Generalın ANASININ BAZARI

Ölkədə antikorrupsiya həbsləri gerçəkləşdirildiyi bir vaxtda daha bir sabiq məmurun adı rüşvət qalmaqalı üzərindən gündəmə gəlib.

Ötən illər ərzində mətbuatda yazılanlar, iddialar onu deməyə əsas verir ki, Ədliyyə Nazirliyinin İcra Baş İdarəsinin sabiq rəisi, keçmiş baş icra məmuru Nurəddin Mustafayevi də istintaqa cəlb edə bilərlər. İddialara inansaq, baş icra məmuru postu Nurəddin Mustafayevi bir neçə yüz milyonun sahibinə çevirib, yarım milyarda qədər sərvət toplaya bilib. Bu iddiaları gücləndirən daha bir məlumat “Yeni Müsavat”a daxil olub. İddialara görə Nurəddin Mustafayev vəzifədə olarkən 20-ci sahə bazarına sahiblənib. Həmin vaxt bazar Nurəddin Mustafayevin sürücüsü Raminin atasının adına rəsmiləşdirilib. Bazar bir müddət sürücünün atasının adında qalıb və sonradan Nurəddin Mustafayevin anasının adına keçirilib.

Bu məlumatlar maraqlı suallar ortaya çıxarır: əgər bazar qanuni yolla alınıbsa, əldə edilməsində hər hansı korrupsiya elementi olmayıbsa, bu ötür-ötür oyununa nə ehtiyac olub? Yəni Nurəddin Mustafayev bazarı birbaşa elə anasının adına keçirə bilməzdi?

 


Nurəddin Mustafayev

Maraqlı bir məqam da odur ki, bazar Nurəddin Mustafayevin anasının adına keçiriləndən sonra da, bazarla bağlı sabiq baş icra məmurunun narahatlığı qalıb. Bu dəfə bazarı ParaBOKT-a girov qoyaraq külli miqdarda pul götürülüb. Nurəddin Mustafayevin 20-ci sahə bazarına sahiblənməsində vəzifədə olduğu müddətdə onun “qara kassa”sı olan Tural Məmmədovun xüsusi rolunun olması da iddia edilir.

Daha bir maraqlı məqam isə Nurəddin Mustafayevin vəzifəyə təyinat alması ilə bağlıdır. Onun baş icra məmuru vəzifəsinə təyinat almasında Ramiz Mehdiyevin rolu olub. Bu haqda ovqat.com bunları yazıb: “Nurəddin Mustafayev Ramiz Mehdiyevin həmkəndlisidir. Bu vəzifəyə də Ramiz Mehdiyevin təzyiqi altında təyin edilib. Ona görə də digər həmkəndlisi olan Şərurlu İsfəndiyarla bağlı bütün qalmaqallı icra sənədlərinin icra edilməsinin qarşısını alıb. Məlumata görə hazırda təkcə “Moskva” univermağının həndəvərindəki bütün kommersiya obyektlərinin yarısının onun mülkiyyətində olduğu bildirilir”.

Ümumiyyətlə isə 4 il müddətində baş icra məmuru postunda olması Nurəddin Mustafayevin hədsiz dərəcədə varlanmasına yol açıb. Bildirilir ki, Nurəddin Mustafayevin baş icra məmuru vəzifəsində olduğu dövrdə məhkəmə qərarlarının icra vəziyyəti tərəflərin onunla münasibət qura bilməsindən asılı olub. Nurəddin Mustafayevin “xüsusi qaydaları”na görə onu “görənlər” qərarların icrasını və ya icra edilməməsini özləri müəyyən ediblər. Hətta Nurəddin Mustafayevin diqtəsi ilə qərarların icrası ilə bağlı 50/50-yə qaydası da varmış. Azərbaycan Respublikası adından çıxarılan qərar üzrə ödənilməli olan məbləğin 50 faizi alınmaqla icra olunurmuş. Onun işdən çıxarılmasının da məhz belə qanundankənar əməlləri ilə əlaqəli olması iddiası da var. Hələ rəsmən vəzifəsindən azad edilməzdən əvvəl 4 gün ərzində Baş prokuror yanında Korrupsiyaya qarşı Mübarizə Baş İdarəsində dindirilib. Nurəddin Mustafayev korrupsiya faktlarına dair sorğu-sual edilib. Buna səbəb onun rəhbərlik etdiyi sahədə geniş korrupsiya mexanizmi yaratmasına dair Korrupsiya İdarəsinə ciddi siqnalların daxil olması göstərilirdi.
Xatırladaq ki, ədliyyə naziri Fikrət Məmmədovun 13 avqust 2020-ci il tarixində imzaladığı əmrlə Nurəddin Mustafayev vəzifəsindən uzaqlaşdırılıb. Ədliyyə Nazirliyi generalın işdən çıxarılmasını belə şərh edib: “Nurəddin Mustafayev ölkədə gedən islahatlar və kadr dəyişilikləri ilə bağlı işlərin yaxşılaşdırılmasına yönəlmiş tədbirlər çərçivəsində tuduğu vəzifədən azad olunub”.

Nazirliyin şərhindən az sonra tanınmış vəkil Adəm Məmmədov öz “facebook” səhifəsində sabiq icra məmuru barəsində olduqca ilginc bir iddianı ortaya qoydu. Yazdı ki, Nurəddin Mustafayev 100 min manat rüşvət alaraq, qarşılığında vəd etdiyi işi görmədiyinə görə vəzifəsindən uzaqlaşdırılıb və hətta generalın rüşvət almasını təsdiq edən səs yazısı da var.
Adəm Məmmədovun “Azpolitika.info”da paylaşılan fikirlərindən sitat:

“Adəm Məmmədov bildirib ki, vəkil İsmayıl Kəngərli ilə general arasında Hafiz Məmmədovun tələbkar olduğu qətnamənin icrası ilə bağlı müzakirələr olub. Həmin müzakirədə Baş idarə rəisi sənədin icrası ilə əlaqədar 100 min manat pul alıb. Amma nə qətnaməni icra edib, nə də pulu geri qaytarıb. “Generalla danışıqlar vəkil İsmayıl Kəngərli tərəfindən qeydə alındıqdan sonra diskə köçürülərək şikayət ərizəsi ilə birlikdə Prezident Administrasiyasına göndərilib. General və vəkil arasında olan səs yazısı böyük səs-küyə səbəb olub”, – Adəm Məmmədov qeyd edib.

Düzdür, vəkil İsmayıl Kəngərli öz "Facebook" səhifəsində Adəm Məmmədovun ittihamlarını təkzib edib. Qeyd edək ki, Adəm Məmmədov sonradan öz “facebook” səhifəsindən generalla bağlı yazdığı fikirləri silib. İzah olaraq isə yazıb ki, statusu silməsinin səbəbi həmkarlarının çoxsaylı xahişləridir. Yəni, Adəm Məmmədov dediklərini təkzib etməyib, qeyd olunan hadisənin baş verməsi ilə bağlı fikirlərinin üzərində dayanıb. Vəkilin iddiasından belə məlum olub ki, general Mustafayev, 100 min manat rüşvət aldığını sübut edən səs yazısı Prezident Administrasiyasına çatan kimi, istintaqa cəlb olunub və ardınca işdən azad olunub”.

Maraqlıdır ki, Nurəddin Mustafayev işdən çıxarılandan sonra bu məsələnin nəticəsi ilə bağlı ictimaiyyətə geniş açıqlama verilməyib. Bu gün də bilinmir ki, 100 minlik rüşvət alınmasına görə Nurəddin Mustafayev barəsində hansı addım atılıb.

E.HÜSEYNOV,
“Yeni Müsavat”