Son xəbərlər:

Sirri 114 il ərzində açılmayıb: Doroti Arnolda nə olub?

24 avqust 2025 15:30

1910-cu ildə Nyu-York cəmiyyətinin parlaq üzvlərindən biri olan 25 yaşlı varis Doroti Arnoldun itkin düşməsi, aradan keçən 114 ilə baxmayaraq hələ də cavabsız qalan ən məşhur sirrlərdən biri olaraq qalır.

Qaynarinfo xəbər verir ki, gənc qadının öldürüldüyü, qaçırıldığı və ya sadəcə izini itirərək yeni həyata başladığı barədə saysız-hesabsız nəzəriyyələr irəli sürülüb.

12 dekabr 1910-cu il səhəri, Doroti kiçik bacısı üçün paltar almaq məqsədilə Nyu-Yorkdakı malikanəsindən ayrılıb. O, yanında 30 dollar (bu günün pulu ilə təxminən 1.000 dollar) daşıyıb, müasir dəbə uyğun geyinib. Gün ərzində kitab və şokolad aldığı təsdiqlənib, günortadan əvvəl dostu ilə qarşılaşıb evə qayıdacağını bildirib. Sonra isə birdəfəlik izsiz yoxa çıxıb.

Dorotinin evə qayıtmaması ailəni narahat etsə də, onlar hadisənin səs-küyə səbəb olmaması üçün 6 həftə polisə müraciət etməyiblər. Yalnız xüsusi detektivlərin də nəticə əldə etməməsindən sonra atası Françis Rose Arnold polisə müraciət etməyə məcbur olub. Onun haqqında ətraflı təsvir verilərək tapana mükafat vəd edilib.

Brin Mavr Universitetinin ədəbiyyat fakültəsini bitirən Doroti yazıçı olmaq istəyib. Ailəsinin bu arzularını ciddi qəbul etməməsi səbəbindən özəl poçt qutusu kirayələyərək hekayələrini jurnallara göndərib.

Hadisədən sonra mətbuatda, Dorotinin ailəsindən gizli olaraq pittsburqlu Corc S. Qrissom Jr ilə münasibət qurduğu və Boston otellərində onunla vaxt keçirmək üçün zinət əşyalarını girov qoyduğu üzə çıxıb. Bu münasibət ailə tərəfindən qəbul olunmayıb və böyük qalmaqal təhlükəsi daşıyıb.

Dorotinin itkin düşməsi ilə bağlı müxtəlif versiyalar gündəmə gəlib:

* Uğursuz abort iddiası: 1914-cü ildə qanunsuz abort əməliyyatı aparan bir həkimin Dorotinin əməliyyat zamanı öldüyünü və cəsədinin gizlədildiyini dediyi irəli sürülüb.

* Qətl və basdırılma: Bir məhbus, onun cəsədini bir evin zirzəmisinə basdırmaq üçün pul aldığını etiraf edib, lakin araşdırmalar nəticə verməyib.

* Yeni həyata başlama: Tarixçi Silvia Pettemin fikrincə, Doroti öz iradəsi ilə yoxa çıxaraq başqa ad altında həyatını davam etdirmiş ola bilər. Hətta Los-Ancelesdə Ella Nevins adı ilə yaşayan bir qadının Doroti olduğunu iddia etməsi də xəbər edilib.

Bununla yanaşı, ailəyə göndərilən şübhəli məktublar, "təhlükəsizlikdəuəm" yazılı kart və saysız-hesabsız xəbərdarlıqlar da sirri daha da dərinləşdirib.

Arnold ailəsi bu hadisəni açıq müzakirə etməkdən uzun illər boyu imtina edib. Bacısı Marjori ailə adından uzaqlaşaraq Avropaya köçüb. Nəvələrindən bəziləri Doroti ilə bağlı sənədləri məhv edib, bəziləri isə hələ də həqiqətin ortaya çıxacağına ümid edir.

Bu gün ailə üzvləri üçün bu hadisə travmatik bir miras, ictimaiyyət üçün isə hələ də həll olunmamış ən dramatik itkin hadisələrindən biri olaraq qalır.