Deyirdilər ki, bu oğlan o qızı alacaq ” – Sabiq deputat bayram xatirəsini danışdı

“Heyif ki, xankəndlilər bu bayramı da orada keçirə bilmədilər. Kaş yenə o günlər olaydı. Atam, anam və qohumlarımın əhatəsində olardım. Bu, mənim yaralı yerimdir. Ən gözəl günlərimi Xankəndinin Kərkicahan qəsəbəsində keçirmişəm. Anam müəllim işləyirdi, şəhər məktəbində yer yox idi. Sentyabrda Kərkicahana gedirdik, may ayında isə Xankəndiyə qayıdırdıq. Novruz bayramı Xankəndidə çox gözəl keçirdi. Bayramqabağı hazırlıqlar edirdilər. Gəvən adlı otu tonqalda yandırırdılar, işığı göyə saçırdı”.

Bunu Musavat.com-a açıqlamasında Xankəndinin sabiq deputatı Flora Qasımova deyib.

O, Xankəndidə keçirdiyi Novruz bayramlarından söz açıb:

“Hər çərşənbə axşamı tonqal qalayırdılar. Bayramqabağı uşaqlara mütləq təzə paltar alırdılar. Anamın tikiş maşını var idi, gecədən səhərə kimi mənə don tikmişdi. Kərkicahanda o vaxt hər adamda sac olmazdı. 4-5 evdə sac olardı. Saclarda yuxa çörəyi bişirmək üçün mütləq növbəyə yazılardılar. Yuxa bişirəndən sonra həmin sacların içində buğda qovurğası hazırlayırdılar.

Bizdə qapı pusmaq adəti də var idi. Balaca idim, xatırlayıram ki, qonşunun qızları iynənin ucuna pambıq qoyurdular, sonra da onu suyun içinə salırdılar. Ürəklərində də hansısa oğlanın adını tuturdular, iynələr bir-birinə yaxınlaşanda deyirdilər ki, bu oğlan o qızı alacaq. Çox maraqlı idi. Hündür bir qoz ağacı var idi. Oradan asılan yelləncəkdə yellənirdik.

Baxmayaraq ki, ermənilərin içində yaşayırdıq, adət-ənənələrimizi qoruyurduq. Bir məsələ də var ki, o vaxtlar indiki kimi şəkərbura, paxlava bişirməzdik. Qovurğa qovurardıq, şirniyyatlar bişirərdik. Həmin şirniyyatlardan bir qab ermənilərə də pay verərdik”.

Sabiq deputat deyib ki, azad olunandan sonra bir neçə dəfə Xankəndiyə gedib:

“Xankəndidə bir çox ev salamatdır. Sadəcə olaraq təmizlik, təmir aparmaq lazımdır. Oraya köç artıq başlamalıdır. İnsanlar var ki, Xankəndini görmədən dünyadan köçür. Bu yaxınlarda məktəbimizin direktoru Sabir Əliyev 93 yaşında Xankəndi həsrəti ilə dünyadan köçdü. Buna görə də tələsmək lazımdır. Elə insanlar var ki, günlərini sayır, deyirlər ki, kaş gedib öz evimizdə ölərdik. Mənim Xankəndidəki evim durur, amma yaman gündədir”.

Pensiyada olan Flora Qasımova gündəlik qrafikindən də söz açıb:

“Birtəhər başımı qatıram. Arada xankəndlilər bir yerə yığışırıq. Saytlara baxıram, xəbərləri oxuyuram. Bağda yaşayıram. Şəkərbura, paxlava bişirməyi də öyrənmişəm. Mənim paxlavamı çox bəyənirlər”.