Cənab Zeynal Nağdəliyev, Sizin Ağsu RİH-də baş verənlərdən xəbəriniz varmı ?

 Lerikin keçmiş ( 2007-2021-ci illər ), Ağsunun indiki ( 2021-ci ildən )  icra başçısı  Rövşən Bağırovun əməllərindən bəhs  edən, “ Ağsuda əməliyyat: 2 ay əvvəl Prezidentin MEDAL verdiyi  Sənan Feyzullayev həbs olundu. İcra başçısı Rövşən Bağırov öz  “qara kassir”inə BƏRAƏT almaq istəyir..”  və “Korrupsiyaya qarşı Mübarizə İdarəsi Ağsu RİH-nin başçısı Rövşən Bağırovun əməllərini görmür ?”  başlıqlı  məqalələrdə dövlət qurumları qarşısında bir neçə sual  qoymuşduq. Təəssüf ki, müvafiq dövlət qurumları hələ də susmaqda davam edir.

Qısa xatırlatma üçün bildirək ki, birinci məqalədə  2024-cü il sentyabr  ayında  Ağsu RİH-də keçirilən əməliyyat zamanı  icra  başçısı  Rövşən  Bağırovun “sağ əli”,  “qara  kassası”, Ağsu RİH-nin  ərazi idarəetmə və yerli özünüidarəetmə orqanları ilə iş şöbəsinin müdiri Feyzullayev Sənan Nadir oğlunun  həbs  olunmasından bəhs etmişdik. ( Barəsində Baş Prokuror yanında Korrupsiyaya qarşı Mübarizə Baş İdarəsində cinayət işi başlanıb).

Və məqalədə haqlı olaraq sual vermişdik:

Ağsu RİH-də keçirilən əməliyyatdan 2 ay öncə  Prezident  İlham Əliyevin 24 iyun  2024-cü il tarixli  sərəncamı ilə Sənan  Feyzullayev   “Dövlət qulluğunda fərqlənməyə görə” medalı ilə təltif olunmuşdu. ( Mənbə: https://e-qanun.az/framework/57114 ).

Və 2 ay  sonra həbs olundu.

Məgər rüşvət almaq, korrupsiya əməli   DÖVLƏTƏ QULLUQDUR ?

Əlbəttə, cənab Prezident  irili-xırdalı minlərlər, on minlərlə məmuru şəxsən tanıya bilməz. Bu mümkün də  deyil. Bəs  həbs olunan Sənan Feyzullayevin medal alması üçün  “xeyir-duanı”, təqdimatı kim verib ?

Biz, yeri  gəlmişkən, bu sualla Prezidenti Administrasiyasının Regional idarəetmə və yerli özünüidarəetmə orqanları ilə iş şöbəsinin müdiri, hörmətli  Zeynal Nağdəliyevə müraciət edirik.

Cənab Nağdəliyev, Sizin Ağsu RİH-də baş verənlərdən  xəbəriniz  varmı  ?

Sonda  onu qeyd  edək ki,  cənab başçısının, yəni Rövşən Bağırovun daha bir əməli ilə bağlı  NUH.az-a məlumat daxil olub.

Daxil olan məlumata görə, icra başçısı Rövşən Bağırov  Rusiyadan saxta diplom almış ( Elm və Təhsil Nazirliyində təsdiq olunmayan ) şəxsləri rayonda dövlət qurumlarına vəzifəyə təyin edib. Nəyin müqabilində..?

Hörmətli  Zeynal müəllim !

Bu informasiyanı yoxlamaq üçün bizim istintaq qrupumuz-filan yoxdur. Göstəriş verin informasiya yoxlanılsın və məlumat təsdiqini taparsa, günahkar şəxslər cəzalandırılsın.

Hörmətli cənab Nağdəliyev !

Ulu Öndər deyirdi:

“ “Dövlət iki şeydən sarsıla bilər: günahkar cəzasız qalanda və günahsıza cəza veriləndə”.

Yəni mərhum Ulu Öndər dövlətə və dövlətçiliyə təhlükənin dəqiq yerini göstərib.

Ümid edirik ki, nəhayət müvafiq dövlət qurumları Ağsu RİH-də baş verənlərlə bağlı qərarını verəcək.

Bizi izləyin.  NUH.az