Son xəbərlər:

Emin Sabitoğlu: Mən sizə gələcəyəm, vallah, gələcəyəm...

Cəmiyyət2 noyabr 2017 17:47

Bugün Bakıda yağış yağır, əsl payız havası hökm sürür. Bugün payızda doğulan, payızda sevgisini yaşayan, elə payızda da dünyasını dəyişən, adı dillər əzbəri, dahi bəstəkar Emin Sabitoğlunun 80 illik yubileyidir. 1937-ci il noyabr ayının 2-də dünyaya göz açan bəstəkar 2000-ci il 18 noyabrda dünyasını dəyişib.

Səhər işə təzəcə gəlmişdim ki, Emin Sabitoğlunun doğum günü olduğunu öyrəndim. Qəhvəmi götürüb, sözləri Paşa Qəlbinura, musiqisi Emin Sabitoğluna aid "Mən sizə gələcəm” mahnısını dinləyərək bəstəkarın həyatını araşdırmağa başladım. Söhbətə də elə dinlədiyim musiqinin tarixçəsini sizinlə paylaşaraq başlayıram.

Xanımı Xədicə Abbasovanın dilindən...

"Məni çox qısqanırdı. Yazdığı bütün mahnıları sevgimizə həsr etmişdi. Son vaxtlar Paşa Qəlbinurun sözlərinə bir mahnı yazdı və dedi ki, mən həyatda olmayanda bu mahnını Azərbaycana ithaf edərək oxuyarsan. Sözləri belə idi: "Mən sizə gələcəyəm, vallah gələcəyəm”. Dedim, birlikdə oxuyarıq, dedi, yox, sən oxuyacaqsan. Dedim, Allah gecindən versin, elə bir şey olsa, mən onu sənə ithaf edib oxuyaram, maestro. Xoşuna gəldi, gözləri doldu”.

2000-ci il 18 noyabrda dünyasını dəyişən bəstəkar son mahnısını elə 2000-ci il 2 noyabrda yazıb: "Ondan sonra dinlədiyim mahnı budur: "Mən niyə baxıram yollara, niyə, sən ki, bu yollardan dönən deyilsən”. Noyabrın 2-də onun ad günü idi, Bakı mətbəxini qutabını, düşbərəsini hazırladım. İstanbuldakı azərbaycanlılar gəldilər bizə. Axşam hamı gedəndən sonra dedi ki, təzə mahnı yazmışam:

Əlvida, bu son gecə, salamat qal, Xədicə.
Əlvida, qara gözlər, əlvida, tatlı sözlər,
Əlvida, qara saçlar, ürəyimi paralar.

Əlvida Xədicəm, səni çox özləyəcəm...

Hər zaman böyük əsərlərin, dahi şəxsiyyətlərin formalaşmasının ən böyük səbəbi kimi sevgini görmüşəm. İnsan yaşamadığı heç nəyi yaşada bilməz. Yaranan hər obrazın, hər əsərin, hər qafiyənin, hər musiqinin ilham mənbəyi olmalıdır. Ən təsirli, ən şirin, ən acı hiss isə məhəbbətdir. Emin Sabitoğlunun həyatını araşdırarkən bu fikir mənim üçün bir daha sübut olundu. Arada 20 yaş fərq və başqa bir ailə həyatı olmasına baxmayaraq, yaşanan bu sevgi bizlərə "Gecə yağışı”, "İstəməm”, "Mən sizə gələcəyəm, vallah, gələcəyəm” və s. bu kimi neçə-neçə gözəl əsər qazandırıb. Müğənni Xədicə Abbasova ilə ömrünün "ikinci bahar”ını yaşayan bəstəkarın bu evlilikdən övladı olmasa da, onun ilk evliliyindən Ceyran adlı bir qızı var.

Ceyran Mahmudovanın atası haqqında son xatirələri...

"Atam çox istedadlı insan idi. Moskva Konservatoriyasına imtahan verərkən onun simfoniyası "əla" qiymətləndirilmişdi. Ötən əsrin altmışıncı illərində isə Moskvada "əla" qiymət almaq hər adamın işi deyildi. Sonralar mahnı janrına daha çox vaxt ayırdı. Amma bu, indiki mahnı anlamından çox fərqli bir fəaliyyət idi. Atamın musiqi müəllifi olduğu elə təkcə tammetrajlı bədii filmlərin sayı 22-dir. 40-a yaxın müxtəlif xronometrajlı tele və kino filmlərində də onun musiqisi səslənir. 9 musiqili komediyası var. Atamın sayəsində mən lap kiçik yaşlarımdan ən gözəl musiqi sədalarını dinləmişəm. Xüsusən, Üzeyir bəyin musiqisi evimizdən əskik olmurdu. Evdə babam Sabit Rəhmandan qalan çox zəngin kitabxanamız var idi. Atam isə bu kitabxananı daim zənginləşdirirdi. Şairlər də öz kitablarını tez-tez atama bağışlayırdılar ki, bəlkə hansısa mahnısını bəstələyəndə onun diqqətini cəlb edə.

Emin Sabitoğlu nadir bəstəkarlardandır ki, onun mahnılarında melodiya ilə mətn arasında mütləq bir harmoniya var. Atam sanki bütünlüklə melodiyadan ibarət idi. Mahnılarını çox rahat bəstələyirdi. Əlinin altında nə olsaydı, notları onun üstünə qeyd edirdi. Hər dəfə də mahnı hazır olandan sonra bizim üçün çalırdı. Deyirdi, qulaq asın görün, hansısa başqa mahnıya oxşamır ki? Bu, onun üçün prinsipial məsələ idi - heç kimə bənzəməmək.

Vəfatından bir az əvvəl mənə dedi ki, mənim də haqqımda kitab yaz. Dedim ki, yazaram. Amma yaxın insan haqqında kitab yazmağın öz çətinlikləri var. İndi artıq özümü belə bir kitab yazmağa hazır sayıram. Yaxın vaxtlarda atamın istəyini gerçəkləşdirəcəm”.

Bəstəkarın haqqında kitab yazılması ilə bağlı arzusunu həyat yoldaşı Xədicə Abbasova da reallaşdırmaq niyyətindədir:

"Sevgimizdən, onunla yaşadığım illərdən kitab yazmağa başlamışam: "Eminsiz Eminli günlər”. Xronoloji kitab olsun istəmirəm. Bizim onunla çox gözəl günlərimiz, gülməli hekayələrimiz olub. İstəyirəm bu yaşananların hamısını əhatə edən axıcı bir roman olsun. Bir də Emindən mənə qalan tək şeyi, royalını o zamanlar ehtiyacdan məcbur qalıb Müdafiə Nazirliyinə satmışdım. İstəyirəm işləyib müəyyən qədər pul yığdıqdan sona Bakıya qayıdım. "Bu gecə” adlı yalnız dəvətnamə ilə Emini sevərlər üçün nəzərdə tutulmuş klub açım. Royalı geri alıb ora qoyum. Eminin yarıda qalmış bəstələrini tamamlayım. Mən son nəfəsimə qədər Eminlə yaşayacağam”.

Xatırladaq ki, xalq artisti, əməkdar incəsənət xadimi, dövlət mükafatı laureatı, professor Emin Sabitoğlunun anadan olmasının 80 illik yubileyi Prezident İlham Əliyevin sərəncamı ilə qeyd olunacaq.

Qaynarinfo.Az