Ölkəmizin bank sistemi ilə bağlı xeyli müddətdir yazırıq. Bank sistemindəki süründürməçilik, əlavə, lazımsız sənədlərin tələb olunması, kimlərinsə mütləq zamin durması və daha nələr... Bu hələ harasıdır..? Banklarımız verdiyi məbləğdən elə faizlər tələb edirlər ki, heç sələmçilər belə faiz tələb etmirlər. Bu mövzu dəfələrlər, Milli Məclisdə deputat Vahid Əhmədov, Əli Məsimli, Siyavuş Novruzov və digər millət vəkilləri tərəfindən səsləndirilib. Hətta millət vəkilləri daha sərt şəkildə ölkənin banklarını soyğunçu adlandırıblar. Fikir verdinizmi, dövlətin rəsmi tribunasından bankların ünvanına SOYĞUNÇU yarlıkı yapışdırılıb. Tanışlarımızın dediyinə görə, qonşu Qazaxstanda, Qırğızstanda və digər postsovet ölkələrində banklar vətəndaşlara, iş adamlarına kreditləri asan və aşağı faizlə verirlər. Bəs bizdə vəziyyət niyə belə dözülməzdir..? Bircə misal çəkəcəyik. Deməli, bankların özündə deyil, hətta filiallarının müdirləri ayda 14-15 min manat maaş alırlar. Təsəvvür edirsiniz filial müdiri 14-15 min manat maaş alır. İndi görün bankın özünün nüdiri nə qədər maaş alır..? Adamdan soruşarlar ki, banklar yer əkmir, məhsul istehsal etmir, ticarətlə məşğul olmur..bəs bu boyda gəlir haradandlr ki, filial müdirinə bu qədər maaş verir. Bu sualın bircə cavabı var: əhalini soymaq, soyğunçuluq hesabına. Bu hələ harasıdır..? Son bir neçə ildə banklar dələduzluqla məşğuldur. Bəli, məhz dələduzluqla. Belə banklardan biri də “Umico Bank”dır. Bu bank eyni adlı, yəni “Umico Bank” adı ilə instagram səhifəsi açaraq vətəndaşları aldatmaqla məşğuldur. Gəlin, bu bankın dələduzluq mexanizminə nəzər salaq. Deməli, bank öz instagram səhifəsində müştəriləri şirnikləndirmək üçün yalançı vədlər verirlər. Öz səhifələrində qeyd edirlər: Rəsmi iş yeri olmayanlara da kredit-pul veririk.... Qeyri-rəsmi işləyənlər üçün də gündəlik tələbat kreditləri veririk... Sizə təcili pul lazımdır ? Biz kömək edə bilərik... Bu təkliflərdən əlavə bank öz səhifəsində kataloq təqdim edir: 1000 manat üçün 60 manat rüsum, 2000 manat üçün 70 manat rüsum, 3000 manat üçün 80 manat rüsum, 4000 manat üçün 90 manat rüsum, 5000 manat üçün 100 manat rüsum, 10000 manat üçün 200 manat rüsum və s. Beləcə Umico Bank müştərini tora salmağa başlayır. Konkret olaraq redaksiyamıza müraciət edən vətəndaş Kəmalə Hüseynzadə müxbirimizə bildirib ki, mən bankın instagram səhifəsində bu reklamı görən kimi bankla əlaqə saxladım və mənə 070-836-64-41 mobil telefonla əlaqə saxlamağı bildirdilər. Müştərinin dediyinə görə, telefonla əlaqə saxlayandan sonra ondan şəxsiyyət vəsiqəsi tələb olunub ki, baxaq görək sizə kredit vermək olarmı. Və müştəri şəxsiyyət vəsiqəsini göndərib. Bankın nümayəndəsi deyib ki, siz 10 min manata qədər kredit götürə bilərsiniz. Müştəri soruşanda ki, pulu haradan götürəcəm, bankın nümayəndəsi deyib ki, gəlməyə ehtiyac yoxdur, biz online fəaliyyət göstəririk, pulu kartınıza köçürəcəyik. Bankın nümayəndəsi onu da xüsusi olaraq vurğulayıb ki, 2000 manat kredit üçün 70 manat dövlət rüsumu ödəyin 10 dəqiqəyə 2000 manat pul kartınza köçəcək. Bankın nümayəndəsi onu da deyib ki, 70 manat pulu terminaldan köçürməyin, kartdan karta köçürün, əgər 10 dəqiqə ərzində 70 manat pulu köçürməsəniz müqavilə avtomatik ləğv olunacaq. Beləliklə bankın nümayəndəsi müştəriyə bank şifrəsi göndərib və müştəri 70 manatı ödəyib. Sonra müştəridən göndərilən 70 manat pulun çeki tələb olunub, müştəri çekin də şəkilini göndərib. Və sonra bankın verdiyi nömrəyə zəng çatmayıb, müştərinin telefonu bloka qoyulub. Sonda aldanan müştəri Kəmalə Hüseynzadə hüquq-mühafizə orqanlarına müraciət edəcəyini bildirdi. Mövzunu gündəmdə saxlayacağıq. Bizi izləyin.