“Azərbaycanın Avropa Parlamentindən uzaqlaşması qərarına o qədər də müsbət yanaşmıram. Küsüb kənarda dayanmaqla bir iş görmək olmaz. Avropa Parlamenti ilə işləmək lazım idi”.

Bu barədə AMİP-in fəxri lideri Etibar Məmmədov Azərbaycan Milli Məclisin Avropa Parlamentinin qərəzli mövqeyinə etiraz olaraq bu qurumla bütün əməkdaşlıq əlaqələrinə son qoymaq barədə qərarına münasibət bildirərkən moderator.az-a açıqlamasında qeyd edib.

Etibar Məmmədov deyib ki, AP-də çox müxtəlif fraksiyalar, çox müxtəlif partiyalar fəlaiyyət göstərir və onların arasından bizə münasib, bizə uyğun olan qruplarla əməkdaşlıq etməliydik, yaxınlaşmalıydıq:

“Təəssüf ki, indiyədək bunlar baş verməyib. Halbuki bu günədək yalnız parlament deyil, həm də hakim partiya başda olmaqla digər siyasi partiyalar da Avropa Parlamenti ilə işləməli idi. Bunlar edilmədiyi üçün həmin qurumun qərarlarına bizim heç bir təsirimiz olmayıb. Deyilənləri ona görə etməliydik ki, Azərbaycan əleyhinə danışan çox olsa da, heç olmasa bir neçə nəfər də bizim lehimizə danışsın. Bu günə qədər belə bir şey görməmişəm”. E.Məmmədova görə, Azərbaycanın Avropa qurumları ilə əlaqələrini dayandırması Rusiya hakimiyyətinin ürəyincədir:

“Əslində hər bir dövlət nə qədər beynəlxalq strukturlar varsa, hamısında təmsil olunmalı və onlara təsir imkanları axtarmalıdır. Bu həm də həmin dövlətin siyasi təşkilatları və diplomatik korpusunun vəzifəsidir...”

Milli Məclisin deputatı Aydın Hüseynov isə Musavat.com-a bildirib ki, Azərbaycan demək olar bütün nüfuzulu beynəlxalq təşkilatlarla yaxşı əməkdaşlıq münasibətlərinə malikdir: “Azərbaycan demək olar bütün nüfuzlu beynəlxalq təşkilatların üzvüdür. Həmin təşkilatlarda aktiv fəaliyyət göstərir, əməkdaşlıq edir. Azərbaycan rəsmi üzv olmadığı beynəlxalq statusli təşkilatlarla isə əməkdaşlıq əlaqələri qurub. Bizim beynəlxalq qurumlarla əlaqələrimiz milli maraqlarımızın tələb etdiyi səviyyədə qurulur. Milli maraqlarımızı nəzərə almayan, Azərbaycana qarşı qərəzli mövqeyini daim davam etdirən, anti-Azərbaycan mövqeyi xroniki xəstəlik səviyyəsində çatan Avropa Parlamentinin qərəzli mövqeyinə göz yummaq mümkün deyildi. Azərbaycan neçə illərdir səbr nümayiş etdirirdi, bu qurumun nəhayət ədalətli mövqedən çıxış etməsi üçün əməkdaşlıq münasibətlərini davam edirdik. Ancaq Avropa Parlamenti yanlış, qəzərli mövqeyini dəyişmədi və Azərbaycana qarşı sayca 15-ci qondarma qətnaməsini qəbul etdi. Bunun qraşılığı başqa cür ola bilməzdi, Azərbaycan Milli Məclisi əməkdaşlıq münasibətlərini dayandırmalı idi. Vəziyyətin bu həddə çatmasının günühkarı, səbəbkarı Avropa Parlamentidir”.

Ədalət Partiyasının sədri Mütəllim Rəhimli isə bildirib ki, Azərbaycan tərəfi uzun illərdir Avropa Parlamentinin ikili standartlardan çıxış etdiyini bəyan edir.

Xüsusilə, Qarabağ münaqişəsi dövründə Avropa Parlamentinin Azərbaycanın ərazi bütövlüyü ilə bağlı obyektiv daha balanslı və prinsipial mövqe nümayiş etdirməyib. Bu da rəsmi Bakıda və Azərbaycan ictimaiyyətində ciddi narazılıq yaradıb:

“Azərbaycan milli maraqlarına və suveren mövqeyinə hörmət tələb etməkdə haqlıdır. Azərbaycan xalqı da bu münasibəti dəstəkləyir. Avropa Parlamenti Azərbaycanı haqsız, heç bir əsası olmayan məsələlərdə qınayaraq bununla bağlı ölkəmizə qarşı bir kampaniya başlayır. Bizim buna səbrli münasibətimiz onların daha da irəli getməsinə və özlərini haqlı hesab etməsinə gətirib çıxarır. Nəticədə dünya ictimaiyyəti də bizim günahkar olduğumuz qənaətinə gəlir. Ona görə də Avropa Parlamentinin oyunlarına cavab verilməsi doğru yanaşma hesab olunmalıdır. Yaxşı olardı ki, münasibətlər qarşılıqlı hörmətə əsaslanan, lakin prinsipial mövqeni qoruyan siyasi əməkdaşlıq modelinin qurulması əsasında tənzimlənsin. Təəsüf ki, qarşı tərəf bunu istəmədiyini dəfələrlə nümayiş etdirib. Münasibətlərdə sevgi birtərəfli olmur. Biz Avropa Parlamentinə yaxınlaşdıqca qarşı tərəfin bunu səhv başa düşdüyü görünürdü”.