oğlu Həbib Axundova verdiklərini təsdiqləyiblər. Məhkəməyə Həbib Axundovla bağlanan müqavilələr, həmçinin Elmira Axundovanın səs yazıları təqdim olunub.

Məhkəmə zərərçəkmiş Fərman Məmmədovun 350 min manatlıq mülki iddiasını da təmin edib və Elnur İbrahimovu həbsə göndərib. Lakin təqdim olunan Axundovlarla bağlı sənədlərə və səs yazılarına hüquqi qiymət verilməyib.

“İslah” teatrı: yataq səliqəsi və təşəkkürlər

Elnur İbrahimov cəzaçəkmə müəssisəsində olduğu müddətdə zərərçəkmişlərə 1 manat belə ödəməyib. Buna baxmayaraq, 6 saylı Cəzaçəkmə Müəssisəsi onun “islah olunduğunu” sübut etmək üçün formal mülahizə hazırlayıb.  Həmin mülahizədə Elnur İbrahimovun “yatağını səliqəli saxlaması”, “şəxsi gigiyena qaydalarına riayət etməsi” və “iki dəfə təşəkkür alması” qeyd olunub.

Amma maraqlıdır, bu təşəkkürlərin səbəbi nədir?

Birinci təşəkkür 26 may 2018-ci ildə, o isə hələ təqsirləndirilən şəxs idi. İkinci təşəkkür 15 aprel 2024-cü ildə verilib. Tarixlərin absurdluğu açıq-aşkardır: təşəkkürlərin heç biri hüquqi əhəmiyyət daşımır, amma Nizami Rayon Məhkəməsinin hakimi bunu “islah sübutu” kimi qəbul edib.

Hakimlər və müəssisə rəhbərləri “dələduzun tərəfində”

Böyük biabırçılığa vaxtilə Ali Məhkəmə sədri Ramiz Rzayevin işçisi olmuş, sonradan Nizami Rayon Məhkəməsinə təyinat almış hakim Nigar Qədirli imza atıb. Nəticədə formal sənədlərlə Elnur İbrahimov cəzasının 1 il 2 ay 16 gününü məntəqə tipli müəssisədə keçirməklə faktiki olaraq azadlığa çıxıb. Məhkəmə qərarından nə zərərçəkmişlər, nə də mülki iddiaçılar xəbərdar edilib. Halbuki Konstitusiyanın 60-cı maddəsi və Cinayət-Prosessual Məcəllə açıq şəkildə tələb edir ki, məhkumun cəzası yüngülləşdirilərkən zərərçəkmişlərin mövqeyi nəzərə alınmalıdır. Bu, edilməyib. Qərar açıq qanun pozuntuları ilə qəbul olunub. 6 saylı Cəzaçəkmə Müəssisəsinin rəisi Fariz Əliyev, onun tərbiyə işləri üzrə böyük inspektoru Ziyadxan Eminov və rəis müavini Elçin İlyasov - Elnur İbrahimovun “dişlərini yumasına valeh olan” məmurlardır. Baş Prokurorluğun prokuroru etiraz etsə də, qərardan protest verməyib. Məhkəmə videokonfrans vasitəsilə keçirilib, lakin bunun hüquqi əsası göstərilməyib. Unudulmamalıdır ki, Elnur İbrahimov 3 iyul 2014-cü ildə ölkədən qaçıb, yalnız 2016-cı ilin noyabrında Moskvada tutulub və Azərbaycana ekstradisiya olunub. 2022-ci ildə isə onun əfv üçün müraciəti rədd edilib. Bütün bu mənfi faktlara baxmayaraq, 6 saylı müəssisənin formal “mülahizəsi” əsas götürülüb və nəticədə o, 1 il 3 ay cəzadan yayınmağa nail olub.

Kağız üzərində ədalət, real həyatda haqsızlıq

Elnur İbrahimovun “islahı” yalnız yatağını səliqəli saxlaması, şəxsi gigiyena qaydalarına riayət etməsi və formal təşəkkürlərlə “sübut” edilir. 350 min manatlıq ziyanın ödənilməsi isə hələ də təmin olunmayıb. Bu hadisə, Azərbaycanın hüquq sistemində korrupsiya, formalizm və zərərçəkmişlərin hüquqlarının görməzdən gəlinməsinin növbəti nümunəsidir. Elnur İbrahimovun azad edilməsinə yol açan məhkəmə qərarı qanunvericiliyə zidd olaraq qəbul edilib, zərərçəkmişlərin mövqeyi nəzərə alınmayıb, qərarın əsaslandırılması isə yalnız formal sənədlərə söykənib. Qısası, kağız üzərində ədalət var, real həyatda isə ədalət yoxdur. Azərbaycan məhkəməsi bu dəfə də haqqı pozulan vətəndaşın yox, dələduzun tərəfində dayanıb.

Elşən MƏMMƏDƏLİYEV
Musavat.com