Baş redaktor Prezidentə müraciət etdi

Cənab Prezident!

Məlumdur ki, böyük, ya da kiçik olmasından asılı olmayaraq hər bir dövlət başda 1-ci şəxs olmaqla müəyyən siyasi komanda tərəfindən idarə olunur.

Hər bir siyasi komandanın isə ən həssas yeri  kadr məsələsi, kadr korpusudur. Azərbaycan kimi  gənc dövlətlərdə isə bu problem daha ciddidir. Çünki  illərlə oturuşmuş  kadr korpusunun olmaması, hər  sferada  müasir tələblərə cavab verən  kadr çatışmazlığı  bu problemi daha da ciddi  edir.  

Cənab Prezident!

O da bəllidir ki, ölkənin 1-ci şəxsinin bütün komanda üzvlərini, sayı yüzlərlə, bəlkə də minlərlə olan kadr korpusunu şəxsən tanıması, ünsiyyətdə olması, onların iş qabiliyyətinə dərindən  bələd olması hətta fiziki cəhətdən mümkün deyil. Yəni kadrların  yetərli hissəsi ölkə başçısına komandanın digər  üzvləri tərəfindən təqdim edilir.  Bu dünyanın hər yerində belədir.

Cənab Prezident!

Sizin son vaxtlar apardığınız  ciddi  kadr islahatları, özünü doğrultmayan, xalqa yuxarıdan aşağı baxan, harınlamış, hətta vətəndaşı ağır sözlərlə təhqir edən bəzi icra başçılarını, digər məmurları işdən azad etməyiniz cəmiyyət tərəfindən bəyənilir və təqdir olunur.

Ancaq ortaya xeyli suallar çıxır.

Nəinki etimadı doğrultmayan, hətta dövləti vətəndaşın gözündən salan bu məmurlar kimlər tərəfindən ölkənin 1-ci şəxsinə təqdim olunub..?

Axı, ortada ən azı mənəvi məsuliyyət məsələsi var.

Düzdür, təqdimatı verən şəxs də səhv edə bilər. Heç kim səhvdən sığortalanmayıb. Ancaq  bu  səhvlərin bir limiti, həddi, sonu olmalıdır. Ki, namizəd irəli sürən şəxs başa düşsün ki, onun özü  artıq  etimadı itirir.

Cənab Prezident!

Məlumdur ki, adi partiyaya üzv olmaq üçün ən azı  2 nəfər  zəmanət  verir. Mən hələ bankdan 1000 manat pul götürən vətəndaşdan  2  nəfər  zamin tələb olunmasını demirəm.

Necə olur ki, bank 1000 manat  pul vermək  üçün  girov və üstəlik zamin tələb edir. Ancaq 100-150 min əhalisi  olan  rayonların idarə olunmasının kiməsə həvalə edilməsi  zaminsiz həll olunur.

Ona görə də, mən  bir vətəndaş, bir media mənsubu olaraq təklif edirəm ki, mühüm postlara, icra başçısı və digər vəzifələrə təyin olunan şəxslərin sərəncamında konkret zaminlərin adı və soyadı qeyd olunsun. Qoy xalq da bilsin ki, sonradan etibarı və etimadı itirən məmurlar kimlərin “xeyir-dua”sı ilə  mühüm vəzifəyə  təyin olunublar.

Belə olarsa,  kadr təqdim eləmək üçün az qala bir-biri ilə yarışa çıxan komanda üzvləri  ölkə və Prezident qarşısında öz məsuliyyətlərini başa düşərlər.

Hörmətlə,

NUH informasiya agentliyinin ( NUH.az)

baş redaktoru Kamran Məhərrəmli