Pul xərcləməyin mənasız olduğu 5 sahə - Milyarderdən tövsiyyə

Dünən, 23:35

Amerikalı milyarder və investor İorren Baffet şəxsi maliyyə vərdişləri və sərmayə intizamı ilə tanınır. 

Qaynarinfo xəbər verir ki, "Newtraderu" nəşrinin yazdığına görə, o, insanların sərvət toplamasına mane olan maliyyə "tələləri” mövzusunda xəbərdarlıq edib. 
Baffet 5 əsas məsrəf sahəsini mənasız hesab edir və bunlardan uzaq durmağı tövsiyə edir.
1. Yeni avtomobillər
Baffetə görə, yeni avtomobil almaq ən yanlış maliyyə qərarlarından biridir. O bildirir ki, avtomobil sadəcə nəqliyyat vasitəsidir, status göstəricisi və ya sərmayə deyil.
Yeni və ikiillik avtomobil arasında ciddi qiymət fərqi olur, bu isə artıq xərclərə səbəb olur. Milyarder köhnə, lakin etibarlı avtomobillərə üstünlük verilməsini tövsiyə edir. Bu yanaşma sərmayə üçün daha çox maliyyə vəsaiti saxlayır.
2. Yüksək faizli kreditlə alış-veriş
Baffet yüksək faizli kredit kartlarını "maliyyə fəlakətinə yol" adlandırır. "Əgər mən 18-20 faizlə borc alsaydım, müflis olardım", deyə o qeyd edir.
Kredit kartları borc tələsinə düşməyə səbəb olur və sərvət toplamağa imkan vermir. O, əsasən nağd alış-veriş edir və ilk növbədə yüksək faizli borcların ödənilməsini zəruri sayır, çünki bu qənaət hər hansı riskli investisiyadan daha çox fayda gətirə bilər.
3. Qumar və lotereya biletləri: "Riyaziyyat bilməyənlərin vergisi"
Baffet dəfələrlə qumar və lotereya oyunlarını sərvət qazanmaq üçün yanlış üsul adlandırıb. Onun fikrincə, bu fəaliyyətlər əvvəldən oyunçuların ziyanına qurulur və yalnız təşkilatçıya qazanc gətirir. Hətta cüzi miqdarda, lakin mütəmadi xərclər uzunmüddətli perspektivdə böyük məbləğlərə çevrilə bilər, əgər həmin vəsaitlər investisiyaya yönəldilsəydi.
4. Böyük evlər
Baffet böyük evlərin avtomatik olaraq həyat keyfiyyətini artırdığını və ya yaxşı sərmayə olduğunu inkar edir. Onun sözlərinə görə, yaşayış sahəsi ehtiyaclara uyğun olmalı, artıq maliyyə yükü yaratmamalıdır. Böyük evlər kommunal xidmətlər, təmir, mebel və əmlak vergisi kimi xərcləri artırır.
5. Mürəkkəb investisiyalar: "Anlamadığınız sahəyə sərmayə qoymayın"
Baffet mürəkkəb maliyyə alətlərinə və dəb halını almış investisiya trendlərinə vəsait yönəltməyin riskli olduğunu bildirir. O, sadə və aydın investisiya strategiyasını dəstəkləyir: geniş bazar indeks fondlarının mütəmadi alınması. Bu metod əlavə bilik və daimi diqqət tələb etmədən diversifikasiya, aşağı xərc və bazar gəliri təmin edir.
Qeyd edək ki, Baffet daha əvvəl uğurlu və həqiqətən uğurlu insanlar arasındakı əsas fərqin "yox” deməyi bacarmaqla bağlı olduğunu vurğulamışdı.




Oxşar xəbərlər
Xəbər lenti
Sorğu
Müharibən başlamasını istəyirsinizmi?

Səs ver Nəticələr


Cəmi səslər: 1326